ކަޝްމީރުގައި ދިން ޖާނުން ފިދާވުމުގެ ބޮމުގެ ހަމަލާއާ ގުޅިގެން އިންޑިޔާ އަދި ޕާކިސްތާނުގެ ގުޅުން ގޯސްވެފައިވާ ދަނޑިވަޅެއްގައި، އިންޑިޔާގެ ޖަލެއްގައި ޕާކިސްތާނުގެ ގައިދީއަކު ގަލުން ތަޅާ މަރާލައިފިއެވެ.

އުމުރު ދުވަހުގެ ޖަލު ހުކުމެއް ތަންފީޒު ކުރަމުން ދިޔަ ގައިދީ ބުދަ ދުވަހު މަރާލާފައި ވަނީ އިންޑިޔާގެ ރާޖަސްތާނުގައި ހުރި ޖައިޕޫރުގެ ސެންޓްރަލް ޖަލުގެ ތެރޭގައެވެ. ގައިދީ މަރާލާފައި ވަނީ އެ ޖަލުގައި ހުކުމް ތަންފީޒު ކުރަމުން ދިޔަ އެހެން ގައިދީންތަކަކާ ދެމެދު ހިނގި އަރާރުންގަނޑަކަށް ފަހު ކަމަށް ރާޖަސްތާނު ފުލުހުންގެ ޑިރެކްޓަރު ޖެނެރަލް ކަޕިލް ގަރްގް ވަނީ ވިދާޅުވެފައެވެ.

ޕާކިސްތާނަށް ނިސްބަތްވާ ގައިދީ މަރާލާފައި ވަނީ، ޕާކިސްތާނާ ދެކޮޅަށް އިންޑިއާގެ އެކި ކަންކޮޅުތަކުގައި މުޒާހަރާ ކުރަމުން ދިޔަ ދަނޑިވަޅެއްގައެވެ. އަދި ކަޝްމީރު މައްސަލައިގައި ދެ ގައުމުގެ ސަރުކާރުން ވެސް ދަނީ ހޫނު ބަހުގެ ހަމަލާތަކެއް ބަދަލުކުރަމުންނެވެ.

އިންޑިއާގެ ކަޝްމީރުގެ ޕުލްވަމާ ޑިސްޓްރިކްޓްގައި ދިން ބޮމުގެ ހަމަލާގައި، އިންޑިއާ ޕެރަމިލިޓަރީ ފުލުހުންގެ 42 މީހަކު ވަނީ މަރާލާފައެވެ. ޕާކިސްތާނުގައި ހަރަކާތެރިވާ ޖައޭޝް-އީ-މުހައްމަދު ޖަމާއަތުން ވަނީ މި ހަމަލާގެ ޒިންމާ އުފުލާފައެވެ. އިންޑިއާ އިން ދަނީ މި ހަމަލާގެ ޒިންމާ ޕާކިސްތާނުގެ ސަރުކާރު ބޮލުގައި އަޅުވަމުންނެވެ. އަދި ހައްލަކީ ހަނގުރާމަ ކަމަށް ބުނެ އިންޑިއާގެ ގިނަ ބަޔަކު ދަނީ އެކަމަށް ގޮވާލަމުންނެވެ. 

މީގެ ކުރިން ވެސް ޕާކިސްތާނުގެ ޖަލެއްގައި އިންޑިޔާގެ ކުށްވެރިއަކު މަރާލި މައްސަލައިގެ ބަދަލު ހިފުމުގެ ގޮތުން، 2013 ވަނަ އަހަރު ކަޝްމީރުގެ ޖަލެއްގައި އިންޑިޔާ ގައިދީންތަކެއް ވަނީ ޕާކިސްތާނު ގައިދީއަކު މަރާލާފައެވެ.