މުޒާހަރާތަކަށް 50 ދުވަސް ފުރުން ފާހަގަކުރުމަށް ވެނެޒުއެލާގައި ބޮޑު ހިނގާލުމެއް ބާއްވައިފި

ވެނެޒުއެލާގެ ރައީސް ނިކޮލަސް މަޑޫރޯގެ ސަރުކާރާއި ދެކޮޅަށް ކުރަމުންދާ މުޒާރާތަކަށް ފަންސާސް ދުވަސް ފާހަގަކުރުމަށް ބޮޑު ހިނގާލުމެއް ބާއްވައިފިއެވެ.

ސަރުކާރާއި ދެކޮޅަށް ކުރަމުންދާ މުޒާހާރާތަކަށް 50 ދުވަސް ފާހަގަކުރުމުގެ ވެރިރަށް ކަރަކަސް އާ ވެނެޒުއޭލާގެ އެހެނިހެން ސަރަހައްދުތަކުގައި އެތައް ލައްކަ ބަޔަކުވަނީ މަގުތަކަށް ނުކުމެ މި ހިނގާލުމުގައި ބައިވެރިފައެވެ.

ހިނގާލުމާއި ގުޅޭގޮތުން އިދިކޮޅު އިއްތިހާދުގެ ތަރުޖަމާނު އެޑިސަން ފެރަރ ވިދާޅުވި ގޮތުގައި ވެރިރަށް ކަރަކަސްގައި ބޭއްވުނު ހިނގާލުމުގައި އެއްލައްކަ ފަސްދޮޅަސް ހާހަށްވުރެ ގިނަ މީހުން ބައިވެރިވިއެވެ.

ހިނގާލުމުގައި ބައިވެރިވި މީހުން، ވަނީ ސަރުކާރާއި ދެކޮޅު ތަފާތު ޝުއޫރުތައް ލިޔެފައިވާ ބޯޑުތައް ބޭނުންކޮށްފައެވެ. އެގޮތުން ހުދު މުހުތާރު ވެރިކަމެއް ބޭނުން ނުވާ ކަމަށް ލިޔެފައިވާ ބޯޑުތަކާއި ޑިކްޓޭޓަޝިޕްއާ ދެކޮޅަށް އެތައް މިލިއަން ބަޔަކު ތިބިކަން ހާމަކޮށްދޭ ލިޔުންތައް ހިމެނެއެވެ.

ވެނެޒުއެލާގެ އެތައް މިލިއަން ރައްޔިތުންނެއް ތިބީ ރައީސް މަޑޫރޯގެ ސަރުކާރު ދެކެ އިންތިހާ ދަރަޖައަށް ރުޅިއައިސްފައެވެ. އެގައުމުގެ އެތައް މިލިއަން ރައްޔިތުންނެއް ތުހުމަތުކުރާ ގޮތުގައި ވެނެޒުއެލާގައި އިންފްލޭޝަން ރޭޓް މަތިވެ، ކާބޯތަކެއްޗާ، ބޭސްފަރުވާގެ ވަސީލަތްތައް ލިބުމުގައި ދަތިވަނީ ސަރުކާރުގެ ދޯހަޅު ސިޔާސަތުތަކުގެ ސަބަބުންނެވެ.

ވެނެޒުއެލާގައި އިންސާނީ ހައްގުތައް ނިގުޅައިގަންނަމުން ދިޔުމަކީވެސް މުޒާހަރާ ކުރަމުންދިޔުމުގެ އެއް ސަބަބެވެ. މުޒާހަރާގެ ބައިވެރިން ސަރުކާރަށް ޝަރުތު ކުރަމުންދަނީ އެގައުމުގައި އެކުލަވާލެވޭ ގާނޫނުތަކުގައި އިދިކޮޅު ފަރާތްތައް ހިމެނުމަށެވެ.

ހޮނިހިރު ދުވަހު ވެރިރަށް ކަރަކަސް އޮތް ހިނގާލުމުގައި މީގެ ކުރިން ދެފަހަރެއްގެ މަތިން ރިޔާސީ އިންތިޚާބުގައި ވާދަ ކުރެއްވި އިދިކޮޅު ލީޑަރު ހެންރީކޭ ކެޕްރިލެސް ބައިވެރިވެވަޑައިގެންނެވިއެވެ.

ހޮނިހިރު ދުވަހުގެ ހިނގާލުން ހުއްޓުވުމަށް ވަކި ހިސާބަކުން ފުލުހުންވަނީ ބާރުގެ ބޭނުންކޮށްފައެވެ. އެގޮތުން ޕެޕަރ ސްރޭއާ ކަރުނަ ގޭސް ބޭނުންކޮށްފައިވެއެވެ.

ފުލުހުން ހިނގާލުން ރޫޅާލުމަށް ކަރުނަގޭސް ބޭނުންކުރުމުން ހިނގާލުމުގެ ބައިވެރިން ވަނީ ގަލާއި ޕެޓްރޯލް ބޮން ފަދަ އެއްޗެހި އުކާފައެވެ.

މީގެ އިތުރުން މުޒާހަރާ ތެރޭގައި ވައްކަން ކުރަމުންދިޔަ ކަމަށް ތުހުމަތު ކުރެވުނު މީހެއްގެ ގައިގައި މުޒާހަރާގެ ބައިވެރިންވަނީ ރޯކޮށްލާފައެވެ.

ވެނެޒުއެލާގެ ސޭން ކްރިސްޓޮބަލްގެ ޓަޗީރާގެ މަގުތަކުގައި މުޒާހަރަ ކުރާ ފަރާތްތަކުން ތަންތަން ލޫޓުވުމާއި ވައްކަމާއި ފޭރެމުންދާތީ މަޑޫރޯގެ ސަރުކާރުން ވަނީ އެސަހައްދަށް އަސްކަރީ ފައުޖެއް ފޮނުވާފައެވެ.