މުޒާހަރާ ކުރުމުން ބަންގަލަދޭޝްގެ ފަހާ ފެކްޓްރީތަކުން 5000 އެއްހާ މުވައްޒަފުން ވަކިކޮށްފި

ބަންގްލަދޭޝްގައި ހުންނަ ދުނިޔޭގެ މަޝްހޫރު އެކި ބްރޭންޑްތަކުގެ އަންނައުނު އުފައްދާ ފެކްޓްރީތަކުގައި މަސައްކަތްކުރާ ފަރާތްތަކުން މި މަހުގެ ކުރީކޮޅު ކުރި މުޒާހަރާތަކާ ގުޅިގެން މުޒާހަރާތަކުގައި ބައިވެރިވި ކުޑަ އުޖޫރައެއް ލިބޭ 5،000 އެއްހާ މުވައްޒަފުން ވަޒީފާއިން ވަކިކޮށްފިއެވެ.

ދުވަސްތަކަކަށް ދެމިގެންދިޔަ އެ މުޒާހަރާތަކުގައި އެ ގައުމުގެ އެކި ކަންކޮޅުތަކުގައި މަަސައްކަތްތެރިން ވަނީ އެ މީހުންގެ ފެކްޓަރީތަކުން ނުކުމެ މުޒާހަރާކޮށްފައެވެ.

ބަންގަލަދޭޝްގެ އަންނައުނު އުފެއްދުމުގެ އިންޑަަސްޓްރީއަކީ 30 ބިލިއަން އެެމެރިކާ ޑޮލަރުގެ އިންޑަސްޓްރީއެކެވެ. މި މުޒާހާތައް ހުއްޓުވުމަށް ފުލުހުންނުކުމެ ރަބަރު ވަޒަނާއި ކަރުނަގޭސް ބޭނުންކޮށްފައިވެއެވެ.

މުޒާހަރާކުރި މަސައްކަތްތެރިއަކު މަރުވެފައިވާއިރު 50 އަށްވުރެ ގިނަ މީހުން ޒަަޚަމްވެފައިވެއެވެ.

މުޒާހަރާތައް އެންމެ ވަރުގަދައަށް ހިނގާފައި ވަނީ އިންޑަސްޓްރިއަލް މައި ޓައުންކަމަށްވާ އަޝުލިއާގައިކަމަށްވާއިރު އެ ޓައުނަކީ ރީޓެއިލް ވިޔަފާރީގެ ބިޔަ ކުންފުނިތައްކަމަށްވާ އެޗްއެންޑްއެމް އާއި ވޯލްމާޓްފަދަ އިތުރު އެތައް ކުންފުނިތަަކަށް އަންނައުނުތައްޔާރުކޮށްދޭ ފެކްޓަރީތައް ހުންނަ ޓައުނެވެ.

ފުލުހުންބުނީ ވަޒީފާއިން ވަކިކުރި ފެކްޓަރީތަކުގެ އެތައް ހާސް މަސައްކަތްތެރިންނެއްގެ މައްޗަށް ލޫޓުވުމާ މުދަލަށް ގެެއްލުންދިންކަމަށް ތުހުމަތުކުރެވިފައިވާ ކަމަށެވެ. ނަމަވެސް ޔޫނިއަންތަކުން ވަނީ އިންޑަސްޓްރީގެ ވެރިން މަސައްކަތްތެރިންނަށް ބިރުދައްކަމުންދާކަމަށް ތުހުމަތުކޮށްފައެވެ.

"ހަމަނުޖެހުންތަކާ ގުޅިގެން މިހާތަނަށް 4،899 މީހުން ފެކްޓްރީތަކުން ވަކިކޮށްފައިވޭ،" ނަން ހާމަނުކުރުމަށް ޝަރުތުކޮށް ފުލުހުންގެ އިސް އޮފިސަރަކު އޭއެފްޕީ ނޫސް އޭޖެންސީގައި ބުނެފައިވެއެވެ.

އެންމެ ފެކްޓަރީއަކުން ވެސް 1،200 އަށްވުރެ ގިނަ ފަހާ މީހުން ވަޒީފާއިން ވަކިކޮށްފައިވާއިރު އެ މީހުންގެ މަހު މުސާރަ ފެށެނީ އެންމެ 95 އެމެރިކާ ޑޮލަރުންނެވެ.

ޔޫނިއަަންތަކުން ބުނީ ވަޒީފާއިން ވަކިކުރެވުނު މީހުންގެ އަސްލު އަދަދު 7،000އަށް ގާތްކުރާނެ ކަމަށާއި 100 އަށްވުރެ ގިނަ މީހުން ހައްޔަރު ވެސް ކޮށްފައިވާކަމަށެވެ.