މީގެ ކުރިން ކުޅިވަރު ކުރިއަރުވަން މަސައްކަތް ނުކުރާ ވަރަށް މި ސަރުކާރުން މަސައްކަތް ކުރާނެ: ނައިބު ރައީސް

މީގެކުރިން ކުޅިވަރު ކުރިއަރުވަން އެއްވެސް ސަރުކާރަކުން މަސައްކަތް ނުކުރާ ވަރަށް މި ސަރުކާރުން މަސައްކަތް ކުރާނެ ކަމަށް ރައީސުލް ޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ.

ރާއްޖެއެމްވީ އަށް މައުލޫމާތު ދެއްވަމުން ފައިސަލް ވިދާޅުވީ، މިހާރު އުފެދިފައި އޮތް ސަރުކާރަކީ ރައްޔިތުންގެ ސަރުކާރެއް ކަމަށާއި، މި ސަރުކާރު ދެމި އޮންނާނީ ރައްޔިތުންނާއެކު ކަމަށެވެ.

އެގޮތުން ފައިސަލް ވިދާޅުވީ، ކުޅިވަރު ކުރިއަރުވަން މީގެ ކުރިން އެއްވެސް ސަރުކާރަކުން މަސައްކަތް ނުކުރާ ވަރަށް މިހާރުގެ ސަރުކާރުން މަސައްކަތް ކުރާނެ ކަމަށާއި، މި ސަރުކާރުން ކުރާ ކޮންމެ ކަމެއް ކުރާނީ ދިވެހިން އެދޭ ގޮތަށް ކަމަށެވެ.

ފައިސަލް ވިދާޅުވީ، ކުޅިވަރުގެ މައިދާނުން ގުޅުން ބަދަހިވެ، ރައްޓެހިންވެސް ހޯދޭ ކަމަށާއި، އެކުގައި އުޅެން ދަސްވަނީވެސް ކުޅިވަރުގެ މައިދާނުން ކަމަށެވެ. އެގޮތުން އެކުގައި އެންމެން ތިބެގެން ކުޅިވަރުން ގައުމަށް އިތުރު ކާމިޔާބީ ހޯދާ، އިތުރު ހަރުފަތަކަށް ގެންދެވޭނެ ކަމަށެވެ.

މީގެއިތުރުން ފައިސަލް ވިދާޅުވީ، ގައުމުގައި ކުރިޔަށްދާ ކޮންމެ ކަމެއްގައި ޒުވާނުންގެ ބައިވެރިވުން ވަރަށް މުހިންމު ކަމަށާއި، އެންމެން ގުޅިގެން ގައުމަށް ދިމާވާ މައްސަލަތައްވެސް ހައްލުކުރެވޭނެ ކަމަށެވެ.

"މިއޮތީ ރައްޔަތުންގެ ސަރުކާރެއް އުފެދިފައި. ކުޅިވަރުގެ ދަނޑުން ގުޅުން ބަދަހިވަނީ. ރައްޓެހިން ހޯދެނީ. ކުޅިވަރުގައިވެސް އެކުގައި ތިބެ ގައުމަށް އިތުރު ކާމިޔާބީ ހޯދާ އިތުރު ހަރުފަތްތަކެއް ހޯދަން ބޭނުންވަނީ. ގައުމުގައި ކުރިއަށްދާ ކޮންމެ ކަމެއްގައި ޒުވާނުން ބައިވެރިވާން ޖެހޭ. އެންމެން ގުޅިގެން ގައުމުގައި ހުރި މައްސަލަތައް ހައްލުކުރަން މަސައްކަތް. ސަރުކާރުގައި ކުރާ ކޮންމެ ކަމެއް ކުރާނީ ދިވެހިން އެދޭ ގޮތަށް. ކުޅިވަރު ކުރިއަރުވަން ދުވަހަކުވެސް މަސައްކަތް ނުކުރާ ވަރަށް މި ސަރުކާރުން އެކަން ކުރާނެ،" ރާއްޖެއެމްވީ އަށް މައުލޫމާތު ދެއްވަމުން ފައިސަލް ވިދާޅުވިއެވެ.

ރައީސް ސޯލިހުގެ ވެރިކަމުގައި ރާއްޖޭގެ ކުޅިވަރު ކުރިއެރުވުމަށް ގިނަ ވައުދުތަކެއް ވަނީ ވެވަޑައިގަންނަވާފައެވެ. އެގޮތުން ކުޅިވަރު ކުރިއެރުވުމަށް ފެށި މަސައްކަތުގެ ތެރެއިން ނިމިދިޔަ އާދީއްތަ އަދި ހޯމަ ދުވަހު ވަނީ "ދުޅަހެޔޮ ހަށިހެޔޮ އީދު" ގެ ނަމުގައި ބޮޑު ކުޅިވަރު އީދެއް ބާއްވާފައެވެ. މި ކުޅިވަރު އީދަށް ބޮޑު ތަރުހީބެއް ލިބިގެންދިޔައެވެ.