ކޭން ސޭޓް މަރުވެއްޖެ
13 ފެބުރުއަރީ 2019 | ބުދަ 03:27ކޭން ސޭޓް ވަނީ ނިއުގެ ވޮލީ ޓީމު އަދި ފުޓުބޯޅަ ޓީމަށްވެސް ކުޅެފައި
ކޭން ސޭޓު
ފުޓުބޯޅަ އަދި ވޮލީ ކުޅުނު މަޝްހޫރު ވިޔަފާރިވެރިޔާ އަބްދުﷲ ޖަލީލް (ކޭން ސޭޓް) މަރުވެއްޖެއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި ކޭން ސޭޓް މަރުވީ އެތެރެހައްޓަށް ދިމާވި ސިއްހީ މައްސަލައަކަށް ކޮލަމްބޯގެ ހޮސްޕިޓަލެއްގެ އައިސީޔޫގައި ފަރުވާދެމުން ދަނިކޮށް އަންގާރަ ދުވަހުގެ ރޭގެ ވަގުތެއްގައެވެ.
ނިއުރޭޑިއަންޓް ސްޕޯޓްސް ކްލަބަށް ފޯވާޑެއްގެ ގޮތުގައި ކުޅެފައިވާ ކޭން ސޭޓް ފަހުން އައިސް އުޅުނީ ބޮޑަށް ވިޔަފާރީގެ ތެރޭގައެވެ. އެގޮތުން އޭނާ ވަނީ ފުޓުބޯޅައިގެ އިތުރުން ގިނަ ކުޅިވަރުތަކަށް ހަރަދުކޮށްފައިވާ އެވެ.
މިދިޔަ އަހަރު ކޭން ސޭޓުގެ މޫނަށް ޕެޕާ ސްޕްރޭ ޖަހައި ހަމަލާދީ، ގިނަ އަދަދެއްގެ ފައިސާތަކެއް ބަޔަކު ފޭރުނު މައްސަލައެއް ފުލުހުން ވަނީ ބަލާފައެވެ. އޭނާއަށް ހަމަލާދިނީ ފައިސާތަކާއެކު ގެއަށް ވަންނަނިކޮށެވެ.
