މަހެއް ތެރޭގައި މާލީ ހާލަތު ހައްލުކުރެވޭނެ: ނިއުގެ ޗެއާމަން

ނިއުރޭޑިއަންޓް ސްޕޯޓްސް ކްލަބްގެ މާލީ ހާލަތު މަހެއްހާ ދުވަހުގެ ތެރޭގައި ހައްލުކުރުމަށް މަސައްކަތް ކުރަމުން އަންނަ ކަމަށް އެ ކްލަބުން ބުނެފިއެވެ.

ރާއްޖެއެމްވީ އަށް މައުލޫމާތު ދެއްވަމުން ޗެއާމަން ކާނަލް ރިޓަޔާޑް އަހުމަދު ޒިޔާދު ވިދާޅުވީ، ނިއުގައި މުސާރަ ނުދެވި ބައެއް ކުޅުންތެރިން ތިބި ކަމަށާއި، އެހެންނަމަވެސް މުސާރައިގެ މައްސަލަތައް މަހެއްގެ ތެރޭގައި ހައްލުކުރުމަށް ކްލަބުން މަސައްކަތް ކުރަމުން އަންނަ ކަމަށެވެ.

ޒިޔާދު ވިދާޅުވީ، އަންގާރަ ދުވަހު ވެސް ބައެއް ކުޅުންތެރިންނަށް މުސާރަ ދީފައިވާނެ ކަމަށެވެ. އެގޮތުން މިހާރު ދެ މަހުގެ މުސާރަ ނުދެވި ދިވެހި ހަތަރު ކުޅުންތެރިން ތިބޭނެ ކަމަށާއި، ބާކީ ކޮންމެ ދިވެހި ކުޅުންތެރިޔަކަށް ނުދެވި އޮތީ އެއް މަހުގެ މުސާރަ ކަމަށެވެ. އަދި ބޭރު ކުޅުންތެރިޔަކަށް ތިން މަހުގެ މުސާރަ ނުދެވި އެބަ އޮތް ކަމަށް ވެސް އޭނާ ވަނީ ވިދާޅުވެފައެވެ.

މުސާރައިގެ މައްސަލަތައް ކްލަބަށް ދިމާވަނީ ފުޓުބޯލް އެސޯސިއޭޝަން އޮފް މޯލްޑިވްސް އިން ދޭ ތިން މިލިއަން ރުފިޔާ އިން ކްލަބް ނުހިންގޭތީ ކަމަށް ފާހަގަކުރައްވަމުން ޒިޔާދު ވިދާޅުވީ، ކްލަބް ހިންގަން އެހެން ސްޕޮންސަރުންގެ އެހީ ވެސް ބޭނުންވާ ކަމަށެވެ.

ޒިޔާދު ވިދާޅުވީ، ބައެއް ކުންފުނިތަކުން ސްޕޮންސާ ދޭނެ ކަމަށް އެއްބަސްވެފައި، ސްޕޮންސާ ނުދޭ ކަމަށެވެ. އެގޮތުން ކްލަބުން ބައެއް ފަހަރު އެ ކުންފުނިތަކަށް ބަރޯސާވެގެން ދަތިތަކާ ކުރިމަތިވާ ކަމަށް ވެސް އޭނާ ވަނީ ވިދާޅުވެފައެވެ.

މީގެ އިތުރުން ޒިޔާދު ވިދާޅުވީ، ކްލަބުގެ މާލީ ކަންތައްތައް ރަނގަޅުކުރުމަށް ބިދޭސީ ކުޅުންތެރިޔަކު ފޮނުވާލަން މަޝްވަރާކުރަމުން އަންނަ ކަމަށާއި، އެކަމާ މެދު މި ހަފްތާ ތެރޭގައި ގޮތެއް ނިންމާނެ ކަމަށެވެ.

މި އަހަރުގެ ސީޒަނަށް ނިއު ނިކުތީ ބޮޑެތި ހަރަދުތަކެއް ކޮށްގެންނެވެ. އެގޮތުން އެ ކްލަބުން ވަނީ އޭއެފްސީ ކަޕުގައި ރަނގަޅު ނަތީޖާއެއް ހޯދުމަށް ބޮޑު އަގުގައި ކުޅުންތެރިން ގެނެސް ޓީމު ވަރުގަދަކޮށްފައެވެ. އެހެންނަމަވެސް ދެވަނަ ބުރަށް ނުގޮސް އެޓީމު ވަނީ ކަޓާފައެވެ.