ހދ. ނެއްލައިދޫ ބަނދަރު ފުން ކުރި ނަމަވެސް ދާއިމީ ހައްލެއް ނުލިބޭނެ ކަމަށް އެރަށުގެ ކައުންސިލުން ބުނެފިއެވެ.

މީގެ ތިން އަހަރު ކުރިން ހަދައި ނިންމި އެރަށުގެ ބަނދަށް ވެލި ވަދެ، މިހާރު ވަނީ ތުނޑިއެއް އުފެދިފަ އެވެ. ބަނދަރެއް އޮތަސް ލަފާފުރުމުގެ ފުރިހަމަ ފަސޭހަ ކަމެއް ނުލިބެ އެވެ. 

އެރަށު ކައުންސިލުގެ ނައިބް ރައީސް މުހައްމަދު އިލްހާމް ވިދާޅުވީ ބަނދަރު ފުން ކުރުމުގެ މަސައްކަތް ޕަބްލިކް ވޯކްސްއިން ދެ ދުވަހު ކުރި ކަމަށާއި، ނަމަވެސް މަސައްކަތާއި ހަވާލުވެ ހުންނެވި ސުޕަވައިޒަރު މާލެ އައުމާއި ގުޅިގެން މަސައްކަތް ހުއްޓިފައިވާ ކަމަށެވެ.

މަސައްކަތް ދެން ފެށޭނީ ސައިޓްއާ ހަވާލުވުމަށް އިތުރު ސްޕައިވަޒަރެއް އައުމުން ކަމަށް މައުލޫމާތު ލިބޭ ކަމަށް އޭނާ ވިދާޅުވިއެވެ.

އިލްހާމް ވިދާޅުވީ އެރަށުގެ އިރުމަތި ފަރާތުގައި ބަނދަރު ހަދާފައި އޮތްއިރު ބަނދަރަށް ވެލި ޖަމާވާން ފެށީ މިދިޔަ އަހަރު ކަމަށާއި، ކަމާ ބެހޭ މުއައްސަސާތަކުގެ ސަމާލުކަމަށް ގެނައި ނަމަވެސް އެއްބާރުލުން އެކަށީގެންވާ ގޮތުގައި ނުލިބޭ ކަމަށެވެ.

އިލްހާމް ވިދާޅުވީ އެރަށަކީ މަސްވެރިކަމުގެ ޚާއްސަ ރަށަކަށްވާއިރު، ގިނަ އަދަދެއްގެ ދޯނިތަކާއި، ކުދި ޑިންގީތައް ހުންނަ ކަމަށެވެ. ކޮންމެ ދުވަހަކު ވެސް ގާތްގަނޑަށް 15 އުޅަނދު މަހަށް ނުކުންނަ ކަމަށް އޭނާ ވިދާޅުވިއެވެ. އޭނާ ވިދާޅުވީ ބަނދަރުގައި އޮޑިފަހަރު އެޅުމަށް ބޭނުންވާ ޖާގަ ނެތް ކަމަށާއި، އެއީ ރައްޔިތުންގެ ބޮޑު ކަންބޮޑުވުމެއް ކަމަށެވެ. އަދި އެއްދޯނި އަނެއް ދޯންޏާއި ޖެހި ބައެއް ގެއްލުންތައް ވަމުންދާ ކަމަށް ވެސް އޭނާ ވިދާޅުވިއެވެ.

"އިތުރު 400 ފޫޓަށް ބަނދަރު ބޮޑު ކުރަންޖެހޭ،" އޭނާ ވިދާޅުވި އެވެ. 

އެ ރަށުގައި މިހާރު އޮތް ބަނދަރުގެ ދިގުމިނުގައި 400 ފޫޓު އަދި ފުޅާމިނުގައި 200 ފޫޓު ހުރެ އެވެ.