ރައީސް ކަމަށް ޕޫޓިން ވާދަނުކުރެއްވުމަށް ގޮވާލާ މުޒާހަރާކުރި ބަޔަކު ހައްޔަރުކޮށްފި

އަންނަ އަހަރު ބާއްވާ ރިޔާސީ އިންތިޚާބުގައި ރައީސް ވްލާޑިމިއަރ ޕޫޓިން ވާދަކުރައްވަފާނެ ކަމަށް ބެލެވޭތީ އެކަން ބަދަލުކުރުމަށް ގޮވާލާ އެތައް ސަތޭކަ ބަޔަކު ކުރަމުން ދިޔަ މުޒާހަރާގައި ސެއިންޓް ޕީޓަރސްބާރގުން ހޮނިހިރު ދުވަހު 100 އަށްވުރެ ގިނަ އެކްޓިވިސްޓުން ހައްޔަރުކޮށްފިއެވެ.

އެތައް ސިޓީއެއްގައި މި މުޒާހަރާތައް ކުރިޔަށް ގެންގޮސްފައިވަނީ "މީނާއާ ހެދި ބަލިވެއްޖެ" މި ޝިއާރުގެ ދަށުންނެވެ.

މި މުޒާހަރާއަށް ގޮވާލީ ފާޑުކިއުންތެރިއެއް ކަމަށްވާ މިޚެއިލް ޚޮދޯރްކޯސްކީ އުފައްދާފައިވާ އޯޕަން ރަޝިއާ މޫވްމެންޓުންނެވެ.

އޭއެފްޕީ ނޫސްއެޖެންސީން ބުނާ ގޮތުން ސެއިންޓް ޕީޓާސްބާގްގެ މެދުތެރެއަށް 200 އެއްހާ މީހުން ވަނީ ޖަމާވެފައެވެ.ސިޔާސީ އިދިކޮޅު ހަރަކާތްތައް މޮނިޓަރ ކުރާ ގްރޫޕެއް ކަމަށްވާ އޯވީޑީ-އިންފޯ އިން ބުނީ 110 އަކަށްވުރެ ގިނަ މީހުން ރަޔަޓް ފުލުހުން ގެންގޮސްފައިވާ ކަމަށެވެ.

ސެއިންޓް ޕީޓާސްބާރގްގެ ފުލުހުން ބުނެފައި ވަނީ އާއްމު ދިރިއުޅުމަށް ތަކުރާރުކޮށް އުނދަގޫކުރަމުން ދިޔަ 100 މީހަކު ފުލުހުން ހުއްޓުވާފައި ވާކަމަށެވެ. ނަމަވެސް ހައްޔަރު ކުރި ކަމަށް ބުނެފައެއް ނުވެއެވެ.

އުމުރުފުޅުން 64 އަހަރުގެ ޕޫޓިން އަންނަ ރިޔާސީ އިންރިޚާބުގައި ވާދަކުރައްވާނެ ކަމެއް ނުވަތަ ނޫން ކަމެއް އަދި އިއުލާނު ކުރައްވާފައެއް ނުވެއެވެ. ރަޝިޔާގެ ސިޔާސީ މައިދާނުގައި ވެރިކަން ކުރައްވަމުން ގެންދަވާތާ 17 އަހަރު ވެފައިވާ ޕޫޓިންނަކީ އަދިވެސް އެގައުމުގައި މަގްބޫލް ޝަޚްސިއްޔަތެކެވެ.

މޮސްކޯގައި ވެސް އެވަރުގެ އެއްވުމެއް ބާއްވާފައިވާއިރު އެ އެއްވުމަކީ ސުލްހަވެރި އެއްވުމެކެވެ. މުޒާހަރާގެ ބައިވެރިން ވަނީ 2018 ވަނަ އަހަރުގެ ރިޔާސީ އިންތިޚާބުގައި ވާދަ ނުކުރެއްވުމަށް އެދި ލިޔެފައިވާ ލިއުމެއް އެރުވުމަށް ސަފުހަދައގެން ތިބެފައެވެ.