މައުމޫނު، ފާރިސް، ނަދީމް، އަރީފް އަދި ރިޔާޒްގެ މައްޗަށްކުރި ޓެރަރިޒަމްގެ ދައުވާ އަނބުރާ ގެންގޮސްފި
27 ޖެނުއަރީ 2019 | އާދީއްތަ 13:20އެ ދައުވާ ކުރިމިނަލް ކޯޓުން ނަގައި، އަނބުރާ ފުލުހަށް ފޮނުވާފައިވާ ކަމަށް ވެސް ޕީޖީ އޮފީހުން ބުނޭ
ފުލުހުންގެ ލޯންޗެއްގައި ޓެރަރިޒަމްގެ ދައުވާ އުފުލުނު ބައެއް ބޭފުޅުން
ކުރީގެ ރައީސް މައުމޫން އަބްދުއްޤައްޔޫމާއި، ދިއްގަރު ދާއިރާގެ މެމްބަރު އަހުމަދު ފާރިސް މައުމޫނާއި، މުޙައްމަދު ނަދީމާއި، ކުރީގެ ޕޮލިސް ކޮމިޝަނަރ އަހުމަދު އަރީފާއި، ކިިނބިދޫ ދާއިރާގެ މެމްބަރު އަބްދުﷲ ރިޔާޒްގެ މައްޗަށްކުރި ޓެރަރިޒަމްގެ ދައުވާތައް ޕްރޮސިކިއުޓަރ ޖެނެރަލްގެ އޮފީހުން އަނބުރާ ގެންގޮސްފިއެވެ.
އެ ހުރިހާ ބޭފުޅުންގެ މައްޗަށްވެސް ޓެރަރިޒަމްގެ ދައުވާކުރަނީ ނިމިގެންދިޔަ އަހަރުގެ ފެބުރުއަރީ މަހުގެ 1 ވަނަ ދުވަހުގެރޭ ސުޕްރީމް ކޯޓުން ނެރުނު އަމުރާއި ގުޅިގެންނެވެ.
އެ ބޭފުޅުންނަށް ޕީޖީ އޮފީހުން ފޮނުވި ސިޓީގައި ބުނެފައިވަނީ، ސަރުކާރު ވައްޓާލުމަށް މަޖިލިސް މެންބަރުންނާއި ސުޕްރީމް ކޯޓުގެ ފަނޑިޔާރުންނަށް ރިޝްވަތު ދިން ކަމަށް ތުހުމަތުވާ މައްސަލާގައި ކޮށްފައިވާ ޓެރަރިޒަމްގެ އަމަލެއް ކުރަން އުޅުމުގެ ދައުވާ އިތުރަށް ކުރިއަށް ނުގެންދަން ނިންމާފައިވާ ކަމަށެވެ. އަދި އެ ދައުވާ ކުރިމިނަލް ކޯޓުން ނަގައި، އަނބުރާ ފުލުހަށް ފޮނުވާފައިވާ ކަމަށްވެސް ޕީޖީ އޮފީހުން ބުންޏެވެ.
ދައުވާ ލިބޭ ހުރިހާ ބޭފުޅުންގެ ޝަރީއަތް އެކުގައި ކުރިއަށް ގެންދިޔުމަށް ނިންމާފައިވާ އެ މައްސަލާގެ އިބްތިދާއީ އަޑުއެހުންތައް ވަނީ ނިންމާލައިފައެވެ.
މީގެކުރިން ޕީޖީ އޮފީހުން ވަނީ ފާރިސްގެ މައްޗަށްކުރި ރިޝްވަތު ދިނުމުގެ ދައުވާވެސް އަނބުރާ ގެންގޮސްފައެވެ.
