ރާއްޖޭގެ ޝަރުއީ ދާއިރާ އިސްލާހު ކުރުމަކީ މިހާރުން މިހާރަށް ކުރަންޖެހިފައިވާ އެންމެ މުހިއްމު އެއް ކަންތައްކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ. 

ރައީސް ސޯލިހު ބުރާސްފަތި ދުވަހު ދަރުބާރުގޭގައި ދެއްވި ރިޔާސީ ބަޔާނުގައި ވިދާޅުވީ، ރައްޔިތުންގެ ޙައްޤުތަށް ކަށަވަރު ކޮށްދެއްވައި އަދުލު އިންސާފު ޤާއިމުކޮށްދިނުމަށްޓަކައި ޝަރުއީ ނިޒާމް އިސްލާހު ކުރުމަކީ ކޮންމެހެންވެސް ކުރަންޖެހިފައިވާ ކަމެއް ކަމަށެވެ. 

"ރައްޔިތުންގެ ޙައްޤުތައް ކަށަވަރުކޮށްދީ، ޢަދުލު އިންޞާފު ލިބޭނެކަން ޔަޤީންކޮށްދިނުމަށްޓަކައި، ޝަރުޢީ ދާއިރާ އިޞްލާޙް ކުރުމަކީ މިހާރުން މިހާރަށް ކުރަންޖެހިފައިވާ އެންމެ މުހިންމު އެއް ކަންތައް. ކޯޓުތަކާއި ފަނޑިޔާރުން އިޞްލާޙުގެ މަގަށް ރުޖޫޢަވެގެން ނޫނީ، މިޤައުމުގެ އެއްވެސް ކަމަކަށް ހަމަޖެހުމެއް ނާންނާނެ." ރައީސް ސޯލިހު ވިދާޅުވިއެވެ. 

ޑިމޮކްރަޓިކް ނިޒާމަށް ޤައުމު އަނބުރާ ގެންދިއުމަށްޓަކައި ސަރުކާރުގެ އިދާރީ އޮނިގަނޑަށް ގެންނަން ޖެހޭ އިސްލާހީ ބަދަލުތައް ވަރަށް ގިނަ ކަމަށްވެސް ރައީސް ވިދާޅުވިއެވެ. 

" ޑިމޮކްރެޓިކް ނިޒާމަށް ދައުލަތް އަނބުރާ ގެނައުމަށްޓަކައި، ސަރުކާރުގެ އިދާރީ އޮނިގަނޑަށް ގެންނަންޖެހޭ އިޞްލާޙީ ބަދަލުތައް ވަރަށް ގިނަ. މިދިޔަ ހަތަރު އަހަރުގެ ތެރޭގައި މި ޢިއްޒަތްތެރި މަޖިލިސްވެސް އޮތީ، ޤާނޫނުއަސާސީން މި މަޖިލީހާ ޙަވާލުކޮށްފައިވާ ޒިންމާތައް އަދާކުރިޔަނުދީ، ކަސްތޮޅު އަޅުވާފައި. އެހެންކަމުން، ދުސްތޫރީ ނިޒާމުގެ ރޫފަ ހެޔޮކުރުމަށްޓަކައި، ރައްޔިތުންގެ މަޖިލީހުގެ ހިންގުން މިހާރަށްވުރެ ހަރުދަނާ ކުރަންޖެހޭ." ރައީސް ވިދާޅުވިއެވެ.

ރައީސް އެހެން ވިދާޅުވެފައިވާއިރު، ރާްއްޖޭގެ ޝަރުއީ ނިޒާމު އިސްލާހުކޮށް ދައުލަތުގެ ހިންގުން ހަރުދަނާ ކުރުމަށް 19 ވަނަ ރައްޔިތުންގެ މަޖިލީހަށް ބޮޑެތި ބަދަލުތަކެއް ގެނައުމަށް ގިނަ ބަޔަކު ދަނީ ގޮވާލަމުންނެވެ. 

އެގޮތުން ވެރިކަން ކުރާ ޕާޓީ, އެމްޑީޕީން 19 ވަނަ މަޖިލީހަށް ހުށައަޅަން ނިންމާފައިވާ ޝަރުއީ ދާއިރާ އިސްލާހު ކުރުމުގެ އެޖެންޑާގައި ޝަރުއީ ދާއިރާ އިސްލާހު ކުރުމަށް ބޮޑެތި ބަދަލުތަކެއް ގެނައުމަށް ވަނީ ނިންމަވާފައެވެ. އޭގައިވާގޮތުން އަމިއްލަ އިސްނެގުމަށް ސުޕްރީމް ކޯޓުން މައްސަލަ ނުބެލުމާއި، ހައި ކޯޓުގެ އުތުރު އަދި ދެކުނު ގޮފި އުވާލުމާއި، ސުޕްރީމް ކޯޓުން ހުޅުވާލައިގެން އަޑުއެހުމެއް ނުބާއްވައި، އަމުރު ނުނެރުމުގެ އިތުރުން ކޯޓުތަކުން ބަލާ މައްސަލަތަކުގެ ފައިލްތައް ސުޕްރީމް ކޯޓަށް ނެގުން ހުއްޓާލުމާއި، ކޯޓުތަކަށް ސުޕްރީމް ކޯޓުން ލަފަޔާއި އިރުޝާދު ދިނުން ހުއްޓާލުން ފަދަ ކަންކަން ހިމެނެއެވެ.