މެދުޒިޔާރަތްމަގު އަލުން ހުޅުވަން އަދި ނުނިންމަން: ސިޓީ ކައުންސިލް
މެދުޒިޔާރަތްމަގުގައި ދުއްވާއެއްޗިއްސަށް ނުވަދެވޭ ގޮތަށް ބަންދުކޮށްފައި އޮތް ސަރަހައްދު ހަމަ އެ ގޮތަށް ބޭއްވުމަށް ގިނަ ބަޔަކު އެދެމުންދޭ
ގިނަ ބަޔަކު އެދެމުންދަނީ މި މަގު ބަންދުކޮށްފައި ބޭއްވުމަށް
މެދުޒިޔާރަތްމަގުގައި ސަލްޓަންޕާރކް ކުރިމަތީގައި ދުއްވާ އެއްޗިއްސަށް ނުވަދެވޭ ގޮތަށް ބަންދުކޮށްފައި އޮތް ސަރަހައްދު، ދުއްވާއެއްޗެއްސަށް ވަދެވޭ ގޮތަށް ހުޅުވާލުމާއި މެދު އަދި ގޮތެއް ނުނިންމާ ކަމަށް މާލޭ ސިޓީ ކައުންސިލުން ބުނެފިއެވެ.
މާލޭ ސިޓީ ކައުންސިލްގެ މޭޔާރ ޝިފާ މުހައްމަދު ވިދާޅުވީ މެދުޒިޔާރަތްމަގުގައި ދުއްވާއެއްޗެއްސަށް ނުވަދެވޭ ގޮތަށް ބަންދުކޮށްފައި އޮތް ސަރަހައްދު ހުޅުވުމާއި މެދު ގޮތެއް ނިންމިފައި ނުވަނީ، ގިނަ ރައްޔިތުން އެ މަގު މިހާރު އޮތް ގޮތަށް ބޭއްވުމަށް އެދެމުން ދާތީ ކަމަށެވެ.
މެދުޒިޔާރަތްމަގުގައި އިސްލާމީ މަރުކަޒު ކުރިމަތީ އޮތް ސަރަހައްދުގައި ޓައިލްސް ޖަހާ ބަންދުކުރީ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައެވެ.
ޝިފާ ވިދާޅުވީ މެދުޒިޔާރަތްމަގުގައި ބަންދުކޮށްފައި އޮތް ސަރަހައްދު އެ އޮތް ގޮތަށް ބޭއްވުމަށް ގިނަ ފަރާތްތަކުން އެދެމުން އަންނައިރު، ބައެއް ފަރާތްތަކުން އެ މަގު ހުޅުވައިދިނުމަށް ވެސް އެދެމުން އަންނަ ކަމަށެވެ. ނަމަވެސް އެކަމާއި މެދު އަދި ވަކި ގޮތެއް ނުނިންމާ ކަމަށް ޝިފާ ވިދާޅުވިއެވެ.
މޭޔާރ ވިދާޅުވީ ފާއިތުވި ތިން އަހަރު މާލޭގައި ގިނަ މަގުތައް އެއްވެސް ދިރާސާކުރުމެއް ނެތި، ދުއްވާ އެއްޗިއްސަށް ނުވަދެވޭ ގޮތަށް ބަންދުކޮށްފައި އޮތް އިރު، ކައުންސިލުން އެންމެ އިސްކަމެއް ދީގެން މިވަގުތު ކުރަމުން އަންނަނީ އެ މަގުތައް ދުއްވާއެއްޗިއްސަށް ވަދެވޭ ގޮތަށް ހުޅުވުމުގެ މަސައްކަތް ކަމަށެވެ. އެކަމާއި ގުޅޭ ގޮތުން ފުލުހުންނާއި މިހާރު މަޝްވަރާ ކުރެވެމުން އަންނަކަން މޭޔާރ ފާހަގަކުރެއްވިއެވެ. އެހެންކަމުން ސަލްޓާންޕާރކް ކުރިމަތީގައި ދުއްވާއެއްޗިއްސަށް ނުވަދެވޭ ގޮތަށް ބަންދުކޮށްފައި އޮތް މަގު، ހުޅުވާލުމަށް ގޮތެއް ނިންމާނީ ބަންދު ކޮށްފައިވާ ހުރިހާ މަގެއް ހުޅުވައި ނިމި، އެންމެ ފަހުގެ މަސައްކަތެއްގެ ގޮތުގައި ކަމަށް ޝިފާ ވިދާޅުވިއެވެ.
ތިން އަހަރަށް ވުރެ ގިނަ ދުވަސް ވަންދެން ބަންދުކޮށްފައި އޮތުމަށް ފަހު، އިސްލާމީ މަރުކަޒުގެ އުތުރު ފަރާތުން ބަންދު ކޮށްފައިވާ އަމީރު އަހުމަދު މަގު ދުއްވާ އެއްޗިއްސަށް މިދިޔަ ޑިސެމްބަރުމަހުގެ 31 ވަނަ ދުވަހު އަލުން ހުޅުވާލުމުން ގިނަ ބަޔަކަށް އެކަމުގެ ލުއިފަސޭހަތަކެއްވަނީ ލިބިގެން ގޮސްފައެވެ. ޝިފާ ވިދާޅުވީ ވިޔަފާރި ކުރާ ފަރާތްތަކަށް އަމީރުއަހްމަދު މަގު ހުޅުވުމުގެ ސަބަބުން ވަރަށް ބޮޑު ލުޔެއް ލިބިގެން ގޮސްފައިވާ ކަމަށް އެ ފަރާތްތަކުން ބުނެފައިވާ ކަމަށެވެ.
މާލޭގެ ޓްރެފިކް ތޮއްޖެހުން މަދުކުރުމަށްޓަކާ ގިނަ މަސައްކަތްތަކެއް ކުރައްވަމުން އަންނަކަން މޭޔާރ ފާހަގަކުރެއްވިއެވެ. އެގޮތުން އައިޖީއެމްއެޗް ހޮސްޕިޓަލް ސަރަހައްދުގައި ދިމާވާ ޓްރެފިކް ސަރަހައްދަށް ހައްލެއް ގެނައުމުގެ ގޮތުން ބޮޑުތަކުރުފާނު މަގުން ބަންދުކުރި ސަރަޙައްދު އަލުން ހުޅުވާލުމުގެ މަސައްކަތް ކުރަމުން އަންނަ ކަމަށް މޭޔާރ ވިދާޅުވިއެވެ. އެގޮތުން ރަސްފަންނު ސަރަހައްދުގައި ކޮރަލް ބުލެވާޑް އިމާރާތް ކުރުމަށް، ބޮޑުތަކުރުފާނު މަގުން ބަންދު ކުރި ސަރަޙައްދު އަލުން ހުޅުވާލުމުގެ މަސައްކަތް ކުރަމުން އަންނަ ކަމަށް ވިދާޅުވިއެވެ. ކޮރަލް ބުލެވާޑްގެ މަސައްކަތަށް ބަންދުކޮށްފައިވާ ބޮޑުތަކުރުފާނުގެ މަގުގެ ސަރަހައްދު ނުހުޅުވި ލަސްވެގެންދަނީ، ކޮރަލް ބުލެވާޑްއިން އެ ސަރައްހައްދުގައި ސިމެންތިން ރާނާފައިވާ ފާރުތައް ތަޅަންޖެހޭތީ ކަމަށެވެ. އަދި މަގު ވަރަށް އަވަހަށް ހުޅުވިގެންދާނެ ކަމަށް ޝިފާ ވިދާޅުވިއެވެ.
