މިހާރު ކުރިއަށްދާ ރިޔާސީ ދައުރު ފުރަހަމަ ކުރުމަށްފަހުވެސް މިޞްރުގެ ރައީސް ޢަބްދުލް ފައްތާހު އަލް ސިސީއަށް މަޤާމުގައި ދެމިހުރުމަށް މަގުފަހިވާހެން އެ ޤައުމުގެ ޤާނޫނު އަސާސީއަށް ގެންނަން މަސައްކަތް ކުރަމުންދާ އިސްލާހާ ދެކޮޅަށް އެޤައުމުގެ އިދިކޮޅު ފަރާތްތައް އެއްގަލަކަށް އަރައިފިއެވެ.
މިހާރު ކުރިއަށްދާ ރިޔާސީ ދައުރު 2022 ވަނަ އަހަރު ނިމޭއިރު، އެ މުއްދަތުގެ ފަހުންވެސް ސީސީއަށް ވެރިކަމުގައި ދެމިހުރެވޭ ގޮތަށް ގެންނަން އުޅޭ މި އިސްލާހު އެ ޤައުމުގެ ޤާނޫނު ހަދާ މަޖިލީހަށް ބަލައިގެންފައި ވީނަމަވެސް، މި އިސްލާހު ފާސްވާނީ ރައްޔިތުންގެ ވޯޓަކަސް ގޮސްގެންނެވެ.
މިޞްރުގެ ކަރަމާ ޕާޓީގެ ލީޑަރޝިޕްގައި ހިމެނިވަޑައިގަންނަވާ އަބްދުލް އަޒީޒް އަލް ހުސެއިނީ ބުދަދުވަހު މީޑިއާއަށް މައުލޫމާތު ދެއްވަމުން ވިދާޅުވީ، އަންގާރަ ދުވަހު ޤާނޫނު ހަދާ މަޖިލީހުގައި ހިމެނޭ 11 ޕާޓީއަކުން ބައްދަލުވެ، ހުށަހަޅާފައިވާ އިސްލާހާއި ދެކޮޅަށް އެއްގަލަކަށް އަރާފައިވާ ކަމަށެވެ.
އޭނާ ވިދާޅުވެފައިވަނީ އެކި ފިކުރުގެ ޕާޓީތައް ހިމެނޭ މި ކޯލިޝަނުން "ޤާނޫނު އަސާސީގެ ދިފާޢުގައި މަސައްކަތްކުރާ ޔޫނިއަން" ގެ ނަމުގައި ކޯލިޝަނެއް އުފައްދަން ނިންމާފައިވާ ކަމަށެވެ.
