މިއީ ތައުލީމީ މުއައްސަސާއެއް، ސިޔާސީ ކަންކަމުގައި ބައިވެރިއެއް ނުވަން: މަންދު ކޮލެޖު
22 ޖެނުއަރީ 2019 | އަންގާރަ 19:07މަންދު ކޮލެޖުން ފޯރުކޮށްދެމުންދާ ހިދުމަތްތަކަށް ހުރަސް އެޅުމުގެ މި ބާވަތުގެ އަމަލުތައް ނުކުރުމަށް މަންދު ކޮލެޖުން އިލްތިމާސް ކުރި
މަންދު ކޮލެޖުގެ ދޮރާށީގެ ބިއްލޫރިގަނޑު ތަޅާލާފައި
މަންދު ކޮލެޖަކީ އިލްމު ފެތުރުމުގެ ހިދުމަތް ފޯރުކޮށްދޭ ތައުލީމީ މުއައްސަސާއެއް ކަމަށާއި، ސިޔާސީ ކަންކަމުގައި ޝާމިލުވާ ތަނެއް ނޫން ކަމުގައި އެ ކޮލެޖުން ބުނެފިއެވެ.
ހޯމަ ދުވަހުގެރޭ ބަޔަކު ވަނީ މަންދު ކޮލެޖުގެ ކުރިމަތީގައި މުޒާހަރާކޮށްފަ އެވެ. އަދި އެރޭގެ ދަންވަރުގެ ވަގުތެއްގައި ބަޔަކު ވަނީ މަންދުކޮލެޖުގެ ބިއްލޫރިގަނޑު ފަޅާލާއިފަ އެވެ.
އެ އަމަލުތައް ކުށްވެރިކޮށް، ކޮލެޖު ނެރުނު ބަޔާނެއްގައި ބުނެފައިވަނީ، އެއްވެސް ބަޔަކު، އެބައެއްގެ އަމިއްލަ ވަކި ކަމެއްގައި ކޮލެޖަށް އަމާޒުކޮށް ކަންކަން ހިންގާ ކަމީ ކޮލެޖުން އިންތިހާއަށް ހިތާމަ ކުރާ ކަމެއް ކަމަށެވެ. އަދި މަންދު ކޮލެޖުން ފޯރުކޮށްދެމުންދާ ހިދުމަތްތަކަށް ހުރަސް އެޅުމުގެ ގޮތުން ކުރާ އެ ބާވަތުގެ "ފިނޑި" އަމަލު ތަކުރާރުނުކުރުމަށް ވެސް އެ ކޮލެޖުން އިލްތިމާސް ކޮށްފައިވެއެވެ.
މަންދު ކޮލެޖުން ވަނީ އެ ކޮލެޖްގެ ހުރިހާ ދަރިވަރުންނަށް ރައްކާތެރި މާޙައުލެއްގައި އުނގެނެމުގެ ފުރުޞަތު ތަނަވަސްކޮށްދިނުމުގައި، އެ ކޮލެޖުގެ މަސައްކަތް ފަސްޖެހުމެއްނެތި ކުރިއަށް ގެންދާނޭ ކަމުގެ ޔަޤީންކަން އަރުވާފައެވެ.
މަންދު ކޮލެޖުން މި ބަޔާން ނެރެފައި ވަނީ، ހޯމަ ދުވަހު އެ ކޮލެޖު ހުޅުވާން 3 މީހަކު ހުރަސް އެޅުމާއި، ހަމަ އެ ދުވަހުގެ އިރުއޮއްސި 9.00 ހާއިރު ކޮލެޖު ބަންދުކުރުމަށް ގޮވާލައި އެ ކޮލެޖުގެ ކުރިމަތީގައި ބަޔަކު މުޒާހަރާ ކުރުމާއި، އަދި އެ ރޭގެ ދަންވަރުގެ ވަގުތެއްގައި އެ ކޮލެޖްގެ ދޮރާށީގެ ބިއްލޫރިތައް ތަޅާލުމާއި ގުޅިގެންނެވެ. އެއްވީ ފަރާތްތަށް ފުލުހުންގެ އެހީތެރިކަމާއި އެކު ދުރަށް ޖައްސާފައިވާ އިރު، މަންދު ކޮލެޖުން ބުނެފައިވަނީ މި އަމަލުތަކުގެ ސަބަބުން އެ ކޮލެޖުގައި ކިޔަވާ ކުދިންގެ ހިތްތަކަށް ބިރުވެރިކަމާއި ނުތަނަވަސްކަން ވަދެ، ކިޔެވައިދިނުމަށް ބުރޫއެރި ކަމަށް ވެސް އެ ބަޔާނުގައި ބުނެފައިވެއެވެ.
އާއްމުންގެ ތެރޭގައި މަންދު ކޮލެޖަށް ނިސްބަތްކޮށް ނުތަނަވަސްކަން އުފެދިގެން އުޅެނީ، އެ ކޮލެޖުގެ ބާނީ އިބްރާހިމް މުހައްމަދު (އިބްރާ) ރަސޫލާއަށް ފުރައްސާރަކޮށް ޓްވީޓްއެއް ކުރި ކަމުގެ ތުހުމަތުތަކާއި ގުޅިގެންނެވެ. އާދިއްތަ ދުވަހުގެ ރޭ އިބްރާވަނީ ފުލުސް އޮފީހަށްވެސް ހާޒިރުކޮށްފައެވެ. ފުލުހުން ބުނީ އިބްރާ ފުލުސް އޮފީހަށް ހާޒިރުކުރީ މިހާރު ސޯޝަލް މީޑިއާގައި ނަފްރަތު އުފެދޭ ގޮތަށް ދައްކާ ވާހަކަތަކާއި ގުޅިގެން ފިޔަވަޅުއަޅާ އުސޫލުގެ ދަށުން ކަމުގައެވެ.
މަންދު ކޮލެޖަކީ 1998 ވަނަ އަހަރުން ފެށިގެން ތައުލީމް ފޯރުކޮށްދިނުމުގެ ދާއިރާގައި ހަރަކާތްތެރިވާ މުއައްސަސާއެކެވެ. ރާއްޖޭގައި ހުރި އެއްމެ ދުވަސްވީ ޕްރައިވެޓް ކޮލެޖަކީ ދިވެހިރާއްޖޭގައި އެކުއްޖަކު ހުރި ތަނަކުން މަތީ ތަޢުލީމު ހޯދުމުގެ ފުރުޞަތު ފޯރުކޮށްދޭ ހަމައެކަނި ކޮލެޖެވެ.
