ޔޫއެފާ ޗެމްޕިއަންސް ލީގް: ރިއަލްމެޑްރިޑަށް އިތުރު މޮޅެއް!

ޔޫއެފާ ޗެމްޕިއަންސްލީގުގައި ބުދަ ދުވަހުގެ ރޭ ކުޅުން މެޗުން ރިއަލްމެޑްރިޑް މޮޅުވެއްޖެއެވެ.

އަޖަކްސް އާއި ދެކޮޅަށް ކުޅުން މެޗު ރިއަލްމެޑްރިޑް ކާމިޔާބު ކުރީ 01- 02 ގެ ނަތީޖާ އަކުންނެވެ.

މެޗުފެށިގެން ރީތި، ވަރުގަދަ ކުޅުމެއް ދެ ޓީމުގެ ފަރާތުން ވެސް ފެނިގެން ދިޔައެވެ.

ފުރަތަމަ ހާފްގައި ދެ ޓީމަށް ވެސް ލަނޑު ޖަހާނެ ރަނގަޅު ފުރުސަތުތަކެއް ލިބި ވަނީ ބޭކާރުވެފައެވެ.

ފުރަތަމަ ހާފް ނިމުނުއިރު ދެ ޓީމުން ކުރެ އެއްވެސް ޓީމަކަށް ލަނޑެއް ނުޖެހެއެވެ.

ހާފް ނިމުނީ 0-0 ކުން ދެ ޓީމް އެއްވަރުވެގެންނެވެ.

ދެވަނަ ހާފްގައި ދެ ޓީމުގެ ވެސް ކުޅުން ރަނގަޅުކޮށް، ރަނގަޅު ހަމަލާތަކެއް އުފެއްދިއެވެ.

މެޗުގެ 60 ވަނަ މިނެޓުގައި ރިއަލްމެޑްރިޑް އެ ޓީމުގެ ފުރަތމަ ލަނޑު ކާމިޔާބުކޮށް ލީޑް ނެގިއެވެ. މި ލަނޑު އެ ޓީމަށް ކާމިޔާބު ކޮށްދިނީ ވިންސިއަސް ޖޫނިއާގެ އެހީތެރިކަމާއިއެކު ކަރިމް ބެންޒެމާއެވެ.

ރިއަލްމެޑްރިޑް ލަނޑު ޖެހިތާ މާގިނައިރުތަކެއްނުވެ އަޖެކްސުން މެޗުގެ 75 މިނެޓުގައި ޑޭވިޑް ނެރެސްގެ އެހީތެރިކަމާއިއެކު ހަކީމް ޒައިކް އެ ޓީމުގެ ފުރަތަމަ ލަނޑު ކާމިޔާބުކޮށް ނަތީޖާ ހަމަހަމަކުރިއެވެ.

މެޗުގެ ފުރިހަމަ ވަގުތު ހަމަވާން ކައިރިވިއިރު ދެ ޓީމުގެ ވެސް ކުޅުން ރަނގަޅުކޮށް ފުލުފުލުގައި ހަމަލާތައް ދެމުންދިޔައެވެ. ނަތީޖާއެއްގެ ގޮތުން ރިއަލްމެޑްރިޑް އެ ޓީމުގެ ދެވަނަ ލަނޑު ކާމިޔާބުކޮށް މެޗުގެ ލީޑް ނެގިއެވެ.

މި ލަނޑު އެ ޓީމަށް ކާމިޔާބު ކޮށްދިނީ ޑެނައިއަލް ކަރަވަޖާލްގެ އެހީތެރިކަމާއެކު ކާމިޔާބު ކޮށްދިނީ މާކޯ އެސެންސިއޯއެވެ.

މެޗުގެ ފުރިހަމަ ވަގުތު ހަމަވިއިރު ނަތީޖާއަކީ ރިއަލްމެޑްރިޑް ދޭއް، އަޖެކްސް އެކެކެވެ.