ހެލްމެޓް ބަހާ ޕްރޮގްރާމް އަންނަ ހޮނިހިރުދުވަހު ފަށަނީ
22 ފެބުރުއަރީ 2019 | ހުކުރު 06:28ހެލްމެޓް ލިބެނީ ތަމްރީން ޕްރޮގްރާމެއް ފުރިހަމަ ކުރުމުން
މި އަހަރުގެ މިހާތަނަށް ސިނަމާލެ ބްރިޖްގައި ގިނަ އެކްސިޑެންޓްތަކެއް ވަނީ ހިނގާފައި
އަންނަ މަހު 10 ދުވަހުން ފެށިގެން ސިނަމާލެ ބްރިޖް ހުރަސްކުރާ ފަރާތްތަކުން ހެލްމެޓް އަޅަން މަޖްބޫރުކޮށްފައިވާއިރު، އާންމުންނަށް ހެލްމެޓް ބަހާ ޕްރޮގްރާމް އަންނަ ހޮހިރު ދުވަހު ފަށާނެ ކަމަށް ޓްރާންސްޕޯޓް އޮތޯރިޓީން ވަނީ ބުނެފިއެވެ.
ހިލޭ ހެލްމެޓް ލިބެނީ އެއްގަމު އުޅަނދު ދުއްވުމުގައި، މަގުމަތީގެ އަހުލާގާ ބެހޭ ގޮތުން މައުލޫމާތު ދިނުމަށް ހޮނިހިރު ދުވަހު ބާއްވާ، ދެ ގަޑިއިރުގެ ތަމްރީން ސެޝަނެއްގައި ބައިވެރިވެ އެ ޕްރޮގްރާމް ފުރިހަމަކުރާ މީހުންނަށް ކަމަށް ޓްރާންސްޕޯޓް އޮތޯރިޓީން ވަނީ ބުނެފައެވެ.
އެ ޕްރޮގްރާމް ހިންގުމަށް ހަމަޖެހިފައި ވަނީ 30 ކިލޯމީޓަރަށްވުރެ ބާރަށް ދުއްވުމުގެ ހުއްދަ އޮންނަ ސަރަހައްދުތަކުގައެވެ. އެއީ މާލެ، އައްޑޫސިޓީ އަދި ލ. އަތޮޅުގެ ގުޅިފައިވާ ރަށްރަށެވެ. އެ ސަރަހައްދުތަކުގައި ދިރިއުޅޭ ރައްޔިތުންނަށް މި ޕްރޮގްރާމްގައި ބައިވެރިވެވޭނެ ކަމަށް ޓްރާންސްޕޯޓް އޮތޯރިޓީ ވަނީ ބުނެފައެވެ.
ޓްރާންސްޕޯޓް އޮތޯރިޓީން ބުނީ ހިލޭ ހެލްމެޓު ލިބޭ ޕްރޮގްރާމްގައި ބައިވެރިވާން ބޭނުންވާ މީހުންނަށް، އެ އޮތޯރިޓީގެ ވެބްސައިޓް މެދުވެރިކޮށް ނަން ނޯޓްކުރެވޭނެ ކަމަށެވެ.
މި ސަރުކާރުގެ ފުރަތަމަ 100 ދުވަހުގެ ތެރޭގައި 5،000 ހެލްމެޓް ބަހަން ވަނީ ނިންމައިފައިވާއިރު، އެ ގެނެސްދޭނެ ބަޔަކު ހޯދަން 23 ޖެނުއަރީގައި ޓްރާންސްޕޯޓް މިނިސްޓްރީން ވަނީ އިއުލާނުކޮށްފައެވެ.
މާޗް މަހުގެ 10 ވަނަ ދުވަހުން ފެށިގެން ހެލްމެޓް ނާޅައި، ބްރިޖް ހުރަސްކޮށް ދަތުރުކުރާ ނަމަ އެ ފަރާތްތަކާ މެދު ގާނޫނީ ފިޔަވަޅު އަޅާނެ ކަމަށް ޓްރާންސްޕޯޓް މިނިސްޓްރީން ވަނީ ބުނެފައެވެ.
ބްރިޖް މަތީގައި ނުރައްކާތެރި ގިނަ އެކްސިޑެންޓްތައް ހިނގަމުންދާއިރު، އެ އެކްސިޑެންޓްތަކުގައި ބޮލަށް ލިބޭ އަނިޔާތައް ގިނަކަން ފާހަގަކޮށްލެވެއެވެ.
