އެމްޑީޕީން މަޖިލިސް އިންތިހާބަށް ކުރިމަތިލާ ފަރާތްތަކުގެ ފޯމުތައް ހުށައަޅައިފި
6 ފެބުރުއަރީ 2019 | ބުދަ 06:16އިލެކްޝަންސް ކޮމިޝަންގެ ފަރާތުން ފޯމުތަކާއި ހަވާލުވެވަޑައިގެންނެވީ އެ ކޮމިޝަންގެ ނައިބު ރައީސް އަމްޖަދު މުސްތަފާ
އީސީއާއި ކެނޑިޑޭޓުންގެ ފޯމް ހުށައަޅަން ބޭއްވި ރަސްމިއްޔާތުގެ ތެރެއިން
ކުރިޔަށް އޮތް 19ވަނަ ރައްޔިތުންގެ މަޖިލީހުގެ އިންތިހާބުގައި އެމްޑީޕީގެ ޓިކެޓުގައި ވާދަކުރައްވާ ފަރާތްތަކުުގެ ފޯމުތައް އިލެކްޝަންސް ކޮމިޝަނަށް ހުށައަޅައިފިއެވެ.
ބުދަ ދުވަހު ބޭއްވި ކުލަގަދަ ރަސްމިއްޔާތަކަށް ފަހު، އިލެކްޝަންސް ކޮމިޝަންގެ ފަރާތުން ފޯމުތަކާއި ހަވާލުވެވަޑައިގެންނެވީ އެ ކޮމިޝަންގެ ނައިބު ރައީސް އަމްޖަދު މުސްތަފާއެވެ. އެމްޑީޕީގެ ކެނޑިޑޭޓުން ފޯމުތައް ހުށައަޅަން އެ ޕާޓީގެ އޮފީސް ކުރިމަތިން ފެށިގެން ހިނގާފައިދިޔައީ ބާޖަމާލުއްދީނު އިމާރާތުގައި ހުރި އިލެކްޝަން ކޮމިޝަނުގެ އިދާރާއަށެވެ.
މި ހިނގާލުމުގައި އެންމެ ކުރީ ސަފުގައި އެމްޑީޕީގެ ލީޑާޝިޕްގެ ބޭފުޅުންގެ އިތުރުން، ކުރީގެ މަޖިލިސް މެމްބަރުންނާއި، ގިނަ އަދަދެއްގެ އާއްމު މެމްބަރުން ވެސް ބައިވެރިވެވަޑައިގެންނެވިއެވެ.
އޭޕްރީލް 6 ގައި ބާއްވާ މަޖިލީހުގެ އިންތިހާބުގައި ނިލަންދޫ ދާއިރާ ފިޔަވައި އެހެން ހުރިހާ ދާއިރާއަކަށް އެމްޑީޕީން ވާދަކުރެއެވެ. ނަމަވެސް އަންގާރަ ދުވަހު އެމްޑީޕީ ގައުމީ މަޖިލީހުން ވަނީ އަދާލަތު ޕާޓީ އަށް ފަސް ގޮނޑި ދިނުމާއި ބެހޭ ގޮތުން މަޝްވަރާތަކެއް ކޮށްފައެވެ. އެ ފަސް ދާއިރާގެ ޕްރައިމަރީ ކާމިޔާބު ކުރެއްވި ފަރާތްތަކާއި އެކު ޕާޓީގެ ރައީސް މުހައްމަދު ނަޝީދު ވަނީ އަންގާރަ ދުވަހުގެރޭ ބައްދަލު ކޮށްފައެވެ. އެ ބައްދަލުވުން ނިމިގެން ދިޔައީ ވަކި ގޮތެއް ނުނިމިއެވެ. އެހެން ނަމަވެސް ގިނަ ފަރާތްތަކުން ވަނީ އެކަމާއި މެދު ކަންބޮޑުވުން ފާޅުކޮށްފައެވެ.
