ޓެކްސްއަށް މަކަރު ހެދަކަމަށް ޔުވަންޓަސްއަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އެއްބަސްވެއްޖެއެވެ.

އުމުރުން 33 އަހަރުގެ ރޮނާލްޑޯގެ މައްޗަށް ތުހުމަތުކޮށްފައިވަނީ 2010 އިން 2014 ވަނަ އަހަރާ ދެމެދު އޭނާ ރެއާލްއަށް ކުޅުނު ދުވަސްވަރުގައި 12.9 މިލިއަން ޕައުންޑުގެ ޓެކްސް ފައިސާ ނުދައްކާ މަކަރު ހަދާފައިވާ ކަމަށެވެ.

ޓެކްސްއަށް މަކަރު ހެދިކަމަށް ރޮނާލްޑޯ އެއްބަސްވީ އަންގާރަ ދުވަހު ކޯޓަށް ހާޒިރު ކުރުމުންނެވެ. އެގޮތުން އޭނާ ވަނީ 23 މަސްދުވަހުގެ ޖަލު ހުކުމުން ސަލާތްވުމަށް 16.5 މިލިއަން ޕައުންޑުގެ ޖޫރިމަނާއެއް ދެއްކުމަށްވެސް ކޯޓުގައި އެއްބަސްވެފައެވެ.

ސްޕެއިންގެ ގާނޫނުގައި ވާގޮތުން، ޖޫރިމަނާ ފައިސާ ދައްކައި، އަދި މިނޫން ވެސް ކަންތައްތަކެއް ފުރިހަމަ ކުރުމުން ޕްރޮބޭޝަންގެ މުއްދަތެއް ކަނޑައަޅާނެއެވެ. އަދި މި މުއްދަތުގައި އިތުރު ކުށެއް ނުކުރާ ނަމަ ޖަލަށް ނުގޮސް ސަލާމަތް ވެވޭނެ އެވެ.

މެޑްރިޑްގެ ކޯޓެއްގައި އޮތް ޝަރީއަތުގެ އަޑުއެހުމަށް ރޮނާލްޑޯ ހާޒިރުވީ އޭނަގެ ބައިވެރިޔާ ޖޯޖީނާ ރޮޑްރިގޭޒްއާ އެކުއެވެ. ގިނަ ބަޔަކަށް ނުފެންނާނެ ގޮތަށް ބިމުއަޑީގެ މަގަކުން އައިސް ކޯޓަށް ވަނުމުގެ ހުއްދައަކަށް ރޮނާލްޑޯ ކޯޓުގައި އެދުނު ނަމަވެސް އެފުރުސަތު ކޯޓުން ފަހިކޮށްދީފައެއް ނުވެއެވެ.