ޕީޖީ އިން ރަށު ކޯޓުތަކަށް ހުށައަޅާ މައްސަލަތަކުގެ ލިޔުން އީމެއިލުން ފޮނުވޭ ގޮތް ހަދައިފި
ލިޔުންތަކުގެ އަސްލު ރަސްމީ ފަސް ދުވަސް ތެރޭގައި ކޯޓަަށް ހުށައެޅުމުން މައްސަލަތައް ބަލާނެ ކަމަށް ބުނެފައިވޭ
ދަށު ކޯޓުތަކުގެ ބެލެނިވެރި ފަރާތް ކަމަށްވާ ސުޕްރީމް ކޯޓް
ޕްރޮސެކިއުޓަރ ޖެނެރަލް ޕީޖީ އިން ރަށު ކޯޓުތަކަށް ހުށައަޅާ މައްސަލަތަކުގެ ލިޔުން އީމެއިލުން ފޮނުވޭ ގޮތް ހަދައިފިއެވެ.
ދަށު ކޯޓުތަކުގެ ބެލެނިވެރި ފަރާތް ކަމަށްވާ ސުޕްރީމްކޯޓުން ނެރެފައިވާ ސަރކިއުލާއެއްގައި ބުނެފައި ވަނީ ދިވެހިރާއްޖޭގެ އަސާސީ ހައްގެއްގެ ގޮތުގައި ރައްޔިތުންނަށް ފޯރުކޮށްދޭންޖެހޭ އިންސާފު ލިބިދިނުމުގެ ހައްގަކީ އެއްވެސް ތަފާތުކުރުމަކާ ނުލައި އެކަށީގެންވާ އަވަސް މިނެއްގައި ފަސޭހަކަމާ އެކު ލިބިދޭންޖެހޭ ހައްގެއް ކަމަށެވެ. އަދި ޖިނާއީ އިޖްރާއާތުގެ ގާނޫނުގެ ދަށުން އަތޮޅު ތެރޭގެ މެޖިސްޓްރޭޓް ކޯޓުތަކަށް މައްސަލަ ހުށަހަޅަން އޮންނަ މުއްދަތުގައި މައްސަލަ ހުށަހެޅުމުގައި ދަތިތަކެއް ކުރިމަތިވާކަން ފާހަގަ ކުރެވިފައިވާ ކަމަށެވެ.
މީގެ އިތުރުން އަވަސް ކަމާ އެކު އަދި ފަސޭހައިން ޖިނާއީ މައްސަލަތައް މެޖިސްޓްރޭޓް ކޯޓުތަކަށް ހުށަހެޅޭނެ ފުރުސަތު ދިނުމުގެ ގޮތުން އެ ސާކިއުލާގައި ހަމަޖައްސާފައި ވަނީ ވަކި މުއްދަތެއްގައި ހުށަހަޅަންޖެހޭ މައްސަލަތަކުގެ އަސްލު ހުށަހެޅުމަށް ދަތިވާ ހާލަތްތަކުގައި ގާނޫނުގައި ބުނެފައިވާ މުއްދަތުގެ ތެރޭގައި އީމެއިލް މެދުވެރިކޮށް އެފަދަ މައްސަލަތައް ކޯޓަށް ހުށަހެޅުމަށެވެ.
އޭގެ ފަހުން އެ ލިޔުންތަކުގެ އަސްލު ރަސްމީ ފަސް ދުވަހުގެ ތެރޭގައި ކޯޓަަށް ހުށަހެޅުމުން އެ މައްސަލައެއް ބަލައިގަނެ ކުރިއަށް ގެންދާ ގޮތަށް ހަމަޖައްސާފައިވާ ކަމަށް އެ ސާކިއުލާގައި ވެއެވެ.
