ނައިބް ރައީސް ގއ. ވިލިނގިލި ކައުންސިލް މެންބަރުންނާއި ބައްދަލުކުރައްވައިފި
9 ފެބުރުއަރީ 2019 | ހޮނިހިރު 03:02ކައުންސިލު މެންބަރުން އެންމެ ބޮޑަށް ފާހަގަކޮށްފައިވަނީ ދަތުރުފަރުތުގެ ނިޒާމު މިހާރަށްވުރެ ތަރައްޤީ ކުރަން ބޭނުންވާ ވާހަކަ
ނައިބު ރައީސް ފައިސަލް ނަސީމް
ރައީސުލްޖުމްހޫރިއްޔާގެ ނައިބު ފައިޞަލް ނަސީމް، ހުވަދުއަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި ހުވަދުއަތޮޅު އުތުރުބުރީ ވިލިނގިއްޔަށް ވަޑައިގެން އެ ރަށުގެ ކައުންސިލްގެ މެންބަރުންނާއި ބައްދަލުކުރައްވައިފިއެވެ.
ހުކުރު ދުވަހުގެ ރޭ ވިލިގިނލި ކައުންސިލް އިދާރާގައި ބޭއްވި މި ބައްދަލުވުމުގައި ކައުންސިލުން ރަށުގެ ތަރައްޤީއަށް ރާވާފައިވާ މަސައްކަތްތަކާއި މިހާރު ކުރިއަށްދާ މަސައްކަތްތަކާއި ރަށަށް ބޭނުންވެފައި ހުރި ކަންކަމުގެ މަޢުލޫމާތާއި ރަށް ކުރިއެރުވުމުގައި ދިމާވާ ދަތިތައް ވަނީ ނައިބް ރައީސާއި ހިއްސާކުރައްވާފައެވެ.
އެގޮތުން ކައުންސިލު މެންބަރުން އެންމެ ބޮޑަށް ފާހަގަކޮށްފައިވަނީ ދަތުރުފަރުތުގެ ނިޒާމު މިހާރަށްވުރެ ތަރައްޤީ ކުރަން ބޭނުންވާ ވާހަކައެވެ. އެގޮތުން މެންބަރުން ވަނީ ރަށުގެ ބަނދަރުގެ ހާލަތު ރަނގަޅުކޮށް، އެއާޕޯޓެއް އޮތުމުގެ މުހިންމުކަން ފާހަގަކުރެއްވުމުގެ އިތުރުން ކައުންސިލުން ވަނީ ކަރަންޓުގެ ހިދުމަތް ދިނުމުގައި ކުރިމަތިވާ ދަތިތައް ނައިބް ރައީސް ފައިސަލް ނަސީމްއާ ހިއްސާކުރައްވާފައެވެ.
މީގެއުތުރުން މިބައްދަލުވުމުގައި ކައުންސިލުގެ މެންބަރުން ވަނީ އެރަށުގައި އަލަށް އާބަދު ކޮށްފައިވާ ސަރަހައްދުގައި ނަރުދަމާގެ ނިޒާމު ޤާއިމުކޮށްފައި ނެތުމުގެ ސަބަބުން ކުރިމަތިވާ ގޮންޖެހުންތައް ޙިއްޞާކުރައްވައިފައެވެ. އަދި އިޖްތިމާޢީ ގޮތުން ކުރިމަތިވާ އެކިއެކި ގޮންޖެހުންތަކުގެ މަޢުލޫމާތުވެސް މެންބަރުން ވަނީ ޙިއްޞާކުރައްވައިފައެވެ.
މިކަމާއި ގުޅިގެން ނައިބް ރައީސް ވިދާޅުވީ ވިލިނގިލި ކައުންސިލުން އެދިވަޑައިގެންފައިވާ ކަންކަމުގައި ކަމާގުޅޭ މިނިސްޓްރީތަކާއެކު މަޝްވަރާކުރެއްވުމަށްފަހު އެކަންކަމަށް ހާއްސަ ސަމާލުކަމެއްދެއްވައިގެން ޙައްލެއް ހޯދަން މަސަތްކަތް ކުރައްވާނެކަމަށެވެ.
