ޖަޕާނުގެ އޮކިނާވާގައި ހުރި އެމެރިކާގެ އަސްކަރީ މަރުކަޒު އެހެން ތަނަކަށް ބަދަލުކުރަން އެ ގައުމުގެ ސަރުކާރުން ނިންމާފައިވާ ނިންމުމާއި ދެކޮޅަށް އެ ރަށުގެ ރައްޔިތުން ވޯޓު ދީފިއެވެ.

އޮކިނާވާގައި ހުންނަ މެރިންސް ފުޓެންމާ އެއަރބޭސް އެހެން ތަނަކަށް ބަދަލުކުރުމާއި ދެކޮޅަށް 72 އިންސައްތަ ވޯޓި ލިބިފައިވާ އިރު، އެއްކޮޅަށް ލިބުނީ އެންމެ 19 އިންސައްތަ ވޯޓެވެ. ވޯޓަށް ފަހު މީޑިއާއަށް މައުލޫމާތު ދެމުން އޮކިނާވާގެ ގަވަރުނަރު ޑެނީ ޓަމާކީ ވަނީ ރައްޔިތުންގެ ނިންމުމާއި އެއްގޮތަށް ސަރުކާރުގެ ސިޔާސަތު ބަދަލުކުރަން ބާރު އަޅުއްވާނެ ކަމަށް ވިދާޅުވެފައެވެ. އަދި ވަގުތުން ވަގުތަށް އަސްކަރީ މަރުކަޒުގެ މަސައްކަތް ހުއްޓާލަން ވެސް ޖަޕާނުގެ ސަރުކާރަށް ޓަމާކީ ގޮވާލެއްވިއެވެ.

ނަމަވެސް ޖަޕާނުގެ ސަރުކާރުން ބުނެފައި ވަނީ އަސްކަރީ މަރުކަޒު އެހެން ތަނަކަށް ބަދަލުކުރަން ކުރިން ނިންމާފައިވާ ގޮތަށް ކުރިޔަށް ދާނެ ކަމަށެވެ. އެ ގައުމުގެ ބޮޑުވަޒީރު ޝިންޒޯ އާބޭ ހޯމަ ދުވަހު ވިދާޅުވީ ސަރުކާރުން ރައްޔިތުންގެ ނިންމުމަށް އިހުތިރާމު ކުރާނެ ކަމަށެވެ. އެހެން ނަމަވެސް މިހާރު އެ މަރުކަޒު ބަދަލުކުރަން އެމެރިކާއާއި އެކު އެއްބަސްވެފައިވާތާ 23 އަހަރު ވެފައިވާ ކަމަށާއި، އެހެން ކަމުން މަސައްކަތް ކުރާނީ އެ ސަރަހައްދުގެ މީހުންގެ ރުހުން ހޯދަންކަމަށް އާބޭ ވިދާޅުވިއެވެ.

އާބޭގެ ސަރުކާރުން ވަނީ ތަކުރާރުކޮށް އަސްކަރީ މަރުކަޒު ބަދަލުކުރަން ޖެހޭ ކަމަށް ވަކާލާތު ކޮށްފައެވެ. އަދި އެ މަރުކަޒު އެހެން ތަނަކަށް ބަދަލުކުރުމުން ރައްޔިތުންނަށް ކުރިމަތިވެފައިވާ އުނދަގޫތައް ފިލައިގެން ދާނެ ކަމަށް ސަރުކާރުން ވަނީ ބުނެފައެވެ. ނަމަވެސް އެ ސަރަހައްދުގެ ރައްޔިތުން ބޭނުންވަނީ މި މަރުކަޒު ޖަޕާނުގެ އެހެން ރަށަކަށް ބަދަލުކުރާށެވެ.

ގިނަ މީހުންތަކެއް އާބާދުވެފައިވާ ސަރަހައްދެއްގައި ހުރި އަސްކަރީ މަރުކަޒު ބަދަލުކުރުމަށް މަސައްކަތް ކުރަމުން ދަނީ އޮކިނާވާގެ އައްސޭރި ފަށުގެ ހިސާބަކަށެވެ. އެމެރިކާގެ އަސްކަރީ މަރުކަޒު ބަދަލުކުރަން ޖަޕާނާއި އެކު އެއްބަސްވީ 1996ގައެވެ. އޭރު އަސްކަރީ މަރުކަޒު ބަދަލުކުރަން ނިންމީ އެމެރިކާ ސިފައިންތަކެއް ވެގެން ޖަޕާނު އަންހެން ކުއްޖަކު ރޭޕްކުރި މައްސަލައެއް ފެންމަތިވުމާއި ގުޅިގެން، އެމެރިކާ ސިފައިންނަށް ރައްދުވި ރުޅިވެރިކަން މައިތިރި ކުރުމުގެ ގޮތުންނެވެ.