ހިޔާނާތުގައި ބައިވެރިވި ފަރާތްތަކާއި މެދު ވަގުތުން ފިޔަވަޅު އެޅުމަށް ޓްރާންސްޕޭރޭންސީ އިން ގޮވާލައިފި
14 ފެބުރުއަރީ 2019 | ބުރާސްފަތި 12:48އެމްއެމްޕީއާރްސީގެ ހިޔާނާތުގެ ފައިސާ 155 ބޭންކް އެކައުންޓަކަށް ޖަމާވިކަން ވަނީ ހާމަކޮށްފައި
ޓްރާންސް ޕޭރެންސީ މޯލްޑިވްސް އިން ބޭއްވި ނޫސްވެރިންގެ ބައްދަލުވުމެއް
އެމްއެމްޕީއާރުސީގެ ހިޔާނާތުގައި ބައިވެރިވި ފަރާތްތަކާއި މެދު ވަގުތުން ފިޔަވަޅު އެޅުމަށް ޓްރާންސްޕޭރޭންސީ މޯލްޑިވްސް އިން ގޮވާލައިފި އެވެ.
ބުރާސްފަތި ދުވަހު ޓްރާންސްޕޭރެންސީ މޯލްޑިވްސް އިން ކޮށްފައިވާ ޓްވީޓްގައި ވަނީ ހިޔާނާތުގައި ބައިވެރިވި ފަރާތްތަކައި މެދު ސަރުކާރުގެ "ޒީރޯ ޓޮލަރެންސް ޓު ކޮރަޕްޝަން" ގެ ސިޔާސަތުގެ ދަށުން ދަށުން ސަރުކާރުން ވަގުތުން ފިޔަވަޅު އެޅުމަށް ގޮވާލާ ކަމަށެވެ.
ޓްރާންސް ޕޭރެންސީ މޯލްޑިވްސް އިން ފިޔަވަޅު އެޅުމަށް ގޮވާލާފައި މިވަނީ އެމްއެމްޕީއާރުސީގެ 1.4 ބިލިއަން ރުފިޔާގެ ބޮޑު ހިޔާނާތާ ގުޅިގެން އެންޓި ކޮރަޕްޝަން ކޮމިޝަން (އޭސީސީ) ން ހިންގި ތަހުގީގުގެ ތަފްސީލީ ރިޕޯޓް އޭސީސީ އިން ބުރާސްފަތި ދުވަހު އާންމު ކުރުމާއި ގުޅިގެންނެވެ.
ހަތް ސަތޭކަ ހަތްދިހަ ހަ ސަފްހާގެ އެ ރިޕޯޓްގައި އެމްއެމްޕީއާރުސީގެ ފައިސާ ވަން ސިޔާސީ ފަރާތްތަކާއި ވިޔަފާރިވެރިންގެ ނަންތަކާއި ތަފްސީލު ވެސް ހިމެނެ އެވެ. އެ ރިޕޯޓްގައި ފާހަގަކޮށްފައިވާ ގޮތުގައި އެމްއެމްޕީއާރުސީ އަށް ލިބެންޖެހޭ ފައިސާ ވައްދާފައިވާ އެސްއޯއެފުން ދައުލަތުގެ އެކި މަގާމުތަކުގައި ތިއްބެވި ބޭފުޅުންނާއި މަޖިލީހުގެ މެމްބަރުންނާއި ބޮޑެތި ކުންފުނިތަކަށް ފައިސާ ޖަމާކޮށްފައިވެ އެވެ.
ކޮރަޕްޝަން ހުއްޓުވުމަށް ސަރުކާރުން އިސްވެ ކުރިއަށްގެންދާ ކެމްޕެއިން "ޒީރޯ ޓޮލެރެންސް ޓު ކޮރަޕްޝަން" ގެ ދަށުން ކޮރަޕްޝަން މައްސަލަތައް ރިޕޯރޓުކުރާ ވިއުގައެއް ވަނީ ތައާރަފް ކޮށްފައެވެ.
އަންގާރަ ދުވަހު ރައީސުލް ޖުމްހޫރިއްޔާގެ އޮފީހުގައި ބޭއްވި ރަސްމިއްޔާތެއްގައި އެ ކެމްޕެއިން ފައްޓަވާފައިވާއިރު، ކޮރަޕްޝަންގެ މައްސަލަތައް ރިޕޯރޓު ކުރުމަށް ޚާއްސަ އޮންލައިން ޕޯރޓަލްއެއް ވަނީ ޤާއިމު ކޮށްފައެވެ. އެ ޕޯރޓަލް މެދުވެރިކޮށް ދައުލަތުގެ ހިންގުމުގައި ކޮރަޕްޝަނަށް މެދުވެރިވާ ގޮތަށްހުރި ކަންކަން ދެނެގަނެ ދައުލަތުގެ މުއައްސަސާތަކުގެ ނަޒާހަތްތެރިކަން ކަށަވަރު ކުރުމަށް އަމާޒުކުރެވިފައިވެއެވެ.
ޕޯރޓަލް އިފްތިތާހު ކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް އިބްރާހިމް މުހައްމަދު ސޯލިހު ވިދާޅުވީ، މައްސަލަ ހުށައަޅަނީ ކާކުކަން ބުނެދޭކަށް ނުޖެހޭ ކަމަށާއި، ދައުލަތުގެ ހުރިހާ މުވައްޒަފުންނަށް ވެސް އެ މުވައްޒަފެއްގެ އޮފީހުގައި ކޮރަޕްޝަންގެ މައްސަލައެއް އޮތް ނަމަ އެ ޕޯރޓަލް މެދުވެރިކޮށް ހުށައެޅުމަށް އިލްތިމާސްކުރައްވާ ކަމަށެވެ. އެކަމާ ގުޅިގެން ރައީސް ކުރެއްވި ޓްވީޓުގައި ވިދާޅުވީ، އަލަށް ތައާރަފްކުރި ޕޯރޓަލް މެދުވެރިކޮށް ކޮރަޕްޝަނާއި ދެކޮޅަށް ކުރަމުންގެންދަވާ މަސައްކަތްތަކަށް ކުރިއެރުމެއް ލިބޭނެ ކަމަށެވެ.
