ގޯލްޑް100 ގެ ލައިފް ޓައިމް އެޗީވްމަންޓް އެވޯޑް ގާސިމަށާއި އަބްދުﷲ އަލީ އަށް

ގޯލްޑް 100 ގެ ލައިފް ޓައިމް އެޗީވްމަންޓް އެވޯޑް ވިލާ ގްރޫޕްގެ ފައުންޑަރ އަދި ޗެއާމަން ގާސިމް އިބްރާހީމަށާއި ޓްރިޕްލް އޭ ކުންފުނީގެ ޗެއާމަން އަބްދުﷲ އަލީ އަށް ލިބިވަޑައިގެންފި އެވެ.

ހޮނިހިރު ދުވަހުގެ ރޭ ޕެރެޑައިޒް އައިލެންޑް ރިސޯޓުގައި ބޭއްވި ގޯލްޑް 100 އެވޯޑްސް ހަފުލާގައި ރާއްޖޭގައި އެންމެ ފުޅާ ދާއިރާއެއްގައި ވިޔަފާރި ކުރަމުން އަންނަ 100 ކުންފުންޏަކަށް ވަނީ އެވޯޑް ހަވާލުކޮށްފައެވެ.

މި އެވޯޑް ހަފްލާ ހެލްތް މިނިސްޓަރު އަބްދުﷲ އަމީން ޝަރަފުވެރިކޮށްދެއްވާފައިވާއިރު މި ހަފްލާގެ ތެރެއިން މޯލްޑިވްސް އިންވެސްޓްމަންޓް އޮޕްޗުނިޓީޒް ގައިޑް ވަނީ ލޯންޗުކޮށްފައެވެ.

ގޯލްޑް 100 ކުންފުނީގެ ގޮތުގައި ހޮވުނު ކުންފުނިތައް ވަނީ ގޯލްޑް 100 މެގަޒިންގައި ލިސްޓްކޮށްފައެވެ.

ރާއްޖޭގެ ވިޔަފާރީގެ ދާއިރާގައި މަސައްކަތްކުރާ ކުންފުނިތަކުގެ ތެރެއިން އެންމެ ކުރިއަރާފައިވާ ކުންފުނިތައް ހޮވުމަށް އަހަރަކު އެއްފަހަރު ބާއްވާ މި އެވޯޑް ހަފްލާ ބާއްވާ މިއީ ތިންވަނަ ފަހަރެވެ.

މިދިޔަ އަހަރު ގޯލްޑް 100 ލައިފްޓައިމް އެޗީވްމަންޓް އެވޯޑް ލިބިވަޑައިގެންފައި ވަނީ ބަންޑޮސް މޯލްޑިވްސް ރިސޯޓުގެ ވެރިޔާ މުހައްމަދު ވަހީދުއްދީން އަށާއި ކްރައުން ކޮމްޕެނީގެ ޑިރެކްޓަރ އަދި އެ ކުންފުނީގެ އެއް ބާނީ ކަމުގައިވާ އަހުމަދު ނަޒީރަށެވެ.

މި ފަހަރުގެ އެވޯޑްގެ ޕްލެޓިނަމް ޕާޓްނަރަކީ ބޭންކް އޮފް މޯލްޑިވްސް އެވެ. ގޯލްޑް ޕާޓްނަރުންގެ ތެރޭގައި އުރީދޫ، އެލައިޑް، ގަތަރު އެއާވޭސް، ހޯކްސް އަދި އަލްޝާލީ މެރިން މޯލްޑިވްސް ހިމެނެ އެވެ.