ވެނެޒުއޭލާގެ އިދިކޮޅު ލީޑަރު ގައުމުން ބޭރަށް ދިއުން ސުޕްރީމް ކޯޓުން މަނާކޮށްފި

ވެނެޒުއޭލާގެ ސުޕްރީމް ކޯޓުން އިދިކޮޅު ލީޑަރު ހުއާން ގައިޑޯ ގައުމުން ބޭރަށް ދިއުން މަނާކޮށް، އޭނާގެ ހުރިހާ ބޭންކު އެކައުންޓްތަކެއް ފްރީޒްކޮށްފިއެވެ.

އެ ގައުމުގެ ގާނޫނު ހަދާ ގައުމީ މަޖިލީހުގެ ރައީސްކަން ވެސް ކުރައްވާ 35 އަހަރުގެ ގައިޑޯގެ މައްސަލައިގައި ހުކުމް އިއްވަވަމުން ސުޕްރީމް ކޯޓުގެ އިސް ފަނޑިޔާރު މައިކެލް މޮރޭޏޯ ވިދާޅުވީ، ގައިޑޯ ވަނީ އެ ގައުމުގެ އަމަން ނަގާލަން މަސައްކަތް ކޮށްފައި ކަމަށެވެ. މި މައްސަލައިގެ ތަހުގީގު ފުރިހަމަ ވަންދެން ގައިޑޯއަށް ގައުމުން ބޭރަށް ނުދެވޭނެކަމަށް ކޯޓުން ވަނީ އަމުރުކޮށްފައެވެ. މިހާރުގެ ރައީސް ނިކޮލަސް މަދޫރޯއަށް ވަފާތެރި ސުޕްރީމް ކޯޓުން މި އަމުރު ނެރުނީ ވެނެޒުއޭލާގެ ބަންޑާރަ ނައިބު ތަރޭކް ވިލިއަމް ސާބް އެކަމަށް އެދިވަޑައިގަތުމުންނެވެ.

މިދިޔަ ހަފުތާގެ ތެރޭގައި އަމިއްލަފުޅަށް އޭނާއަކީ ވަގުތީ ލީޑަރު ކަމަށް އިއުލާން ކުރެއްވި ގައިޑޯއަކީ، ވެނެޒުއޭލާގެ ވަގުތީ ރައީސް ކަމަށް އެމެރިކާ އާއި އިނގިރޭސިވިލާތް އަދި ކޮލަމްބިއާ އާއި ބްރެޒިލް ހިމެނޭ ގޮތަށް 20 ގައުމުކުން ވަނީ ބަލައިގަނެފައެވެ. އަދި އެމެރިކާއިން ވަނީ އެ ގައުމުގައި ހުރި ވެނެޒުއޭލާގެ ބޭންކު އެކައުންޓްތައް ވެސް ގައިޑޯއާއި ހަވާލުކުރުމަށް ނިންމާފައެވެ. އަދި މިދިޔަ ހަފުތާގެ ތެރޭގައި ޔޫރަޕުގެ އިއްތިހާދުގެ ގައުމުތަކުން ވަނީ އަށް ދުވަހުގެ ތެރޭގައި އިންތިހާބެއް ނުބާއްވައިފިނަމަ ގައިޑޯއަކީ ރައީސް ކަމަށް ބަލައިގަންނާނެ ކަމަށް ބުނެފައެވެ.

ހުޅަނގުގެ ގައުމުތަކާއި އަވަށްޓެރި ގިނަ ގައުމުތަކުން ގައިޑޯއަކީ ރައީސް ކަމަށް ބަލައިގަންނަން ނިންމި ކަމުގައިވީ ނަމަވެސް ވެނެޒުއެލާގެ ބާރުގަދަ އަސްކަރިއްޔާގެ ތާއީދު އޮތީ އަދިވެސް މަޑޫރޯއަށެވެ. އަދި ޗައިނާ އާއި ރަޝިޔާ އަދި ތުރުކީ ފަދަ ދުނިޔޭގެ ބާރުތަކުން ވަނީ މަޑޫރޯގެ ވެރިކަން ދިފާއުކުރާނެ ކަމަށް ބުނެފައެވެ. ވެނެޒުއޭލާގެ މައްސަލައަށް ސުލްހަވެރި ހައްލެއް ހޯދުމަށް ކެނެޑާ ވެސް ހިމެނޭގޮތަށް ދެކުނު އެމެރިކާގެ ގައުމުތަކުން އުފައްދާފައިވާ ލީމާ ގްރޫޕުން ވަނީ އަސްކަރީ ހަމަލާއެއް ދީގެން ވެރިކަން ބަދަލުކުރުމާއި ދެކޮޅުކަމަށް ބުނެފައެވެ.

ދުނިޔޭގެ އެއްމެ ބޮޑު ސާފުނުކުރާ ތެލުގެ ރިޒާވް އޮތް ވެނެޒުއޭލާގައި މިދިޔަ އަހަރު ބޭއްވި މައްސަލަ ބޮޑު ރިޔާސީ އިންތިހާބަށް ފަހު ދެވަނަ ދައުރަކަށް މަޑޫރޯ ހުވާކުރެއްވީ މި ޖެނުއަރީ މަހުގައެވެ. ވެނެޒުއޭލާގައި ބޭއްވި ރިޔާސީ އިންތިހާބަކީ އިންތިހާބުތަކަށް ކުރި މަލާމާތެއް ކަމަށާއި ބަލައި ނުގަންނަ ކަމަށް އެ ގައުމުގެ ސަރުކާރާއި އިދިކޮޅު ފަރާތްތަކުން ވަނީ ތަކުރާރުކޮށް ބުނެފައެވެ. މަޑޫރޯގެ ވެރިކަމުގައި އެ ގައުމުގައި އިގްތިސާދު ވަނީ އިންތިހާއަށް ދަށަށް ގޮސްފައެވެ.