ދާއިރާތަކުގެ ގޮނޑިތައް އަދާލަތަށް ދިނުމަށް ކެނޑިޑޭޓުން ބޭނުމެއް ނުވި!
ރައީސް ނަޝީދު ވަނީ ބައެއް ކެނޑިޑޭޓުންނާއި، ކެމްޕޭން ޓީމްތަކާއި ބައްދަލުކޮށްފަ
އެމްޑިޕީން އަންގާރަ ދުވަހު ބޭއްވި ބައްދަލުވުމަށް ފަހު، އެމްޑީޕީ އޮފީސް ސަރަހައްދުގައި ބަޔަކު އެއްވެގެން
ކުރިޔަށް އޮތް ރައްޔިތުންގެ މަޖިލީހުގެ އިންތިހާބުގައި އެމްޑީޕީން އަދާލަތު ޕާޓީއަށް ފަސް ދާއިރާއެއްގެ ގޮނޑި ދިނުމަށް އެ ދާއިރާތަކުގެ ޕްރައިމަރީ ކާމިޔާބު ކުރި ކެނޑިޑޭޓުން ބޭނުން ނުވާކަމަށް ބުނެފި އެވެ.
އެމްޑީޕީން އަދާލާތު ޕާޓީއަށް ފަސް ގޮނޑި ދޭން މަޝްވަރާ ކޮށްފައިވަނީ އަންގާރަ ދުވަހު މާބުލް ހޮޓެލްގައި ކުރިއަށް ގެންދިޔަ އެމްޑީޕީގެ ގައުމީ މަޖިލީހުގައެވެ. އެ ފަސް ދާއިރާގެ ކެނޑިޑޭޓުންނާއި ކެމްޕޭނު ޓީމް ތަކާއި އެކު އަންގާރަ ދުވަހުގެރޭ އެމްޑީޕީ އޮފީހުގައި އެ ޕަޓީގެ ރައީސް މުހައްމަދު ނަޝީދު ވަނީ ބައްދަލުކޮށްފައެވެ.
އެ ބައްދަލުވުމުގައި ބައިވެރިވި ކެމްޕޭން ޓީމްގައި ހިމެނޭ މީހަކު ބުނީ، އެ ފަރާތްތަކާއި އެކު ރައީސް ނަޝީދު ބޭއްވި ބައްދަލުވުމުގައި މަޝްވަރާކޮށްފައި ވަނީ އެ ދާއިރާތަކުގެ ގޮނިޑތައް ދޫކޮށްލުމާއި ގުޅޭގޮތުން ކަމަށެވެ. ގަޑި އެއްހާއިރަށް ދެމިގެން ދިޔަ އެ ބައްދަލުވުމުގައި އެއްވެސް ކެނޑިޑޭޓަކު ގޮނޑި ދޫކުރުމަށް އެއްބަސްވެފައި ނުވާއިރު ކެމްޕޭނުގައި ހަރަކާތްތެރިވި ފަރާތްތަކުން ވަނީ އެމްޑީޕީ އޮފީހުގެ ބޭރުގައި އެމީހުންގެ ހުރި ކަންބޮޑުވުންތައް ފާހަގަކޮށްފަ އެވެ.
''އަހަރުމެން ވަރަށް ބުރަ މަސައްކަތުން ހޮވި ކެނޑިޑޭޓް. ދެން މިހާރު އަހަރުމެން ބޭނުމެއް ނޫން އެ ގޮނޑި ދޫކޮށްލާކަށް.'' އެމްޑީޕީ އޮފީސް ބޭރުގައި ހުރި ވައިކަރަދޫ މީހަކު ބުންޏެވެ.
ރާއްޖެ.އެމްވީއަށް މައުލޫމާތުދެމުން ޓިކެޓް ލިބިފައިވާ ކެނޑިޑޭޓަކު ބުނީ އެ ފަރާތްތަކުގައި ގިނަ ކަންބޮޑުވުންތައް އެބަހުރިކަމަށެވެ. އެގޮތުން ޕްރައިމަރީގެ ކެމްޕޭނަށް ބޮޑު ހަރަދެއްކޮށްފައިވާކަމަށް އެނާ ބުނި އެވެ. އަދި ޕާޓީން އިޤުރާރެއްގައި ސޮއިކުރުވާފައިވާއިރު، ރަސްމީކޮށް ބޮޑު ޖަލްސާއެއްގައި ދާއިރާގެ ކެމްޕޭން ފެށިކަން އިއުލާންކޮށްފަިއވާކަމަށާއި، އެކަން އެގޮތަށް ކުރުމަށްފަހު ޓިކެޓް ދޫކޮށްލުމަށް އެދުމަކީ ގަބޫލުކުރެވޭނެކަމެއް ނޫންކަމަށްވެސް އެ ކެނޑިޑޭޓް ބުންޏެވެ.
އޭނާ ބުނީ އެމްޑީޕީގެ އަސާސީ ގަވައިދު ބުނާގޮތުންވެސް ޕްރައިމަރީ ކެނޑިޑޭޓަކު ކާމިޔާބުކުރުމަށްފަހު، ޓިކެޓް އަތުލުމަކީ ކުރެވޭނެކަމެއް ނޫން ކަމަށެވެ. އަދި ޓިކެޓް ދޫކޮށްލަން ބޭނުން ނުވާކަމަށާއި، އަދާލަތަށް ދާއިރާތަކެއްދޭނަމަ ޕްރިމައީގެ ކުރިން އެކަން ނިންމިފައި އޮންނަންޖެހޭނެކަމަށް އޭނާ ބުންޏެވެ.
އެ ފަރާތްތަކާއިއެކު ބޭއްވި ބައްދަލުވުން ނިމިގެން ދިޔައީ ވަކި ގޮތެއް ނުނިމިކަން ރާއްޖެ.އެމްވީ އަށް ވަނީ އެނގިފަ އެވެ. މައުލޫމާތު ލިބިފައިވާގޮތުގައި ރައީސް ނަޝީދު ފުރަތަމަ ބައްދަލުކޮށްފައިވަނީ ފަސް ދާއިރާގެ ފަރާތްތަކައެވެ. އޭގެ ފަހުން އެހެން ދާއިރާ ތަކުގެ ޕްރައިމަރީ ކާމިޔާބު ކުރި ބައެއް ފަރާތްތަކުން އެމްޑީޕީ އޮފީހަށް ވަތްތަން ވަނީ ފެނިފައެވެ. އެނގިފައިވާ ގޮތުން އެ ފަރާތްތަކާއި އެކު ވެސް މިރޭ ބައްދަލުވުމުއް ކުރިއަށް ގެންގޮސްފައިވެއެވެ.
އެމްޑީޕީއިން އަދާލަތު ޕާޓީއަށް ދިނުމަށް ގައުމީ މަޖިލީހުން މަޝްވަރާކޮށްފައިވާ ފަސް ދާއިރާއަކީ ނިލަންދޫ ދާއިރާ، ވައިކަރަދޫ ދާއިރާ، މަހިބަދޫ ދާއިރާ، ފުވައްމުލަކު ދެކުނު ދާއިރާ އަދި މަކުނުދޫ ދާއިރާއެވެ.
