އިންތިޚާބު ބޭއްވިތާ 252 ދުވަސް ފަހުން ލުބްނާނުގައި ސަރުކާރެއް އެކުލަވާލައިފި
އާ ސަރުކާރު އެކުލަވާލާފައިވަނީ 30 ވަޒީރުންގެ މައްޗަށް
ލުބްނާނުގެ ބޮޑުވަޒީރު ސާދު ހަރީރީ
ލުބްނާނުގައި އާންމު އިންތިޚާބެއް ބޭއްވިތާ 252 ދުވަސް ފަހުން އާ ސަރުކާރެއް އެކުލަވާލައިފިއެވެ.
އެގައުމުގެ ރިޔާސީ ފެކްޝަނުން ބުނީ ލުބްނާނުގެ ބޮޑުވަޒީރު ސާދު ހަރީރީގެ ބެއްލެވުމުގެ ދަށުން ލުބްނާނުގައި އާ ސަރުކާރެއް އެކުލަވާލާފައިވާ ކަމަށެވެ. އަދި އާ ސަރުކާރު އެކުލަވާލާފައިވަނީ 30 ވަޒީރުންގެ މައްޗަށް ކަމަށް ވަނީ އިއުލާންކޮށްފައެވެ.
އޭގެތެރޭގައި ހަތަރު އަންހެން ވަޒީރުން ހިމެނިވަޑައިގަންނަވައެވެ. ލުބްނާނުގެ އިންޓީރިއާ މިނިސްޓަރަކަށް އައްޔަން ކުރައްވާފައިވާ ރިއާ އަލް ހަސަނަކީ އެގައުމުގެ ފުރަތަމަ ފަހަރަށް އެމަގާމަށް އައްޔަން ކުރައްވާފައިވާ އަންހެން ބޭފުޅާއެއެވެ.
2009 ވަނަ އަހަރަށްފަހު ލުބްނާނުގައި ބޭއްވި ފުރަތަމަ އާއްމު އިންތިޚާބު ބާއްވާފައިވަނީ މިދިޔަ މެއިމަހުއެވެ. އެއިންތިޚާބުގައި ލުބްނާނުގެ ގާނޫނު ހަދާ މަޖިލީހުގެ 128 ގޮނޑީގެ ތެރެއިން 67 ގޮނޑި ކާމިޔާބުކުރީ ހިޒްބުﷲއެވެ. ބޮޑުވަޒީރު ސާދު ހަރީރީގެ ޕާޓީއަށް މީގެ 9 އަހަރު ކުރިން ބޭއްވި އިންތިޚާބުގައި 33 ގޮނޑި ލިބުނު ނަމަވެސް، މިފަހަރު ލިބުނީ އެންމެ 21 ގޮނޑިއެވެ.
