ޑާކަގައި ހިނގި ނުރައްކާތެރި އަލިފާނުގެ ހާދިސާގައި މަރުވި މީހުންގެ އަދަދު 80 އަށްވުރެ މައްޗަށް
21 ފެބުރުއަރީ 2019 | ބުރާސްފަތި 22:25ހާދިސާ ހިނގީ ބުދަ ދުވަހުގެ ރޭ
ޑާކާގައި ހިނގި އަލިފާނުގެ ހާދިސާ
ބަނގްލަދޭޝްގެ ވެރިރަށް ޑާކާގައި ހިނގި ނުރައްކާތެރި އަލިފާނުގެ ހާދިސާއެއްގައި މަރުވި މީހުންގެ އަދަދު 81ށް އަރައިފިއެވެ.
ބުދަ ދުވަހުގެރޭ 22:40 ހާއިރު ހިނގި އެ ހާދިސާގައި ފުރަތަމަ އަލިފާން ރޯވެފައިވަނީ "ޗޯކްބަޒާރު" ގައި ޤަވާއިދާ ޚިލާފަށް އަލިފާން ހިިފާ ޒާތުގެ ކެމިކަލްތަކެއް ބަންދުކޮށްފައިހުރި ގުދަނެއްގައި ކަމަށާއި، ކުޑަ ހިނދުކޮޅެއްގެ ތެރޭގައި ވަަށައިގެން ހުރި އިމާރާތްތަކަށް އަލިފާންގަނޑު ފެތުރެންފެށި ކަމަށް އެ ބަންގްލަދޭޝްގެ ނޫސްތަކުން ބުނެއެވެ.
ބާރަ ގަޑިއިރުގެ ބުރަ މަސައްކަތުން އަލިފާންގަނޑު މިހާރު ކޮންޓްރޯލް ކުރެވިފައިވާއިރު، އަލިފާން ނިއްވުމުގެ މަސައްކަތުގައި 200 އަށްވުރެ ގިނަ ސިފައިން ހަރަކާތްތެރިވިކަމަށް އަލިފާން ނިއްވުމުގައި ހަރަކާތްތެރިވި ސިފައިން ބުނެފައިވެއެވެ.
ހާދިސާ ހިނގި އިމާރަތް ކައިރީގައި ހުރި ހޮޓާތަކާއި ރެސްޓޯޯރަންޓު ތަކުގައި ގިނަ އަދަދެއްގެ މީހުން ތާށިވެފައިވާއިރު، އެ ސަރަހައްދުގައި ޓްރެފިކްގެ ބާރު ބޮޑުވުމުގެ ސަބަބުންވެސް ގިނަ ބަޔަކު އެ ސަރަހައްދުގައި ތާށިވެފައި ތިބެން ޖެހުނު ކަމަށް މީޑިއާ ރިޕޯރޓުތައް ބުނެއެވެ.
އެހާދިސާގައި މިހާތަނަށް 81 މީހުން މަރުވެފައިވީ ނަމަވެސް އެ އަދަދު އިތުރުވާނެ ކަމަށް ލަފާ ކުރެވޭ ކަަމަށާއި، މީހުން ރައްކާތެރި ހިސާބުތަކަށް ބަދަލުކުރުމުގެ މަސައްކަތް ބާރު ސްޕީޑެއްގައި ކުރިއަށްދާ ކަމަށް ބަނގްލަދޭޝް ފަޔަރ ޑިޕާރޓްމަންޓުގެ ޗީފް އަލީ އަހުމަދާއި ހަވާލާދީ މީޑިއާތަކުން ވަނީ ރިޕޯޓްކޮށްފައެވެ.
