މެސެޑޯނިއާގެ ނަން ރަސްމީކޮށް ނޯތް މެސެޑޯނިއާއަށް ބަދަލުކޮށްފި
13 ފެބުރުއަރީ 2019 | ބުދަ 19:47ގައުމުގެ ނަން ނޯތް މެސެޑޯނިއާއަށް ބަދަލުކުރިކަމުގައިވީ ނަމަވެސް އެ ގައުމުގެ މީހުންނަށާއި ބަހުރުވައަށް ރައްދުކޮށް އަދިވެސް ބޭނުންކުރާނީ "މެސެޑޯނިއަން"
ނަމުގެ މައްސަލަ ހައްލުކުރަން ސޮއިކުރި ޕްރެސްޕެސް އެގްރީމެންޓް ސޮއިކުރުމުގެ ތެރެއިން
އަހަރުތަކެއް ވަންދެން ދިގުލައިގެން ގޮސްފައިވާ މެސެޑޯނިއާގެ ނަމުގެ މައްސަލަ ނިމުމަކަށް ގެނެސް، ރިޕަބްލިކް އޮފް މެސެޑޯނިއާގެ ނަން ރަސްމީކޮށް ރިޕަބްލިކް އޮފް ނޯތް މެސެޑޯނިއާއަށް ބަދަލުކޮށްފިއެވެ.
ސީއެންއެންއަށް މައުލޫމާތު ދެއްވަމުން މެސެޑޯނިއާ ސަރުކާރުގެ ތަރުޖަމާނު މައިލް ބޮޝްޖަކޯވްސްކީ ވިދާޅުވީ، އެ ގައުމުގެ ނަން ނޯތް މެސެޑޯނިއާއަށް ބަދަލުކުރިކަމުގައިވީ ނަމަވެސް އެ ގައުމުގެ މީހުންނަށާއި ބަހުރުވައަށް ރައްދުކޮށް އަދިވެސް ބޭނުންކުރާނީ "މެސެޑޯނިއަން" ކަމަށެވެ.
ނޯތް މެސެޑޯނިއާއިން 1991ވަނަ އަހަރު ޔޫގޮސްލާވިއާއިން މިނިވަންކަން އިއުލާން ކުރުމަށް ފަހު، އެ ގައުމުގެ ނަމަކަށް މެސެޑޯނިއާ ބޭނުންކުރަން ފެށުމާއި އެކު އަވަށްޓެރި ގްރީސްއާއި އެކު މައްސަލަ ބޮޑުވިއެވެ.
ނަމުގެ މައްސަލައިގައި ގްރީސްއިން ވަނީ މެސެޑޯނިއާއަށް ޔޫރަޕުގެ އިއްތިހާދާއި ނޭޓޯގެ މެމްބަރަކަށް ވުމަށް ހުރަސް އަޅާފައެވެ. ނަމަވެސް ނަމުގެ މައްސަލަ ހައްލުވުމާއި އެކު އެ ގައުމުން ވަނީ ނޯތް މެސެޑޯނިއާއަށް ނޭޓޯއަށާއި ޔޫރަޕުގެ އިއްތިހާދުގެ މެމްބަރަކަށް ވާން ހުރި ހުރަސްތައް ނައްތާލާފައެވެ.
ބަލްކަންގެ ގައުމެއް ކަމަށްވާ މެސެޑޯނިއާއަށް އެނަން ކިޔުމަށް ގްރީސްއިން ނުރުހެނީ މެސެޑޯނިއާ އާއި ގްރީސް ގުޅޭ ސަރަހައްދީ ރޮނގުގައި މެސެޑޯނިއާއާ އިންވެގެން އޮންނަ ގްރީސްގެ ސަރަހައްދަކަށް ވެސް މެސެޑޯނިއާ ކިޔާތީއެވެ. ނަމުގެ މައްސަލަ ނިމުނީ ގްރީސްއާއި މެސެޑޯނިއާގެ މެދުގައި ނުތަނަވަސްކަން އުފެދިފައި އޮންނަތާ 27 އަހަރުވެފައި ވަނިކޮށެވެ.
