ލުބްނާނުގެ އަލް-މުސްތަޤުބަލް ނޫސް ހުއްޓާލަނީ

ލުބްނާނުގައި ވޭތުވެދިޔަ 19 އަހަރު ނެރެމުންދިޔަ ދުވަހު ނޫސް، އަލް-މުސްތަޤުބަލްގެ ޕްރިންޓް އެޑިޝަން ހުއްޓާލަން ނިންމައިފިއެވެ.

ލުބްނާނުގެ ބޮޑުވަޒީރު ސާދް ހަރީރީގެ އާއިލާއިން ހިންގަމުންދާ މި ނޫހުގެ ޕްރިންޓް އެޑިޝަން ހުއްޓާލުމަށް ނިންމާފައިވާއިރު، އެ ނޫސް ދެން ހިންގާނީ އޮންލައިންކޮށް ކަމަށް ނޫހުގެ މަސްއޫލުވެރިން ވަނީ ހާމަކޮށްފައެވެ.

ދުވަހު ނޫހެއްގެ ގޮތުގައި އަލް-މުސްތަޤުބަލް ނެރެން ފަށާފައިވަނީ 1999 ވަނަ އަހަރު ސާދް ހަރީރީގެ ބައްޕާފުޅު، އަދި ލުބްނާނުގެ ކުރީގެ ބޮޑުވަޒީރު ރަފީޤް ހަރީރީއެވެ. އޭގެ ހަ އަހަރުފަހުން، 2005 ވަނަ އަހަރު ބެއިރޫތުގައި ޓްރަކް ބޮމެއް ގޮއްވާލައިގެން ދިން ހަމަލާއެއްގައި ރަފީޤް ހަރީރީ ވަނީ އަވަހާރަކޮށްލާފައެވެ. ރަފީޤް ހަރީރީ އަވަހާރަކޮށްލީއްސުރެ އަލް-މުސްތަޤުބަލް ވެފައިވަނީ ހަރީރީ އާއިލާ ހިމެނޭ ސިޔާސީ ކޯލިޝަންގެ މައި ޕްރޮޕެގެންޑާ މީޑީއާއަށެވެ. އީރާނާއި ސީރިއާ އާއި ގުޅުން އޮންނަ ހިޒްބުﷲ ފަދަ ޖަމާއަތްތަކާއި ދެކޮޅަށް، ވޭތުވެދިޔަ 19 އަހަރު އަލް-މުސްތަޤުބަލް ނޫހުގައި ވަނީ ބޮޑެތި ޕްރޮޕެގެންޑާ މީޑިއާ ކެމްޕެއިންތައް ހިންގާފައެވެ.

ޑިޖިޓަލް މީޑިއާގެ މަޤުބޫލުކަން ބޮޑުވެ، ވިޔަފާރި ދަށްވުމުގެ ސަބަބުން ވޭތުވެދިޔަ އަހަރުތަކުގައި ލުބްނާނުގެ ގިނަ ޕްރިންޓް ނޫސްތައް ވަނީ ހުއްޓާލާފައެވެ.

ބުރާސްފަތި ދުވަހު ޝާއިއުކުރި އަލް-މުސްތަޤުބަލްގެ ފަހު އަދަދުގެ ބޭރު ޞަފްޙާގައިވަނީ ރަފީޤް ހަރީރީ އާއި އެމަނިކުފާނާއި އެކު ބޮމުގެ ހަމަލާގައި މަރުވި އެމަނިކުފާނުގެ 6 ހަށިފާރަވެރިންގެ ފޮޓޯއެވެ.