ފެލައިނީ ޗައިނާގެ ކްލަބަކަށް ބަދަލުވާން އެއްބަސްވެއްޖެ
30 ޖެނުއަރީ 2019 | ބުދަ 14:44ފެލައިނީ ބަދަލުވާން އެއްބަސްވީ ޗައިނާގެ ޝަންޑޮންގް ލޫނެންގްއަށް
ޔުނައިޓެޑަށް ކުޅެމުން އަންނަ ފެލައިނީ
މެންޗެސްޓާ ޔުނައިޓެޑަށް ކުޅެމުން އަންނަ ބެލްޖިއަމްގެ މިޑްފިލްޑަރ މައުރެން ފެލައިނީ ޗައިނާގެ ޝަންޑޮންގް ލޫނެންގްއަށް ބަދަލުވާން އެއްބަސްވެއްޖެ ކަމަށް ރިޕޯޓްތައް ބުނެފިއެވެ.
ރިޕޯޓްތައް ބުނާ ގޮތުން މިދިޔަ އަހަރު ޔުނައިޓެޑުގެ އެއްބަސްވުން އާކުރި ފެލައިނީ ލޫނެންގްއަށް ބަދަލުވަނީ ބޮޑު އަގެއްގައެވެ. ނަމަވެސް މިކަން އަދި އެއްވެސް ރަސްމީ ގޮތަކަށް ކަށަވަރުވެފައެއް ނުވެއެވެ.
ޗައިނާގެ ޓްރާންސްފާ ބާޒާރު ބަދަލުވާނީ އަންނަ ފެބްރުއަރީ މަހުގެ 28 ވަނަ ދުވަހުއެވެ.
ޖެނުއަރީ ޓްރާންސްފާގައި ފެލައިނީ ހޯދަން ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އޭގެ ތެރޭގައި ޗައިނާގެ ކްލަބްތަކުގެ އިތުރުން ޖަރުމަން އަދި ސްޕެއިންގެ ކްލަބްތައް ވެސް ހިމެނެއެވެ.
އެވަޓަން ދޫކޮށްލުމަށް ފަހު ފެލައިނީ ޔުނައިޓެޑަށް ބަދަލުވެފައި ވަނީ 2013 ވަނަ އަހަރެވެ. އޭނާ ވަނީ މިހާތަނަށް އެޓީމަށް ކުޅުނު 177 މެޗުގައި 22 ލަނޑު ކާމިޔާބުކޮށްފައެވެ.
މީގެ އިތުރުން އޭނާ ވަނީ އެ ކްލަބާއެކު އެފްއޭކަޕާއި، ލީގް ކަޕާއި،ޔޫރޮޕާ ލީގުގެ އިތުރުން އެފްއޭ ކޮމިއުނިޓީ ޝިލްޑް ވެސް ކާމިޔާބުކޮށްފައެވެ.
ބެލްޖިއަމް ގައުމީ ޓީމުން ވެސް ބަރާބަރަށް ޖާގަ ހޯދަމުން އަންނަ ފެލައިނީ ވަނީ އެޓީމަށް ކުޅުނު 87 މެޗުގައި 18 ލަނޑު ކާމިޔާބުކޮށްފައެވެ. އޭނާ ވަނީ ބެލްޖިއަމްގެ "އެބޮނީ ޝޫ" 2008 ވަނަ އަހަރު ހާސިލްކޮށްފައެވެ.
