މަތީ ތައުލީމު ހާސިލުކުރާ ކުދިންނަށް 1 ޕަސެންޓް އިންޓަރެސްޓްގައި ލޯނު ލިބޭ ގޮތް ހެދުމަށް ހުށަހަޅަނީ
28 ޖެނުއަރީ 2019 | ހޯމަ 05:15ލޯނު އަނބުރާ ދައްކަންޖެހޭ މުއްދަތު އިތުރުވާނެ
މަންދު ކޮލެޖްގެ ދަސްވެނިވުމުގެ ހަފުލާގެ ތެރެއިން
ރާއްޖެ އާއި ރާއްޖެއިން ބޭރުން މަތީ ތައުލީމު ހާސިލުކުރާ ކުދިންނަށް 1 ޕަސެންޓް އިންޓަރެސްޓްގައި ލޯން ލިބޭނެ ގޮތަށް ޤާނޫނެއް ހުށަހެޅުމަށް އެމްޑީޕީން ނިންމައިފި އެވެ.
މި ގާނޫނު ހުށަހަޅާނީ އަލަށް އިންތިޚާބުކުރާ މަޖިލީހަށެވެ.
ހޮނިހިރު ދުވަހު ހުޅުމާލެ ބްރައިޓް ވޭ އިންޓަނޭޝަނަލް ސްކޫލްގައި އެމްޑީޕީން ބޭއްވި ވޯކްޝޮޕްގައި އެ ބިލްގެ ޑްރާފްޓެއް ވަނީ ހުށައަޅާފަ އެވެ. ކުޑަ އިންޓްރަސްޓް ރޭޓަކާއެކު ދިގު މުއްދަތަކަށް ލޯނު ދެއްކޭނެ މަގު އެ ޤާނޫނުގެ ދަށުން ފަހިކޮށްދޭން ވަނީ ނިންމާފައެވެ.
އެ ލޯން ސްކީމްގައި އިންޓްރަސްޓުގެ ގޮތުގައި އިތުރުކުރާނީ ކޯސް ފުރިހަމަ ކުރުމަށް އެ ދަރިވަރަކަށް ދޫކުރާ ޖުމުލަ ފައިސާގެ 1 ޕަސެންޓް ކަމަށާއި، މިހާރު ލޯނު ނަގާފައިވާ ކުދިން ލޯނު އަނބުރާ ދައްކަން ދީފައިވާ މުއްދަތުވެސް 50 އިންސައްތަ އިތުރުވާނެ ކަމަށް ބިލްގައިވެ އެވެ.
މަތީ ތައުލީމާއި ތަމްރީންތައް ރާއްޖެއާއި ރާއްޖެއިން ބޭރުން ފަސޭހަކަމާއެކު ލިބިގަނެވޭނެ މަގު ފަހި ކޮށްދެއްވުމަށް ތައްޔާރު ކުރި އެ ޤާނޫނުގެ ދަށުން ދަރިވަރުންގެ ކޯސް ފީއާއި، ދިރިއުޅުމުގެ ޚަރަދުތަކާއި، ޓިކެޓްގެ އަގާއި، ފޮތުގެ އެލެވެންސްއާއި، ހެލްތު އިންސިއުރެންސްގެ އިތުރުން ވިސާ ފީ ފަދަ ޚަރަދުތައް ލޯނުން ކަވަރުކުރަން ހުށަހަޅާފައިވެ އެވެ.
ކޮންމެ ކުއްޖަކަށް ރާއްޖޭގައި ހުރެގެން ފުރަތަމަ ޑިގްރީއާ ހަމައަށް ހިލޭ ތައުލީމު ހާސިލް ކުރެވޭނެ ގޮތް ހަމަޖައްސައި ދެއްވާނެ ކަމަށާއި، ރާއްޖެއިން ބޭރުން މަތީ ތައުލީމު ހާސިލްކުރަން ބޭނުންވާ ކޮންމެ ކުއްޖަކަށް ބޭނުން ގައުމަކުން މަތީ ތައުލީމް ހާސިލް ކުރުމަށް ލުއި ލޯނު ލިބޭނެ ފުރުސަތު ހޯދައިދެއްވާނެ ކަމަށް ރައީސް ވަނީ ވައުދުވެވަޑައިގެންފައެވެ.
