މަގަށް ސަމާލުކަންދީ ރައްކާތެރި ސްޕީޑްގައި ދުއްވުމަށް ޓްރާންސްޕޯރޓް މިނިސްޓްރީން އިލްތިމާސްކޮށްފި
9 ފެބުރުއަރީ 2019 | ހޮނިހިރު 09:37ރާއްޖޭގެ އެކި ހިސާބުތަކުގައި މި އަހަރު މިހާތަނަށް ވަނީ ނުރައްކާތެރި ގިނަ އެކްސިޑެންޓްތަކެއް ހިނގާފައި
އެކްސިޑެންޓްތައް މަދުކުރުމަށް ޓްރާންސްޕޯރޓް މިނިސްޓްރީން ވަނީ ގިނަ ކަންތައްތަކެއް ކުރުމަށް ރާވާފައި
މަގަށް ސަމާލުކަންދީ ރައްކާތެރި ސްޕީޑްގައި ދުއްވާ އެއްޗެހި ދުއްވުމަށް ޓްރާންސްޕޯރޓް މިނިސްޓްރީން އިލްތިމާސްކޮށްފިއެވެ.
ޓްރާންސްޕޯރޓް މިނިސްޓްރީން މިފަދައިން ބުނެފައިވަނީ މާލޭ އާއި ރާއްޖޭގެ އެކި ހިސާބުތަކުގައި ހިނގާ ނުރައްކާތެރި އެކްސިޑެންޓްތައް ގިނަވުމާ ގުޅިގެންނެވެ. އެ ގޮތުން އައްޑޫ ސިޓީގައި ހުކުރުދުވަހު ހިނގި އެކްސިޑެންޓެއްގައި، ބޮލަށް އަނިޔާވި ހަ އަހަރުގެ ކުއްޖަކު އެމަޖެންސީގައި ވަނީ މިއަދު މާލެ ގެނެސްފައިވާއިރު، ރޭ ދަންވަރު މާލޭގައި ސައިކަލު ރޭސް ޖަހަން އުޅުނު ދެ ކުޑަކުއްޖަކު އެކްސިޑެންޓްވެ ވަރަށް ބޮޑަށް ވަނީ އަނިޔާވެފައެވެ. ފުލުހުން ބުނެފައި ވަނީ އެކްސިޑެންޓް ހިނގަން ދިމާވީ 16 އަހަރުގެ ދެ ފިރިހެން ކުއްޖަކު ދުއްވާފައި ދިޔަ ސައިކަލު އެހެން ސައިކަލެއް އޯވާޓޭކް ކުރަން އުޅެނިކޮށް ކޮންޓްރޯލް ނުވެ ޕާކުކޮށްފައި އޮތް ކާރެއްގައި ޖެހުމުން ކަމަށެވެ.
މާލެ އާއި ރާއްޖޭގެ އެކި ހިސާބުތަކުގައި ނުރައްކާތެރި އެކްސިޑެންޑްތައް ހިގަމުންދާތީވެ، ޓްރާންސްޕޯރޓް މިނިސްޓްރީން ހޮނިހިރު ދުވަހު ކޮށްފައިވާ ޓުވީޓެއްގައި ބުނެފައި ވަނީ މަގަށް ސަމާލުކަންދީ ރައްކާތެރި ސްޕީޑްގައި ދުއްވަން ސަމާލުކަން ދެއްވުމަށެވެ. މީގެ އިތުރުން ސީޓް ބެލްޓް، ހެލްމެޓް އަދި ކުޑަކުންދިން ކާރުގައި ގެންދާ ނަމަ ނޫނީ ސައިކަލްގައި ގެންދާ ނަމަ "ހާރނަސް" ބެލްޓް ބޭނުން ކުރުމަށް ސަމާލުކަންދިނުމަށް ޓްރާންސްޕޯރޓް މިނިސްޓްރީން ވަނީ އެދިފައެވެ.
އެކްސިޑެންޓްތައް މަދުކުރުމުގެ ގޮތުން މާލެއާ ހުޅުލެއާ ދެމެދު އަޅާފައިވާ ސިނަމާލެ ބްރިޖު ހުރަސްކުރާ ދެ ފުރޮޅުލީ އުޅަނދު ތަކުގައި ދަތުރުކުރާ ފަރާތްތައް ހެލްމެޓް ބޭނުން ކުރުމަށް ޓްރާންސްޕޯޓް އޮތޯރިޓީން ވަނީ މިދިޔަ އަހަރު އިލްތިމާސްކޮށްފިއެވެ. އަދި މާރޗް މަހުގެ 10 ވަނަ ދުވަހު ސިނަމާލެ ބްރިޖުން ދަތުރުކުރާ ފަރާތްތައް ހެލްމެޓް އަޅަން މަޖުބޫރު ކަމަށް އެ އޮތޯރިޓީން ވަނީ ބުނެފައެވެ.
ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވެފައި މާޗް 10 ވަނަ ދުވަހުން ފެށިގެން ހެލްމެޓް ނާޅާ ބްރިޖް ހުރަސްކޮށް ދަތުރުކުރާ ފަރާތްތަކާ މެދު ގާނޫނީ ގޮތުން ފިޔަވަޅު އަޅަމުންދާނެ ކަމަށެވެ. އަދި އެ ބަދަލަކީ އާއްމުންގެ ސަލާމަތާއި ރައްކާތެރި ކަމަށް ވިސްނާފައި ގެންނެވި ބަދަލެއް ކަމަށް މިނިސްޓަރު ފާހަގަކުރެއްވިއެވެ.
މި ސަރުކާރުން ފުރަތަމަ 100 ދުވަހުގެ ތެރޭގައި ކުރަން ނިންމާފައިވާކަންކަމުގެ ތެރޭގައި 5،000 ހެލްމެޓް ބަހަން ވަނީ ނިންމާފައެވެ.
