ޕްރޮގްރެސިވް ޕާޓީ އޮފް މޯލްޑިވްސް(ޕީޕީއެމްގެ) ކޮންގްރެސް ސައްހަ ކަމަށް ސުޕްރީމްކޯޓުން ހުކުމް ކޮށްފިއެވެ.
ސުޕްރީމް ކޯޓުން ހުކުމް ކޮށްފައި ވަނީ ހައިކޯޓުން ޕީޕީއެމްގެ ކޮންގްރެސް ބަލައިގަނެފައިވާ ކަމަށް ހުކުމް ކުރުމާ ގުޅިގެން އެ މައްސަލަ އިސްތިއުނާފު ކުރުމަށް އިލެކްޝަންސް ކަމިޝަން (އީސީ) އިން ސުޕްރީމް ކޯޓަށް ހުށައަޅުމާ ގުޅިގެން އެ ކޯޓުން ނެރުނު ހުކުމުގައެވެ.
ސެޕްޓެމްބަރު މަހުގެ 28 ވަނަ ދުވަހު ބޭއްވި އެ ކޮންގްރެސްގައި ޕާޓީގެ ރައީސް ކަމަށް ރައީސް އަބްދުﷲ ޔާމީން ވަނީ އިންތިހާބުކޮށްފައެވެ. އޭގެ އިތުރުން ނައިބު ލީޑަރުންގެ ގޮތުގައި އާޒިމާ ޝަކޫރާއި އަބްދުއްރަހީމް އަބްދުﷲ އާއި މޫސާ ޒަމީރާއި އިކޮނޮމިކް މިނިސްޓަރު މުހައްމަދު ސައީދު ވަނީ އިންތިހާބުކޮށްފައެވެ. އަދި ޕާޓީގެ ކައުންސިލަށް ވެސް މެންބަރުން އިންތިހާބުކޮށްފައި ވެއެވެ.
ކޮންގްރެސް ބޭއްވުމަށް ފަހު އެކަމާ ގުޅޭ މައުލޫމާތު އިލެކްޝަންސް ކޮމިޝަނަށް ޕީޕީއެމް އިން ހުށަހެޅި ނަމަވެސް އެކޮމިޝަނުން ކޮންގްރެސްގެ ނިންމުންތައް ބަލައިނުގަތުމަށް ނިންމިއެވެ. އެ ގޮތުން ޕީޕީއެމް އިން އެ މައްސަލަ ހައިކޯޓަށް ހުށަހެޅުމުން އެ ކޯޓުން ކޮށްފައިވާ ހުކުމްގައި ބުނެފައި ވަނީ އެ ޕާޓީގެ ކޮންގްރެސް އިން އައްޔަން ކުރި މަގާމުތައް އަނބުރާ ދިނުމަށް އިލެކްޝަންސް ކޮމިޝަންގެ މައްޗަށް އަމުރު ކުރާ ކަމަށެވެ.
ޕީޕީއެމްގެ ކޮންގްރެސް ބަލައިނުގަންނަން ނިންމީ ގާނޫނާ ހިލާފަށް ކަމަށް ހައިކޯޓުން ހުކުމް ކޮށްފައިވާއިރު ޕީޕީއެމްގެ ކޮންގްރެސްގައި އެ ޕާޓީގައި ނުހިމެނޭ މީހުން ވެސް ބައިވެރިވެފައިވާ ކަމަށް އީސީ އިން ވަނީ ބުނެފައެވެ. އަދި ޕީޕީއެމްގެ އަސާސީ ގަވައިދުގައި އެޕާޓީގެ މަގާމުތަކަށް ކުރިމަތިލެވޭނީ އެޕާޓީގެ މެންބަރުންނަށް ވާތާ ކަނޑައެޅިފައިވާ މުއްދަތެއް ހަމަވުމުން ކަމަށާއި, ޕާޓީގެ އެފަދަ އަސާސްތަކާ ހިލާފުވެފައިވާ އިރު ކޮންގްރެސްގެ ނިންމުންތައް ބަލައިގަނެވޭނެ ޖާގައެއް ނެތް ކަމަށް އީސީން މީގެ ކުރިން ވަނީ ބުނެފައެވެ.
ޕީޕީއެމްގެ ބާރުތައް ކުރީގެ ރައީސް އަބްދުﷲ ޔާމީންގެ އަތްޕުޅުން ގެއްލިދާނެ ކަމުގެ ބިރަށް، އެމަނިކުފާނު އިސްވެ ހުންނަވައިގެން ވަނީ ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ނަމުގައި ސިޔާސީ ޕާޓީއެއް އުފައްދަވާފައެވެ.
އެ ކޮންގްރެސްއިން ޕީޕީއެމްގެ އިސް މަގާމުތަކަށް ހޮވާފައި ތިއްބެވި ގިނަ ބޭފުޅުން މިހާރު ވަނީ ޕީއެންސީއާ ގުޅިވަޑައިގެންފައެވެ.
