އިންޑިއާގެ ޕެރެމިލިޓަރީ ސިފައިންނަށް އަމާޒުކޮށް މި މަހުގެ 14 ވަނަ ދުވަހު ޕާކިސްތާނުގެ ހަނގުރާމަވެރި ޖަމާއަތުން ދިން ހަމަލާ އދ.ގެ ސެކިއުރިޓީ ކައުންސިލް އިން ހަރުކަށި އިބާރާތުން ކުށްވެރިކޮށްފިއެވެ.  

އިންޑިއާގެ ކަޝްމީރުގައި ހަރަކާތްތެރިވާ ސިފައިންނަށް އަމާޒުކޮށް ޕާކިސްތާނުގެ ޓެރަރިސްޓް ޖަމާއަތެއް ކަމަށްވާ ޖައެޝް-އީ މުހައްމަދު ކިޔާ ޖަމާއަތަކުން ދިން ހަމަލާގައި އިންޑިއާގެ ސެންޓްރަލް ރިޒާވް ފޯސްގެ 40 ސިފައިން ވަނީ މަރާލާފައެވެ.

އެ ހަމަލާ ކުށްވެރިކޮށް އދ.ގެ ސެކިއުރިޓީ ކައުންސިލުން ހުކުރު ދުވަހު ނެރުނު ބަޔާނުގައި ވަނީ, އެކަން ކުރި މީހުން އިންސާފުގެ ކުރިމައްޗަށް ގެންނަން ޖެހޭ ކަމަށް ގޮވާލާފައެވެ. އަދި ޓެރިރިޒަމްގެ އަމަލުތަކަކީ އެއްވެސް ގޮތަކަށް ބަލައިގަންނާނެ ކަންތައްތަކެއް ނޫން ކަމަށާއި، ދުނިޔޭގެ ހަމަނުޖެހުމަށް އެންމެ ބޮޑު ބިރަކަށްވެފައި އޮންނަނީ ޓެރަރިޒަމް ކަމަށްވެސް ބަޔާނުގައިވެއެވެ.

ސެކުއިރިޓީ ކައުންސިލުން ބަޔާން ނެރެފައިވާއިރު އެ ކައުންސިލްގެ ދާއިމީ މެމްބަރެއްގެ އިތުރުން ޕާކިސްތާނުގެ އެކުވެރި ޗައިނާ އިން ޕާކިސްތާނާއި ދެކޮޅަށް ބަޔާން ނެރުމަށް ހުރަސް އަޅަން މަސައްކަތް ކޮށްފައިވެއެވެ.

ކައުންސިލްގެ ދާއިމީ މެމްބަރެއްގެ ހައިސިއްޔަތުން ގަރާރުތައް ވީޓޯ ކުރުމުގެ ބާރު ޗައިނާ އަށް ލިބިގެންވެއެވެ.  

ޖައެޝް–އީ މުހައްމަދު ޖަމާއަތުގެ ލީޑަރު މައުލާނާ މަސްއޫދު އަޒްހަރު އަކީ ޓެރަރިސްޓެއް ކަމަށް ކަނޑައަޅައިދެން ޔޫއެން ކައުންސިލްގެ 1267 ކޮމިޓީ އަށް އިންޑިއާއިން މީގެ ކުރިން އެތައް ފަހަރަކު ހުށައަޅާފައިވާއިރު، އެކަން ބޮލްކް ކުރުމަށް ޗައިނާ އިން ވަނީ މަސައްކަތް ކޮށްފައެވެ.

ވަގު އައިޑެންޓިޓީ ކަޑެއް ބޭނުންކޮށްގެން އިންޑިއާގެ ސްރީނަގަރް އަށް ދަތުރު ކުރަމުން ދަނިކޮށް އަޒްހަރު އަތުލައިގެންފައި ވަނީ 1994 ވަނަ އަހަރުއެވެ. އޭގެ ހަތަރު އަހަރު ފަހުން 1999 ވަނަ އަހަރު ޕާކިސްތާނުން އިންޑިއާގެ ފްލައިޓެއް ހައިޖެކްކޮށް އެ ފްލައިޓަ ގައި ތިބި މީހުން ދޫކޮށްލާނީ އަޒްހަރު ދޫކޮށްލުމުން ކަމަށް ޕާކިސްތާނުން ޑިމާންޑް ކުރުމުން، އިންޑިއާއިން ވަނީ އޭނާ ދޫކޮށްލާފައެވެ.  ޗައިނާ އިން ޕާކިސްތާނާއި އެއްކޮޅަށް ބަޢިއަތުހިފައި އަޒްހަރު އަކީ ކުށެއް ކޮށްފައި ނުވާ މީހެއްގެ ގޮތުގައި މަސައްކަތް ކުރަމުންދާ ކަމަށް އިންޑިއާއިން ދަނީ ތުހުމަތު ކުރަމުންނެވެ.

ޖައޭޝް-އީ ޖަމާއަތުން ދިން ހަމަލާއި ގުޅިގެން ޗައިނާއިން ވެސް ވަނީ އެކަމުގައި ހިތާމަ ފާޅުކޮށް އިންޑިއާގެ ފޮރިން މިނިސްޓަރ ޝުޝްމާ ސްވަރާޖް އަށް މެސެޖެއް ފޮނުވާފައެވެ. އެހެން ނަމަވެސް އެ މެސެޖްގައި އެއްވެސް ވަރަކަށް ޕާކިސްތާން ކުށްވެރި ކޮށްފައި ނުވެއެވެ.