މިޔަންމާ ސަރުކާރުން އޮޅުވާލަން އުޅޭކަމަށް މަންގްޑޯއަށް ދަތުރުކުރި ނޫސްވެރިއަކު ބުނެފި!

ރަޚައިން ސްޓޭޓްގައި ކުރިއަށްދާ ކަންތައްތައް އޮޅުވާލުމަށް މިޔަންމާގެ ސަރުކާރުން މަސައްކަތް ކުރަމުންދާކަމަށް މަންގޑޯ ސަރަަހައްދަށް ދިއުމުގެ ފުރުސަތު ލިބުނު މަދު ނޫސްވެރިންގެ ތެރޭގައި ހިމެނޭ ބީބީސީގެ ދެކުނު އޭޝިއާގެ ކޮރެސްޕޮންޑެންޓް، ޖޮނަތަން މާކް ހެޑް ބުނެފި އެވެ.

ފޭސްބުކް ޕޭޖް މެދުވެރިކޮށް ޖޮނަތަން ބުނި ގޮތުގައި މަންގޑޯއަށް ދަތުރު ކުރި ނޫސްވެރިންނަށް ވަނީ "މުސްލިމުން އެމީހުންގެ އަމިއްލަ ގެތައް އަންދާ ފޮޓޯތަކެއް ދީފަ"އެވެ. އެއީ އެމީހުންނަށް އެތަނަށް ދިއުމުން ދީފައިވާ ފޮޓޯތަކެއްކަން ޖޮނަތަން ފާހަގަ ކުރިއެވެ.

މީގެ ކުރިންވެސް މިޔަންމާ ސަރުކާރުން ބުނަމުންދަނީ ގެތައް ރޯކޮށް ހަދަނީ ރޮހިންޖާ މުސްލިމުންކަމަށެވެ.

އޭނާ ބުނީ މުސްލިމުން ދެމުންދާކަމަށް ބުނާ ހަމަލާތަކާ ގުޅިގެން ހިންދޫ ދީނުގެ ބަޔަކާ އިންޓަވިއު ކުރުމަށް މިޔަންމާ ސަރުކާރުން 6 ސެޕްޓެމްބަރގައި ފުރުސަތު ދިންކަމަށެވެ. އަދި އެމީހުންގެ ތެރޭގައި މުސްލިމުން ގޮތަށް ހެދުން އަޅައިގެން ގެ ރޯ ކުރާ ފޮޓޯތަކުގައި ފެންނަ ދެމީހުން ހިމެނޭކަމަށް ޖޮނަތަން ފާހަގަކުރިއެވެ.

ޖޮނަތަން ބުނަނީ ހަގީގަތުގައި ފޮޓޯއަށް ރަނގަޅަށް ބަލާލިއަސް އެއީ "ފޭކް" އެއްޗެއްކަން އެނގޭ ކަމަށާއި، އެ މީހުން ތިބީ ބޮލުގައި މޭޒުމަތީ އަޅާ ފޮތިގަނޑު އަޅައިގެން ކަމަށެވެ.

25 އޮގަސްޓުން ފެށިގެން މިޔަންމާގެ ރަޚައިން ސްޓޭޓްގައި ހަމަނުޖެހުންތައް ގިނަވެ، 300،000 އަށް ވުރެ ރޮހިންޖާ މުސްލިމުން ވަނީ ބަންގްލަދޭޝަށް ދަތުރުކޮށްފައެވެ. އަދި ސަރުކާރުން ދަނީ އިންސާނީ އެހީ ފޯރުކޯށްދޭ ޖަމިއްޔާތަކަށް ހުރަސް އަޅަމުންނެވެ.