މިއަހަރުވެސް ކްލަބްތަކަށް މާލީ އެހީދޭނީ ސަރުކާރުން، 2020 ފެށިގެން ދޭނީ އެފްއޭއެމް
މި ގޮތަށް ނިންމީ ރައީސް ސޯލިހުއާ ބައްދަލުކުރެއްވުމަށް ފަހު
ބައްސާމް (ކ) އަދި ރައީސް ސޯލިހު (ކ)
މި އަހަރު ވެސް ކްލަބްތަކަށް ފައިސާ ދޫކުރާނީ ސަރުކާރުން ކަމަށާއި 2020 ވަނަ އަހަރުން ފެށިގެން އެކަން ކުރާނީ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ކަމަށް އެ އިދާރާ އިން ބުނެފިއެވެ.
އެފްއޭއެމުން ނެރުނު ބަޔާނެއްގައި ބުނީ، މި މަހުގެ 9 ވަނަ ދުވަހު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއާ އެކު އެފްއޭއެމްގެ ރައީސް ބައްސާމް އަދީލް ޖަލީލު ބޭއްވެވި ބައްދަލުވުމުގައި ކްލަބްތަކުގެ ތަރައްގީއަށް ސަރުކާރުގެ ކުންފުނިތަކާ ގުޅިގެން ކްލަބްތަކަށް ދެމުން އަންނަ މާލީ އެހީތެރިކަން އެހެން އަހަރުތަކެކޭ ވެސް އެއްފަދައިން، މި އަހަރު ވެސް ދިނުމަށް ކުންފުނިތަކާ އެކު މަޝްވަރާކުރައްވާނެ ކަމަށް ރައީސް ސޯލިހު ވިދާޅުވެފައިވާ ކަމަށެވެ. އަދި އެ ފައިސާ ވީއެންމެ އަވަހަކަށް ކްލަބްތަކަށް ލިބިގެންދާނެ ކަމުގެ ޔަގީންކަން ބައްދަލުވުމުގައި ލިބިގެންގޮސްފައިވާ ކަމަށް ވެސް ބަޔާނުގައި ވެއެވެ.
އެގޮތުން އެ ފައިސާ ކްލަބްތަކަށް މި އަހަރު ސަރުކާރުގެ ފަރާތުން ލިބިއްޖެ ނަމަ، 2020 ވަނަ އަހަރުން ފެށިގެން ކްލަބްތަކަށް ފައިސާ ދޫކުރާނީ އެފްއޭއެމުންކަމުގެ ފުރިހަމަ ޔަގީންކަން ރައީސް ސޯލިހުއަށް އަރުވާފައިވާނެ ކަމަށް ވެސް މި ބަޔާނުގައި ވެއެވެ. އަދި މި ފައިސާ އެފްއޭއެމުން ކްލަބްތަކަށް ދޫކުރާނީ އެއްވެސް ފަރާތެއްގެ މެދުވެރިވުމެއް ނެތި ކަމަށް ވެސް އެ އިދާރާއިން ވަނީ ބުނެފައެވެ.
މި ބައްދަލުވުމުގައި ދިވެހި ޒުވާނުންނާ ރައްޔިތުންގެ ލާބަ އާއި މަންފާއަށްޓާކައި މަސައްކަތް ކުރުމަކީ ސަރުކާރުގެ ވަރަށް ބޮޑު އަމާޒެއް ކަމަށާއި، އަދި ޒުވާނުންގެ ތަރައްގީއަށްޓަކައި ކުރެވޭ މަސައްކަތްތަކުގައި ސަރުކާރުގެ ފުރިހަމަ އެއްބާރުލުން ލިބިގެންދާނެ ކަމަށް ރައީސް ސޯލިހު ވިދާޅުވެފައިވާ ކަމަށް ވެސް މި ބަޔާނުގައި ވެއެވެ.
މި އަހަރުގެ ފުޓުބޯޅަ ސީޒަން ފެށުމަށް ހަމަޖެހިފައިވަނީ ޖޫން މަހުއެވެ. އެގޮތުން ކްލަބްތަކުން މިހާރުއްސުރެ އަންނަނީ ސީޒަނަށް ތައްޔާރުވުމަށް ބަޖެޓް ހޯދުމުގެ މަސައްކަތް ކުރަމުންނެވެ.
