އާސެނަލްގެ މިޑްފިލްޑަރ އާރޮން ރަމްސޭ އިންޓަލީގެ ޔުވެންޓަސް އަށް ސޮއިކޮށްފިއެވެ.

ރިޕޯޓްތައް ބުނާ ގޮތުގައި 28 އަހަރުގެ ރަމްސޭ ހަތަރު އަހަރުގެ އެއްބަސްވުމެއްގައި ޔުވެންޓަސް އަށް ސޮއިކުރީ ހަފްތާއަކަށް ހަތަރު ލައްކަ ޔޫރޯއަށެވެ.

އާސެނަލްއާ އެއްކޮށް ރަމްސޭ ހަދާފައިވާ އެއްބަސްވުން 30 ޖޫންގައި ހަމަވާއިރު، ރަމްސޭއަކީ މިހާތަނަށް އެންމެ ބޮޑު އަގުގައި ޓީމަކަށް ގެންދެވޭ ވޭލްސް ކުޅުންތެރިޔާއެވެ.

އާސެނަލް އަށް ރަމްސޭ ކުޅެންފެށީ 2008 އަހަރުއެވެ. އޭނާ އާސެނަލް އަށް ކުޅެމުން ދަނީ 4.8 މިލިއަން ޔޫރޯއަށެވެ. ކާޑިފް ސިޓީން އާސެނަލް އަށް ބަދަލުވި ރަމްސޭއަށް މީގެ ކުރިން ބާސެލޯނާ އަދި ޕީއެސްޖީ އިން ޝައުގުވެރިކަން ފާޅުކޮށްފައި ވެއެވެ.

އާސެނަލްގެ ކޯޗް، އުނާއީ އެމެރީ ވަނީ ޔުވެންޓަސްގެ އަގަށް ފާޑު ކިޔާފައެވެ. އޭނާ ބުނި ގޮތުގައި ރަމްސޭ ފަދަ ކުޅުންތެރިޔަކީ 30-40 މިލިއަނާ ދެމެދުގެ އަގަކަށް ގެންދާވަރުގެ ކުޅުންތެރިއެކެވެ.

ރަމްސޭ ވަނީ އޭނާއަށް ސަޕޯޓަރުން ދޭ ހިތްވަރަށް ޝުކުރު އަދާ ކޮށްފައެވެ. އަދި އޭނާގެ ކުރިއެރުމުގެ ފަހަތުގައި ތިބީ އާސެނަލް ކޯޗާއި، ސަޕޯޓަރުން އަދި މެނޭޖްމެންޓް ކަމަށް ވެސް އޭނާ ބުނެއެވެ.

ޔުވެންޓަސް އަށް ރަމްސޭ ސޮއިކުރި މި ދަނޑިވަޅަކީ ކުރީގެ އާސެނަލްގެ ސްޓްރައިކަރު ކްރިސް ސަޓަން އާސެނަލުން ކުޅުންތެރިންގެ އަގު ވަޒަން ނުކުރާ ކަމަށް ބުނެފައިވާ ދަނޑިވަޅެކެވެ.

އާސެނަލްގައި ރަމްސޭ ހޭދަ ކުރި 11 ސީޒަންގެ ތެރޭގައި 259 މެޗު އާސެނަލްއަށް ކުޅެދީފައިވާއިރު، 61 ލަނޑު ޖަހައިދީފައި ވެއެވެ.