ގދ. ވާދޫގެ ދަނޑުތަކާއި ގަސްތަކުގައި އާދަޔާ ހިލާފަށް ''ފިނިހަކަ'' އާލާވަމުންދާތީ، އެކަން ކޮންޓްރޯލް ކުރުމަށް ރަށު ފެންވަރުގައި މަސައްކަތް ފަށައިފިއެވެ.

ރާއްޖެއެމްވީއަށް މައުލޫމާތު ދެއްވަމުން ވާދޫ ކައުންސިލްގެ ޒިންމާދާރުވެރިޔާ މުހައްމަދު އިބްރާހިމް ދީދީ ވިދާޅުވީ ފިހިހަކަ އިތުރުވެ، ދަނޑުތަކަށާއި، ގެތަކުގައި ހުރި ގަސްތަކަށްވެސް ބޮޑެތި ގެއްލުންތަކެއް ވަމުން އަންނަ ކަމަށެވެ.

މުހައްމަދު ވިދާޅުވީ ފިނިހަކަ ކޮންޓްރޯލް ކުރުމަށް ފިޝަރީޒް މިނިސްޓްރީންގެ އޮފިޝަލުން ސާރވޭ ކުރި ކަމަށާއި، ފިނިހަކަތައް ނައްތާލުމަށް ރަށުގެ ތެރެއަށް ދެފަހަރެއްގެ މަތިން ފަނިތަކެއް ދޫކުރި ކަމަށެވެ. ނަމަވެސް ފާއިތުވެގެންދިޔަ 8 މަސް ދުވަހުގެ ތެރޭގައި ފިނިހަލަ ކޮންޓްރޯލް ނުކުރެވި، އޭގެ އުނދަގޫ ބޮޑުވެފައިވާ ކަމަށް އޭނާ ވިދާޅުވިއެވެ.

މުހައްމަދު ވިދާޅުވީ ފިނިހަކަ ނައްތާލުމަށް މިހާރު ރަށު ފެންވަރުގައި ޚާއްސަ މަސައްކަތްތަކެއް ފަށާފައިވާ ކަމަށެވެ.  

އެގޮތުން ރަށުގައި ހުރި ސަރުކާރުގެ ހުރިހާ މުއައްސަސާތަކެއްގެ އިތުރުން ސްކޫލުން ގުޅިގެން ފިނިހަކަ ހޮވާ މުބާރާތެއް ފަށާއިފައިވާ ކަމަށް އޭނާ ވިދާޅުވިއެވެ.

މުހައްމަދު ވިދާޅުވީ ބުރާސްފަތި ދުވަހުގެ ހަވީރު 5ން ހުކުރު ދުވަހުގެ ހަވީރު 4ށް މިމުބާރާތް ކުރިއަށްދާނެ ކަމަށެވެ. ޓީމްތަކަށް ބަހާލައިގެން ކުރިއަށް ގެންދާ މިމުބާރާތުގައި އެންމެ ގިނައިން ފިނިހަކަ ހޮވާ ޓީމަކަށް 5000 ރުފިޔާ، ދެވަނައަށްދާ ޓީމަކަށް 3000 ރުފިޔާ، އަދި ތިން ވަނައަށްދާ ޓީމަކަށް 2000 ރުފިޔާ ދިނުމަށް ނިންމާފައިވާ ކަމަށް އޭނާ ވިދާޅުވިއެވެ. އަދި މިއީ ކައުންސިލުން ހިންގާ މުބާރާތެއް ކަމަށްވެސް އޭނާ ވިދާޅުވިއެވެ.

މީގެ އިތުރުން މުހައްމަދު ވިދާޅުވީ ރަށުގެ ގިނަ ރައްޔިތުން ބައިވެރިވާ މިމުބާރާތުގެ ސަބަބުން ރަށުތެރެއިން ވަރަށް ބޮޑަށް ފިނިހަކަ މަދުވާނެ ކަމަށެވެ.

ދަނޑުބިންތަކަށް ބޮޑެތި ގެއްލުންތަކެއް ވެފައިވާކަން ފާހަގަކުރައްވާ މުހައްމަދު ވިދާޅުވީ ރަމަޟާން މަހަށް ޚާއްސަކޮށް ދަނޑުބިން ހައްދާއިރު، ގިނަ މުޑުވައްތައް މިހާރުވެސް ހަލާކުވެފައިވާ ކަމަށެވެ.