ޕްރައިމަރީން ބަލިވި ކެންޑިޑޭޓުން ކުރިމަތިލުމުގެ ފުރުސަތު ހުޅުވާލައިފި
އިންތިޚާބު ބާއްވާނީ އެޕްރީލް 6 ގައި
އިލެކްޝަންސް ކަމިޝަނުގެ އިންތިޚާބާއި ބެހޭ މަރުކަޒު
ޕްރައިމަރީ އިން ބަލިވި ފަރާތްތަކަށް ރައްޔިތުންގެ މަޖިލީހުގެ އިންތިހާބަށް ކުރިމަތިލުމުގެ ފުރުސަތު އިލެކްޝަންސް ކަމިޝަނުން ހުޅުވާލައިފިއެވެ.
އީސީއިން ޕްރައިމަރީ އިން ބަލިވި ފަރާތްތަކަށް އެ ފުރުސަތު ހުޅުވާލީ ސުޕްރީމް ކޯޓުން ޕްރައިމަރީތަކުގައި ނާކާމިޔާބުވާ ކެންޑިޑޭޓުންނަށް ވެސް ވާދަ ކުރެވޭނެ ގޮތް ހަދައި، އަންނަ މަހުގެ ހަތަރު ވަނަ ދުވަހާ ހަމައަށް އެ ކެންޑިޑޭޓުންނަށް ފުރުސަތު ހުޅުވާލުމަށް އިލެކްޝަންސް ކޮމިޝަނުގެ މައްޗަށް އަމުރުކުރުމާއި ގުޅިގެންނެވެ.
އީސީއިން ބުނީ ސިޔާސީ ޕާޓީތަކުގެ ޕްރައިމަރީގައި ބައިވެރިވެ، ނާކާމިޔާބުވެފައިވާ ފަރާތްތަކަށް މަޖިލީސް އިންތިހާބަށް ކުރިމަތިލުމުގެ ފުރުސަތު، ހޯމަ ދުވަހުން ފެށިގެން އަންނަ މަހުގެ ހަތަރު ވަނަ ދުވަހުގެ ހަވީރު 4.00 އާ ހަމަޔަށް ހުޅުވާލާފައިވާ ކަމަށެވެ.
ޕްރައިމަރީ އިން ބަލިވި ފަރާތްތަކަށް އެ ފުރުސަތު ހުޅުވާލުމަށް އެދި ސުޕްރީމް ކޯޓަށް ހުށަހެޅީ ދާދި ފަހުން ބޭއްވި އެމްޑީޕީ ޕްރައިމަރީގައި ކާށިދޫ ދާއިރާއިން ނާކާމިޔާބުވި އަބްދުﷲ ޖާބިރު އާއި އަބްދުލް މާނިއު ހުސައިންގެ އިތުރުން ހިތަދޫ އުތުރު ދާއިރާގެ ޕްރައިމަރީން ބަލިވި އަހްމަދު މުހައްމަދެވެ.
ޕްރައިމަރީއިން ބަލިވިޔަސް އިންތިޚާބުގައި ވާދަކުރެވޭނެ ކަމަށް ސުޕްރީމް ކޯޓުން ކަނޑައެޅި ނަމަވެސް އެޕްރީލް މަހުގެ 6 ވަނަ ދުވަހު ރައްޔިތުންގެ މަޖިލީހުގެ އިންތިޚާބު ކަނޑައެޅިފައިވާ ދުވަހު އޮންނާނެ ކަމަށް އީސީއިން ބުނެއެވެ.
