މިފަހަރުގެ ރަމަޟާން މަހު ވެސް ތަރާވީސް ކުރަން އަދާލަތުން ހާފިޒުން ގެންނާނެ
25 ފެބުރުއަރީ 2019 | ހޯމަ 10:43އަދާލަތުން ގެންނަނީ 50 ހާފިޒުން
ފާއިތުވި ރަމަޟާން މަސްތަކުގައި ވެސް އަދާލަތުން ވަނީ ހާފިޒުން ގެނެސްފައި
މިފަހަރުގެ ރަމަޟާން މަހު ވެސް ރާއްޖޭގެ މިސްކިތްތަކުގައި އިމާމުވެ ތަރާވީޙް ނަމާދުކުރުމަށް ޙާފިޒުން ގެންނާނެ ކަމަށް އަދާލަތު ޕާޓީން ބުނެފިއެވެ.
އެޕާޓީން ބުނީ ވޭތުވެދިޔަ އަހަރުތަކެކޭ އެއްފަދައިން މިހިނގާ 1440 ވަނަ އަހަރުގެ ރަމަޟާން މަހު ވެސް ރާއްޖޭގެ މިސްކިތްތަކުގައި އިމާމުވެ ހިފްޡުކޮށް ތަރާވީޙް ނަމާދުކުރުމަށް 50 ޙާފިޒުން ގެނައުމަށް އެޕާޓީން ނިންމާފައިވާ ކަމަށެވެ. ހާފިޒުންނަށް ޚަރަދުގެ ގޮތުގައި ނަގާނީ 24,900ރ. (ސައުވީސްހާސް ނުވަ ސަތޭކަ) ރުފިޔާ ކަމަށް ވެސް އެ ޕާޓީން ބުނެއެވެ.
"ޙާފިޡުން ރާއްޖެ ގެނައުމާއި އަންބުރާ ފޮނުވާލުމާއި، މާލޭގައި މަޑުކުރައްވާ ވަގުތާއި ރަށްރަށަށް ފޮނުވުމާއި، ރަމަޟާން މަސް ނިމުމާ އެކު ޙާފިޡުން އަނބުރާ މާލެ ގެނެސް މާލޭގައި މަޑުކުރައްވަންޖެހޭ މުއްދަތުގައި ހިނގާނެ ޚަރަދާއި، ޙާފިޡުންނަށް ދޭ އެލަވަންސަށް ހިނގާނެ ޚަރަދުގެ ގޮތުގައި މިއަހަރު ނެގުމަށް ހަމަޖެހިފައި ވަނީ 24,900 (ސައުވީސްހާސް ނުވަ ސަތޭކަ) ރުފިޔާ،" އަދާލަތު ޕާޓީން ވަނީ ބުނެފައެވެ.
އަދާލަތު ޕާޓީ މެދުވެރިކޮށް ޙާފިޡުން ގެނައުމަށް ޝައުގުވެރިވާ ފަރާތްތަކުން 14 މާރޗު 2019 ވާ ބުރާސްފަތި ދުވަހުގެ މެންދުރު ފަހު 3:00 ގެ ކުރިން އެ ޕާޓީގެ މަރުކަޒީ އިދާރާ (ހ.ފުލިދޫގެ، 3 ވަނަ ފަންގިފިލާ) އަށް ރަސްމީކޮށް އެކަން އަންގައި ފައިސާ ދެއްކުމަށް އެދޭ ކަމަށް ބުނެފައި ވެއެވެ.
