އެމެރިކާގެ އިސް ފަރާތްތަކާ މިނިސްޓަރު ޝާހިދު ބައްދަލުކުރައްވައިފި
23 ޖެނުއަރީ 2019 | ބުދަ 13:05އެމެރިކާއިން ރާއްޖެއަށް ފޯރުކޮށްދެވިދާނެ އެހީތަކާ ގުޅޭ ގޮތުން ވަނީ މަޝްވަރާކުރައްވާފައި
އެމެރިކާގެ އިސް ފަރާތްތަކާ ޝާހިދު ބައްދަލުކުރައްވަނީ
އެމެރިކާއަށް ކުރައްވަމުން ގެންދަވާ ދަތުރުފުޅުގައި ޚާރިޖީ ވަޒީރު އަބްދުﷲ ޝާހިދު އެ ޤައުމުގެ ވެރިރަށް ވޮޝިންޓަނަށް ވަޑައިގެން، އެޤައުމުގެ އިސް ފަރާތްތަކާ ބައްދަލުކުރައްވައިފިއެވެ.
އެގޮތުން މިނިސްޓަރ ޝާހިދު ވަނީ އެމެރިކާގެ ޓްރެޜަރީ ޑިޕާޓްމަންޓްގެ އިސްވެރިންނާއި، އެމެރިކާ ސަރުކާރުގެ ބައިނަލްއަޤްވާމީ އެހީއާ ބެހޭ އިދާރާ ޔޫއެސް އެއިޑްގެ ބޭފުޅުންނާ ބައްދަލުކުރައްވައި، އެމެރިކާއިން ރާއްޖެއަށް ފޯރުކޮށްދެވިދާނެ އެހީތަކާ ގުޅޭ ގޮތުން މަޝްވަރާކުރައްވާފައެވެ. އެގޮތުން އިންސާނީ ވަޞީލަތްތައް ތަރައްޤީކުރުމާއި، އެކި ދާއިރާތަކުން ޤާބިލްކަން އިތުރުކުރުމުގެ އިތުރުން މާލީ ދާއިރާ އިތުރަށް ހަރުދަނާކުރުމަށް އެމެރިކާއިން ރާއްޖެއަށް ވެދެވޭނެ އެހީތަކާ ގުޅޭ ގޮތުން އެމެރިކާގެ އިސް އޮފިޝަލުންނާ އެކު މިނިސްޓަރ ޝާހިދު ވަނީ މަޝްވަރާކުރައްވާފައެވެ.
މިނިސްޓަރ ޝާހިދު އެމެރިކާއަށް ކުރައްވާ ދަތުރުފުޅުގައި ވެރިރަށް ވޮޝިންޓަންގެ އިތުރުން ނިއުޔޯކަށް ވެސް ވަޑައިގަންނަވާނެއެވެ. އަދި ވޮޝިންޓަނާއި ނިއުޔޯކްގައި އެމެރިކާގެ ސަރުކާރުގެ އިސް ފަރާތްތަކާ ބައްދަލުކުރައްވާނެއެވެ.
އެމެރިކާއަށް ވަޑައިގަތުމުގެ ކުރިން މިނިސްޓަރ ޝާހިދު ވަނީ ޔޫއޭއީއަށް ވަޑައިގެން، އެޤައުމުގައިވެސް މުހިއްމު މަޝްވަރާތަކެއް ކުރައްވާފައެވެ. މި މަޝްވަރާތަކުގައި ފޮރިން މިނިސްޓަރ ޝާހިދާއިއެކު އެހެން ބައެއް ވަޒީރުންނާއި ސަރުކާރުގެ އިސް އޮފިޝަލުން ބައިވެރިވެވަޑައިގަތެވެ.
