ސްޕެއިންގައި ފުން ވަޅަކަށް ވެއްޓުނު ދެ އަހަރުގެ ކުއްޖާ މަރުވެފައި އޮއްވާ ފެނިއްޖެ!
ކުއްޖާ ފެނުނީ ހޯދުމުގެ މަސައްކަތް ކުރާތާ 12 ދުވަސް ފަހުން
ހޫލެން ރޮސެއްޔޯ ވެއްޓުނު ވަޅު
ސްޕެއިންގެ އަންޑަލޫސިއާގައި، 110 މީޓަރުގެ ފުން ވަޅަކަށް ވެއްޓުނު ދެ އަހަރުގެ ފިރިހެން ކުއްޖާގެ ހަށިގަނޑު، އެ ކުއްޖާ ސަލާމަތްކުރުމުގެ މަސައްކަތް ކުރަމުން ދިޔަ ފަރާތްތަކަށް ފެނިއްޖެއެވެ.
އެންމެ ނުވަ އިންޗި ފުޅާ މިނުގައި ހުރި ވަޅަށް ހޫލެން ރޮސެއްޔޯ ކިޔާ މި ކުއްޖާ ވެއްޓުނީ އޭނާގެ އާއިލާއާއި އެކު ހިނގަން ނިކުމެ އުޅެނިކޮށެވެ. ރޮސެއްޔޯގެ ވަޅަށް ވެއްޓުނީ ޖެނުއަރީ މަހުގެ 13 ވަނަ ދުވަހުގައެވެ.
ތުއްތު ކުއްޖާގެ މަރާ ގުޅިގެން މުޅި ސްޕެއިންއަށް ސިހުން އައިސްފައިވާ އިރު، މަރުވި ކުއްޖާގެ އާއިލާއަށް ސްޕެއިންގެ ބޮޑުވަޒީރު ޕެޑްރޯ ސަންޗޭޒް ވަނީ ތައުޒިޔާ ވިދާޅުވެފައެވެ. އަދި އެ ކުއްޖާ ސަލާމަތްކުރުމުގެ މަސައްކަތުގައި އުޅުނު ހުރިހާ ފަރާތްތަކަށް ސަންޗޭޒް ޝުކުރު އަދާކުރެއްވިއެވެ.
ޑިސެމްބަރު މަހު ކޮނުނު މި ވަޅަކީ ފެން ހޯދަން ކޮނެފައި ހުރި ވަޅެއް ކަމަށާއި، އެ މަސައްކަތް ކުރުމަށް ފަހު ވަޅު ބަންދުކޮށްފައި ނުވާ ކަމަށް އޭއެފްޕީއިން ވަނީ ރިޕޯޓްކޮށްފައެވެ.
މި ވަޅުގެ މަސައްކަތް ކޮށްފައިވަނީ ނަގަންޖެހޭ ހުއްދަތައް ނުނަގައި ކަމަށް ބައެއް ފަރާތްތަކުން ބުނަމުން ދިޔުމާ ގުޅިގެން، ސްޕެއިންގެ މަލަގާގެ ކޯޓަކުން ވަނީ ކުއްޖާ މަރުވި މައްސަލަ ބަލަން ފަށާފައެވެ.
ކުއްޖާ ސަލާމަތްކުރުމުގައި މަސައްކަތް ކުރި ފަރާތްތަކުން ވަނީ، ވަޅު ތެރެއަށް ކެމެރާ ހަރުކޮށްފައި ހުރި ކުޑަ ރޮބޮޓެއް ފޮނުވައިގެން ކުއްޖާ ހޯދުމުގެ މަސައްކަތް ކޮށް، ނާކާމިޔާބު ވެފައެވެ. އެ ކުއްޖާގެ ހަށިގަނޑު ފެނުނީ، ވެއްޓުނު ވަޅުގެ ތެރޭގައި ކުއްޖާ އޮތް ކަމަށް ބެލެވޭ ދިމާލަށް އިތުރު ހޮހޮޅަތަކެއް ހަދައިގެންނެވެ.
