އެސްޓީއޯގެ އިސް ބޭފުޅުންތަކެއް ވަޒީފާ އިން ވަކިކޮށްފި
21 ފެބުރުއަރީ 2019 | ބުރާސްފަތި 07:17ވަޒީފާއިން ވަކިކޮށްފައިވާ ގިނަ ފަރާތްތަކަކީ އެސްޓީއޯގައި ގިނަ ދުވަސްތަކެއް ވަންދެން ޚިދުމަތް ކުރައްވާފައިވާ ފަރާތްތައް
މުވައްޒިފުން ވަކިކުރަނީ ކުންފުނި ރީސްޓްރަކްޗަރ ކުރުމަށް ފަށާފައިވާ މަސައްކަތުގެ ތެރެއިން
އެސްޓީއޯގެ އާ މެނޭޖްމަންޓުން ކުންފުނި ރީސްޓްރަކްޗާ ކުރުމަށް ފަށާފައިވާ މަސައްކަތުގައި އެތަނުގައި ގިނަ ދުވަހު މަސައްކަތް ކުރެއްވި ބޭފުޅުން ވަޒީފާއިން ވަކިކޮށްފިއެވެ.
އެނގިފައިވާ ގޮތުގައި ވަކިކުރީ އެނާޖީ އެންޑް ސްޓޭޕުލް ފުޑްސް ސެކްޝަންގެ ޖެނެރަލް މެނޭޖަރު ރަމްޒީ އަބޫބަކުރާއި ޕްރޮކިއުމަންޓް ސެކްޝަންގެ ޖެނެރަލް މެނޭޖަރު މުހައްމަދު ޝުޖާއުއެވެ. އެ ދެ ބޭފުޅުން ވަކިކޮށްފައި ވަނީ އަންގާރަ ދުވަހުއެވެ.
މާކެޓިންގެ ދާއިރާއިން އިނގިރޭސިވިލާތުން ބެޗްލާޒް ޑިގްރީ ހާސިލް ކުރައްވާފައިވާ ރަމްޒީ އެސްޓީއޯގައި 12 އަހަރު ހިދުމަތް ކުރައްވާފައިވާއިރު އިނގިރޭސިވިލާތުން ޓެކްނޮލޮޖީ މެނޭޖްމަންޓްގެ ދާއިރާއިން މާސްޓާޒް ހާސިލް ކުރައްވާފައިވާ ޝުޖާއު ވަނީ އެސްޓީއޯގައި 21 އަހަރު ހިދުމަތް ކުރައްވާފައެވެ.
އެ ދެ ބޭފުޅުން ވަޒީފާއިން ވަކި ކުރުމަށް ފަހު އެސްޓީއޯ އިން މިހާރު ވަނީ އެ މަގާމުތަކަށް އެތަނުގެ މުއައްޒަފުން އައްޔަން ކޮށްފައެވެ.
އެސްޓީއޯގެ ސީނިއާ ޖެނެރަލް މެނޭޖަރަކަށް ހުންނެވި ފާތިމަތު އާޝާން ވެސް ވަނީ އެމަގާމުން އަންގާރަ ދުވަހު ވަކިކޮށްފައެވެ. އެހެން ނަމަވެސް އޭނާ ވަނީ މިފްކޯގެ ޑެޕިއުޓީ ސީއީއޯއަކަށް ހަމަޖައްސާފައެވެ.
