ޓެރަރިޒަމާއި ދެކޮޅު މަސައްކަތް ވަރުގަދަކޮށް، ބޮން ހޯދުމަށް ޚާއްސަ ކުއްތާ ރާއްޖެއަށް ގެންނަނީ
ޓެރަރިޒަމާއި ދެކޮޅަށް މަސައްކަތްކުރާ މުއައްސަސާތަކުގައި ތިބި ފަރާތްތަކަށް ޒަމާނީ ތަމްރީނު ދޭނެ
ގޮވާ ތަކެތި ހޯދުމަށް ތަމްރީނުކޮށްފައިވާ ކުއްތާއެއް މަތންދާ ބޯޓެއް ބަލައި ފާސްކުރަނީ
ރާއްޖޭގައި ޓެރަރިޒަމާއި ދެކޮޅަށް ކުރާ މަސައްކަތް ވަރުގަދަކޮށް، ގޮވާތަކެތި ހޯދުމަށް ތަމްރީނުކޮށްފައިވާ ކުއްތާ ރާއްޖެއަށް ގެނައުމަށް އެއްބަސްވެ، އެމެރިކާ އާއި އެކު ދިވެހިރާއްޖެއިން ފަހުމުނާމާއެއްގައި ސޮއިކޮށްފިއެވެ.
ފޮރިން މިނިސްޓަރ ޢަބްދުﷲ ޝާހިދު އެމެރިކާއަށް ކުރެއްވި ދަތުރުފުޅުގައި އެމެރިކާގެ ސްޓޭޓް ޑިޕާޓްމަންޓާއިއެކު ސޮއިކުރައްވާފައިވަނީ ވައިގެ ދަތުރުފަތުރުގެ ސަލާމަތްތެރިކަން އިތުރު ކުރުމާއި ގުޅޭ ފަހުމުނާމާއެއްގައެވެ.
މި ފަހުމުނާމާގައި ރާއްޖޭގެ ފަރާތުން ސޮއިކުރެއްވީ މިނިސްޓަރ ޝާހިދެވެ. އެމެރިކާގެ ފަރާތުން ފަހުމުނާމާގައި ސޮއިކުރެއްވީ އެ ޤައުމުގެ ސްޓޭޓް ޑިޕާޓްމަންޓްގެ ޕްރިންސިޕަލް ޑެޕިއުޓީ ކޯޑިނޭޓަރ އޮން ކައުންޓަރ ޓެރަރިޒަމް، އެލީނާ ރާމަނޯވްސްކީއެވެ.
ފަހުމުނާމާގައި ސޮއިކުރެއްވުމަށްފަހު މިނިސްޓަރ ޝާހިދު ވިދާޅުވީ، ޓެރަރިޒަމް އަކީ މުޅި ދުނިޔެއަށް މިހާރު ކުރިމަތިވެފައިވާ މައްސަލައެއް ކަމަށާއި، ހުރިހާ ޤައުމަކުން ގުޅިގެން މިކަމާއި ދެކޮޅަށް މަސައްކަތް ކުރުމަކީ މުހިއްމު ކަމެއް ކަމަށެވެ. ޓެރަރިޒަމާއި ދެކޮޅަށް މަސައްކަތް ކުރުމުގައި އެމެރިކާގެ އިސްނެގުމަށް ޝުކުރު އަދާކުރައްވައި، ޝާހިދު ވިދާޅުވީ، މި ދާއިރާއިން އިތުރު އެއްބސްވުންތައްވެސް އެމެރިކާ އާއި އެކު ޤާއިމް ކުރާނެ ކަމަށެވެ.
އެމެރިކާގެ ފަރާތުން ފަހުމުނާމާގައި ސޮއިކުރެއްވި އެލީނާ ވިދާޅުވީ، މިފަދަ އެއްބަސްވުންތަކުގެ މުހިއްމު ކަމަށް އަލިއަޅުއްވާލައްވާފައެވެ. އެކަމަނާ ވިދާޅުވީ މި ފަހުމުނާމާގެ ދަށުން ކުރެވޭ ކަންކަމުގެ ސަބަބުން ދިވެހިރާއްޖެއަށް ދަތުރުކުރާ ފަރާތްތަކުގެ ރައްކާތެރިކަން ކަށަވަރުކުރުމުގެ ޤާބިލްކަން އިތުރުވެގެންދާނެ ކަމަށެވެ.
ދިވެހިރާއްޖެ އާއި އެމެރިކާއާއި ދެމެދު ޤާއިމް ކުރެވުނު މި ފަހުމުނާމާގެ ދަށުން، ރާއްޖޭގައި ހުރި މި ދާއިރާގެ އެކި މުއައްސަސާތައް އިތުރަށް ހަރުދަނާކޮށް، އެތަންތަނުގައި ތިބި މުވައްޒަފުންނަށް ޒަމާނާއި ގުޅޭ ތަމްރީނުތައް ދެވޭނެއެވެ. އަދި އެފަދަ މުއައްސަސާތަކަށް ޓެރަރިޒަމް ހުއްޓުވުމަށް ޞޭނުންކުރާނެ އެކި ވަސީލަތްތައްވެސް މި ފަހުމުނާމާގެ ދަށުން ފޯރުކޮށްދިނުމަށް ވަނީ ހަމަޖެހިފައެވެ. އެގޮތުން ގޮވާތަކެތި ހޯދުމަށް ޚާއްސަ، އެކަމަށް ތަމްރީނުކޮށްފައިވާ ކުއްތާ ދިވެހިރާއްޖޭގައި ބޭނުންކުރަން ފަށާނެއެވެ. އަދި ހަމަ މިއާއިއެކު މި ފަހުމުނާމާގެ ދަށުން ރާއްޖޭގެ އެއާޕޯޓްތަކުގައި ސެކިއުރިޓީ އެޑްވައިޒަރުން ބޭތިއްބުމަށްވެސް ވަނީ އެއްބަސްވެފައެވެ.
އެމެރިކާއަށް ކުރެއްވި 2 ދުވަހުގެ ދަތުރުފުޅު ނިންމަވާލެއްވުމަށް މިނިސްޓަރ ޝާހިދު އެމެރިކާއިން ފުރާވަޑައިގެންނެވީ ބުރާސްފަތި ދުވަހުއެވެ.
