ކުރިއަށް އޮތް ރައްޔިތުން މަޖިލީހުގެ އިންތިހާބުގައި އަދާލަތު ޕާޓީ އަށް ގޮނޑި ދޫކޮށްލުމާ މެދު ގޮތެއް ނިންމާނީ އެ ދާއިރާތަކަށް ކުރިމަތިލާފައިވާ އެ ޕާޓީގެ ކެންޑިޑޭޓުން ކަމަށް އެމްޑީޕީން ބުނެފިއެވެ.

އެމްޑީޕީ ހަރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްޑީޕީގެ ސެކެޓްރީ ޖެނެރަލް އަފްޝަން ލަތީފް ވިދާޅުވީ ޕާޓީގެ ގައުމީ މަޖިލީހުގެ ރޫހަކީ ރައްޔިތުންގެ މަޖިލީހުގެ އިންތިޚާބުގައި އަދާލަތާ އެކު ކުރިއަށް ދިއުން ކަމަށެވެ. ނަމަވެސް އެ ކަމުގައި ވަކި ގޮތެއް ނިންމާނީ އެ ދާއިރާތަކައް ކުރިމަތިލާފައިވާ އެ ޕާޓީގެ ކެންޑިޑޭޓުން ކަމަށާއި، ޕާޓީން އެ ކަމުގައި އެއްވެސް ކެންޑިޑޭޓަކަށް ޕްރެޝަރު ނުކުރާނެ ކަމަށް އަފްޝަން ވިދާޅުވިއެވެ.

އަފްޝަން ވިދާޅުވީ އެމްޑީޕީންގެ ޓިކެޓްގައި ވާދަކުރާ 86 ދާއިރާގެ ކެންޑިޑޭޓުންގެ ފޯމް އިލެކްޝަންސް ކޮމިޝަނަށް ހުށަހަޅާފައިވާ ކަމަށާއި ނަމަވެސް އަދާލަތު ޕާޓީއަށް ދާއިރާއެއް ދޫކޮށްލަން ބޭނުންވާ ކެންޑިޑޭޓުންނަށް އެ ފުރުސަތު އެބައޮތް ކަމަށެވެ. އެމްޑީޕީން ބުނީ އަދާލަތު ޕާޓީއަށް ދާއިރާއެއް ދޫކޮށްލެވޭނީ އެމްޑީޕީގެ ޓިކެޓް ލިބިފައިވާ ކެންޑިޑޭޓާ ވާހަކަ ދެކެވި އެއްބަސްވުމަށް އާދެވިއްޖެ ނަމަ ކަމަށެވެ. 

"އަޅުގަޑުމެން އެ ޑިޒިޝަން ދޫކޮއްލާފައި އޮތީ ކެންޑިޑޭޓުން ނިންމަވާ ގޮތަކަށް. އަދި އެ ބޭފުޅުންގެ ކެމްޕޭން މެނޭޖަރުންނާއި، އެބޭފުޅުންގެ ދާއިރާތަކުގެ ރައްޔިތުންނާއި މަޝްވަރާކުރުމަށްފަހު، ނިންމަވާ ގޮތަކަށް ޕާޓީން އިހްތިރާމް ކުރާނެ" އަފްޝަން ވިދާޅުވިއެވެ.  

ރައްޔިތުންގެ މަޖިލީހުގެ އިންތިހާބު އަންނަ އޭޕްރީލް މަހުގެ ހަ ވަނަ ދުވަހު ބޭއްވުމަށް ނިންމާފައިވާއިރު، 87 ދާއިރާއަކަށް ކުރިމަތިލުމުގެ ފުރުސަތު އިލެކްޝަންސް ކޮމިޝަނުން ވަނީ ހުޅުވާލާފައެވެ. ކެންޑިޑޭޓަކަށް ވުމަށް އެދޭ ފޯމް ހުށަހަޅަންޖެހޭ ފަހު ތާރީހަކީ މި މަހުގެ 21 ވަނަ ދުވަހެވެ. 

"އެޖެންޑާ 19" ގެ ނަމުގައި އެމްޑީޕީން މަޖިލިސް ކެމްޕެއިން ފަށާފައިވާއިރު، އަފްޝަން ވިދާޅުވީ ކެމްޕެއިން ކަންތައް ވަރަށް ފޯރިއާ އެކު ކުރިއަށްދާ ކަމަށެވެ. އެގޮތުން ހޮނިހިރު ދުވަހު މުޅި ރާއްޖޭގައި ބޭއްވި ޕޯސްޓަރު ތަތްކުރުމުގެ ހަރަކާތް ވެސް ވަރަށް ކާމިޔާބު ކަމަށެވެ.

މީގެ އިތުރުން 19 ވަނަ ރައްޔިތުންގެ މަޖިލީހުގެ އިންތިޚާބަށް ތައްޔާރުވުމުގެ ގޮތުން ގިނަ ކެމްޕެއިން ވޯރކްޝޮޕްތައް އެ ޕާޓިން ބާއްވަމުން އަންނަކަން އަފްޝަން ފާހަގަކުރެއްވިއެވެ. މާލޭގައި ހަރަކާތްތެރިވަމުން އަންނަ ކެމްޕޭން ޓީމްތަކަށް އަމާޒުކޮށްގެން މިހާތަނަށް ތިން ވޯރކްޝޮޕް ބާއްވާފައިވާކަން އަފްޝަން ފާހަގަކުރެއްވިއެވެ. އަފްޝަން ވިދާޅުވީ މި ވޯރކްޝޮޕްތަކުގެ ބޭނުމަކީ ކެންޑިޑޭޓުންނާއި، ކެމްޕޭން މެނޭޖަރުންނާއި، އަދި ރައްޔިތުން އެ ޕާޓީގެ ލެޖިސްލޭޓިވް އެޖެންޑާތަކައް އަހުލުވެރިކުރުވުން ކަމަށެވެ.

"މި ވޯރކްޝޮޕްތަކުގެ ބޭނުމަކީ އަޅުގަނޑުމެން އެކުލަވާލާފައިވާ ލެޖިސްލޭޝަން ކޮންސެޕްޓްތަކާ މެދު މަޝްވަރާކޮށް އެކަމަށް އެންމެން އަހުލުވެރިކުރުވުން ކަމަށް" އަފްޝަން ވިދާޅުވިއެވެ.          

މީގެ އިތުރުން ކުރިއަށް އޮތް ދުވަސްތަކުގައި ރާއްޖޭގެ އެކި ސަރަހައްދުތަކުގައި ވެސް މި ފަދަ ވޯކް ޝޮފްތައް ކުރިއަށް ގެންދާނެ ކަމަށް އަފްޝަން ވިދާޅުވިއެވެ. މިހާތަނަށް ވޯކްޝޮޕް ބާއްވާފައިވަނީ ހދ. ވައިކަރަދޫ، އދ. މަހިބަދޫ، އދ. މާމިގިލި، ވ. ތިނަދޫގައެވެ. ކުރިއަށް އޮތް ދުވަސްތަކުގައި އިތުރު ރަށްރަށުގައި ވެސް ވޯރކްޝޮޕް ކުރިއަށް ގެންދާނެ ކަމަށް އަފްޝަން ވިދާޅުވިއެވެ.