ހޯރަފުށި އެއާޕޯޓްގެ ސާރވޭ މަސައްކަތް ފަށައިފި

ހއ. ހޯރަފުށީ އެއާޕޯޓް އެޅުމަށް ސާރވޭކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންސްޓަރަކްޝަން ކޮމްޕެނީ (އެމްޓީސީސީ) އިން ފަށައިފި އެވެ.

ރާއްޖެ.އެމްވީއަށް މައުލޫމާތު ދެއްވަމުން އެމްޓީސީސީގެ އެސިސްޓެންޓް ޖެނެރަލް މެނޭޖަރ އަހުމަދު ލަތީފް ވިދާޅުވީ އެއާޕޯޓް އަޅާ ސަރަހައްދު ހިއްކުމުގެ މަސައްކަތަކީ މީގެކުރިން ވެެސް އެމްޓީސީސީ އާއި ހަވާލުކުރެވިފައިވާ މަސައްކަތެއް ކަމަށެވެ. ނަމަވެސް އެއާޕޯޓް އެޅުމަށް ކުރިން ނިންމި ސަރަހައްދު ބަދަލުވެފައިވުމުން، އެއާޕޯޓް އެޅުމުގެ މަސައްކަތް ފެށުމުގެގޮތުން، ސާރވޭކުރުމަށް އެމްޓީސީސީގެ ޓީމް އާދިއްތަ ދުވަހު ހޯރަފުއްޓަށް ގޮސް މަސައްކަތް ފަށާފައިވާ ކަމަށް ލަތީފް ވިދާޅުވި އެވެ.

ލަތީފް ވިދާޅުވީ މިވަގުތަށް ހަވާލުކުރެވިފައި ވަނީ އެއާޕޯޓް އަޅާ ސަރަހައްދުގެ ބިން ހިއްކުމުގެ މަސައްކަތް އެކަނި ނަމަވެސް، އެއާޕޯޓް އެޅުމުގެ މަސައްކަތް ވެސް އެމްޓީސީސާއި ހަވާލު ކުރުމަށް މަޝްވަރާތައް ކުރެވެމުންދާ ކަމަށެވެ. ނަމަވެސް މިހާތަނަށް އެކަން އެއްކޮށް ނިންމާފައިނުވާ ކަމަށް އޭނާ ވިދާޅުވި އެވެ.

އެމްޓީސީސީގެ ސާރވޭ ޓީމުން މަސައްކަތް ކުރިއަށްގެންދަނީ -- ފޮޓޯ: ރާއްޖެ.އެމްވީ

ކުރީގެ ރައީސް ޢަބްދުﷲ ޔާމީންގެ ސަރުކާރުން އެތައް ފަހަރަކު އަޅައިދޭން ވައުދުވި ހޯރަފުށި އެއާޕޯޓްގެ މަސައްކަތް ވެރިކަމުގެ 5 އަހަރު ނިމުނު އިރު ވެސް އޮތީ ކުރިއަށް ނުގެންދެވި އެވެ. އައު ސަރުކާރާއެކު އެއާޕޯޓް އެޅުމުގެ މަސައްކަތް ފަށައި، ބާރު ސްޕީޑްގައި ކުރިއަށް ގެންދާއިރު، އެއާޕޯޓް އެޅުމަށް ނިންމާފައިވަނީ ހޯރަފުށި ފަޅު ހިއްކައިގެންްނެވެ. އުނގުލުފިނޮޅު އޮންނަ ދިމާލުން ހޯރަފުށީ ފަޅު ހިއްކާއިރު އެއާޕޯޓާއި އެ ރަށާ ގުޅާލަން ހަމަޖެހިފައިވަނީ ކޯޒްވޭ އަކުންނެވެ.

އެމްޑީޕީގެ ޓިކެޓްގައި ވާދަކުރާ ކެނޑިޑޭޓާއެކު ރަށުގެ ބައެއް ރައްޔިތުން -- ފޮޓޯ: ރާއްޖެ.އެމްވީ

މި އަހަރުގެ ބަޖެޓުގައި އެ މަސައްކަތަށް ހިމަނާފައިވަނީ 90 މިލިޔަން ރުފިޔާއެވެ. އަދި އަންނަ އަހަރުގެ ބަޖެޓުގައި އެ މަސައްކަތަށް 80.4 މިލިޔަން ރުފިޔާ ހިމަނާއިރު، 2021 ވަނަ އަހަރު އެ ޕްރޮޖެކްޓަށް ނުވަ މިލިޔަން ހިމަނަން ސަރުކާރުން ވަނީ ހުށަހަޅާފައެވެ.