އަދީބު ގޭބަންދަށް ބަދަލުކުރަން ހައި ކޯޓުން ކުރި އަމުރު ސުޕްރީމް ކޯޓުން ބާތިލްކޮށްފި
29 ޖެނުއަރީ 2019 | އަންގާރަ 12:11އަމުރުގައި ވަނީ، މައްސަލައާ މެދު ސުޕްރީމް ކޯޓުން ވަކި ގޮތެއް ނިންމައި އަންގަންދެން ހައި ކޯޓުގެ އަމުރު ތަންފީޒުކުރުން ވަގުތީ ގޮތުން ފަސްކުރުމަށް
ކުރީގެ ނައިބު ރައީސް އަހަމަދު އަދީބު
އަދީބު ގޭބަންދަށް ބަދަލުކުރުމަށް ހައި ކޯޓުން ހޯމަ ދުވަހު ނެރުނު އަމުރު ތަންފީޒު ނުކުރުމަށް އަންގައި، ސުޕްރީމް ކޯޓުން ވަގުތީ އަމުރެއް ނެރެފިއެވެ.
އަންގާރަ ދުވަހު ނެރުނު ސުޕްރީމް ކޯޓުގެ އަމުރުގައި ވަނީ، މައްސަލައާ މެދު ސުޕްރީމް ކޯޓުން ވަކި ގޮތެއް ނިންމައި އަންގަންދެން ހައި ކޯޓުގެ އަމުރު ތަންފީޒުކުރުން ވަގުތީ ގޮތުން ފަސްކުރުމަށެވެ. އަދީބު ގެއަށް ބަދަލުކުރަން ކުރި އަމުރު ސުޕްރީމް ކޯޓުގައި އިސްތިއުނާފު ކޮށްފައި ވަނީ މޯލްޑިވްސް ކަރެކްޝަނަލް ސަރވިސް، މިނިސްޓްރީ އޮފް ހޯމް އެފެއަރޒް އަދި ޕޮލިސް ވެސް ހިމެނޭ ގޮތަށް ދިވެހި ދައުލަތުގެ ފަރާތުންނެވެ.
ހައި ކޯޓުން ހޯމަ ދުވަހު ކުރި އަމުރާ އެއްގޮތަށް އަދީބު ގެއަށް ބަދަލުކޮށްފައި ވަނީ ހޯމަ ދުވަހުގެ ރޭގަނޑުގެ ވަގުތެއްގައެވެ. އަދީބު ގެއަށް ބަދަލުކުރަން ހައިކޯޓުން އަމުރުކުރީ އަދީބުގެ ސިއްހީ ހާލު ގޯސްވެ، ބޭސްފަރުވާއަށް ރާއްޖެއިން ބޭރަށް ފޮނުވުމުގެ އަމުރަކަށް އެދި އަދީބުގެ ފަރާތުން ސިވިލް ކޯޓުގައި ދައުވާ ކުރުމުން އިސްތިއުނާފު މައްސަލަ ބައްލަވާ ފަނޑިޔާރުންގެ ބެންޗުގެ އިއްތިފާގުންނެވެ.
ކޮރަޕްޝަންގެ މައްސަލަތަކާ ގުޅިގެން 33 އަހަރުގެ ޖަލު ހުކުމެއް ތަންފީޒުކުރަމުން އަންނަ އަދީބު، ބޭސްފަރުވާއަށް ގޭގައި ހުރުމަށް ފަހު އަނބުރާ ޖަލަށް ގެންދިއުމާ ގުޅިގެން، އަދީބު އިސްވެ ހުންނަވައިގެން އުފެއްދި ސިޔާސީ ޕާޓީ އެމްޓީޑީ އާއި ހޯމް މިނިސްޓަރު އިމްރާން އަބްދުﷲ އާ ދެމެދު ވަނީ ނުތަނަވަސްކަން އުފެދިފައެވެ.
