ސައުދީ އަރަބިއްޔާ އިން އިސްނަގައިގެން ގަތަރާ ދެކޮޅަށް އަވައްޓެރި ގައުމުތަކާ ގުޅިގެން އަޅާފައި ދަތިކުރުމުގެ ފިޔަވަޅުއް އުވާލުމަށް ގަތަރުން ފުރިހަމަ ކުރަންޖެހޭ ޝަރުތަކާ މެދު އެ ގައުމުން ގޮތެއް ނިންމުމަށް ދީފައިވާ ސުންގަޑި އާދިއްތަ ދުވަހުގެ ރެއަށް ހަމަވާނެއެވެ.

ސައުދީ އަރަބިއްޔާ، ބަހްރޭން، ޔޫއޭއީ އަދި މިސްރުން ބުނެފައިވަނީ 13 ޝަރުތު ގަތަރުން 10 ދުވަހުގެ ތެރޭގައި ފުރިހަމަ ކުރުމުން ނޫނީ އިގްތިސާދީ ގޮތުންނާއި ޑިޕްލޮމެޓިކް ގޮތުން ގަތަރަށް ކުރިމަތި ކޮށްފައިވާ ފިއްތުންތައް ނައްތާނުލާނެ ކަމަށެވެ.

ގަތަރަށް ކުރިމަތި ކުރުވާފައިވާ ޝަރުތުތަކަށް އެއްބަސް ނުވެއްޖެނަމަ ދަތިކުރުމުގެ އިތުރު ފިޔަވަޅުތަކާ ގަތަރަށް ކުރިމަތިލާން ޖެހުމަކީ އެކަށީގެންވާ ކަމެއް ކަމަށް މަސްރަހް ދިރާސާ ކުރާ ފަރާތްތަކުން ބުނެއެވެ.

ގަތަރުގެ ޚާރިޖީ ވަޒީރު ޝެއިޚް މުހައްމަދު ބިން އަބްދުއްރަހްމާން އައްތާނީ ރޯމްގައި ނޫސްވެރިންނާ ބައްދަލު ކުރައްވާ ވިދާޅުވީ މި ޝަރުތަކަކީ ހުށަހެޅި އިރުވެސް ގަބޫލު ކުރެވޭ ފަދަ ޝަރުތަކެއް ނޫން ކަމަށާއި، މިއީ ޓެރަރިޒަމްއާ ދެކޮޅަށް މަސައްކަތް ކުރުމުގެ ބަދަލުގައި ގަތަރުގެ އިސްތިގްލާލަށް އަރައި ގަތުމަށް ހުށަހެޅި ޝަރުތުތަކެއް ކަމަށެވެ. ނަމަވެސް އޭނާ ވިދާޅުވީ ޝަރުތުތައް ހުށަހެޅި ގައުމުތަކުން ކަންބޮޑުވާ ކަންކަމާ މެދު މަޝްވަރާ ކުރަން ގަތަރުން ތައްޔާރަށް އޮތް ކަމަށެވެ.

ގަތަރުގެ ޚާރިޖީ ވަޒީރު ވިދާޅުވީ، އެއްވެސް ފަރާތަކަށް މިނިވަން ގައުމަކަށް އެ ގޮތައް ސުންގަޑި ކަނޑަނޭޅޭނެ ކަމަށެވެ.

އެމެރިކާގެ ޚާރިޖީ ވަޒީރު މި މައްސަލައިގައި ކުރިން ވިދާޅުވެފައިވަނީ، ބައެއް ޝަރުތުތައް ތަންފީޒް ކުރަން ގަތަރަށް ވަރަށް ބޮޑަށް ދަތިވާނެ ކަމަށް ގަބޫލުފުޅު ކުރެއްވޭ ކަމަށާއި ނަމަވެސް މަޝްވަރާގެ މޭޒުދޮށަށް ގޮސް ހުރިހާ ގައުމުތަކުން ވާހަކަ ދެއްކުމަށް ވަރަށް ބޮޑަށް އެދިވަޑައިގަންނަވާ ކަމަށެވެ.

ގަތަރުން ގަބޫލު ކުރަނީ، ޓެރަރިޒަމްގެ ނަމުގައި ގަތަރަށް އެޅި ފިޔަވަޅު ތަކަކީ، ޒަމާނުއްސުރެ ގަތަރާ އެ ގައުމުގަކުގެ ސިޔާސަތުތަކާ ހުރި ތަފާތު ތަކެއްގެ ސަބަބުން އެޅި ފިޔަވަޅެއް ކަމަށެވެ.

ގަތަރަކީ ޓެރަރިޒަމް އަށް ވާގިވެރިވާ ގައުމެއް ކަމަށް ބުނެ ބައެއް ގައުމުތަކުން އެގައުމާ އޮންނަ ގުޅުން ކަނޑާލީ ޖޫން މަހުގެ 5 ވަނަ ދުވަހުއެވެ. އަދި އޭގެ ފަހުން ވައިގެ މަގުންނާއި އެއްގަމު އަދި ކަނޑުގެ މަގުން ގަތަރަށް ދަތުރުކުރެވޭނެ މަގުތައް އެގައުމުތަކުން ވަނީ ބަންދުކޮށްފައެވެ.

ގަތަރާ އެކު އޮންނަ ގުޅުން ކުއްލި ގޮތަކަށް ކަނޑާލި ގައުމުތަކުގެ ލިސްޓުގައި ދިވެހި ރާއްޖެވެސް ހިމެނެއެވެ. ރައީސް ޔާމީން ސަރުކާރުން ހާމަކުރެއްވި ގޮތުގައި ރާއްޖޭން ކަނޑާލީ ހަމަ އެކަނި ސިޔާސީ ގުޅުން ކަމަށާއި ވިޔަފާރީގެ ގުޅުންތަކަށް އެއްވެސް ބުރުލެއް ނާރާނެ ކަމަށެވެ.

ގަތަރުން ޝަރުތުތައް ގަބޫލު ނުކޮށް ދޫކޮށްލައިފިނަމަ، ވިޔަފާރީގެ ގޮތުން އިތުރު ފިޔަވަޅުތައް ގަތަރާ ދެކޮޅަށް އަޅާނެ ކަމަށް ބެލެވިފައިވާއިރު، ޔުނައިޓެޑް އެރަބް އެމިރޭޓްސް އިން ރަޝިޔާއަށް ކަނޑައަޅުއްވާފައި ހުންނަވާ ސަފީރު ހުސްވި ހަފްތާގައި ވިދާޅުވީ، ގަތަރަށް އަޅާނެ ފިޔަވަޅު ތަކުގެ ތެރޭގައި ގަތަރާއެކު ވިޔަފާރި ކުރާ ގައުމުތަކަށް ގަތަރު ނޫނީ ގުޅިފައިވާ ގައުމުތައް އިޚްތިޔާރު ކުރުމަށް ގޮވާލައްވާނެ ކަމަށެވެ. އިތުރު ފިޔަވަޅު ތަކުގެ ތަފްސީލްތައް ރަސްމީކޮށް ހާމަ ކޮށްފައި ނެތް ނަމަވެސް، ހަ ގައުމު ހިމެނޭ ގަލްފް ކޯޕަރޭޝަން ކައުންސިލުން ގަތަރު ބޭރު ކޮށްލުމަކީވެސް އެކަށީގެންވާ ކަމެއް ކަމަށް ރިޕޯޓުތައް ބުނެއެވެ.