ކުރީގެ ނައިބު ރައީސް އަހްމަދު އަދީބުގެ ބޭސްފަރުވާއަށް ހުރަސްއަޅަމުންދާ ކަމަށް އާއިލާއަށް ގަބޫލުކުރެވޭތީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުއާ ބައްދަލުކުރެވޭނެ އިންތިޒާމެއް ހަމަޖައްސައިދިނުމަށް އާއިލާއިން އެދިއްޖެއެވެ.

އަދީބުގެ ސިއްހީ ހާލަތާ ގުޅިގެން ކަންބޮޑުވުންފާޅުކޮށް އާއިލާއިން ނެރެފައިވާ ބަޔާނެއްގައި ބުނެފައި ވަނީ ސަރުކާރުގެ އިސް 10 ބޭފުޅަކާ ބައްދަލުކުރުމަށް އެދި ހުށަހަޅާފައިވާ ކަމަށެވެ.

އެއީ ރައީސް ސޯލިހުގެ އިތުރުން ރައްޔިތުންގެ މަޖިލީހުގެ ރައީސް ގާސިމް އިބްރާހިމާއި، ކުރީގެ ރައީސް މުހައްމަދު ނަޝީދާއި، ކުރީގެ ރައީސް މައުމޫން އަބްދުލް ޤައްޔޫމާއި، އެކްޓިން ކޮމިޝަނަ އޮފް ޕޮލިސް މުހައްމަދު ހަމީދާއި، އެންޓި-ކޮރަޕްޝަން ކޮމިޝަންގެ ރައީސް ހަސަން ލަތީފާއި، މިނިސްޓަރ އޮފް ހެލްތު އަބްދުﷲ އަމީންއާ ކަމަށެވެ. އަދި ނެޝަނަލް އިންޓެގްރިޓީ ކޮމިޝަނާއި، މޯލްޑިވްސް މެޑިކަލް ކައުންސިލާއި ބައްދަލުކުރުމަށް އެދިފައިވާ ކަމަށް އަދީބުގެ އާއިލާއިން ބުނެއެވެ.

އާއިލާ އިން ބުނީ އަދީބުގެ ސިއްހީ ހާލަތު ގޯސްވެގެން 17 ނޮވެންބަރު 2018 ގައި އައިޖީއެމްއެޗް ހޮސްޕިޓަލުގައި އެޑްމިޓް ކުރެވި ކާމިޔާބު ސާރޖަރީއަކަށް ފަހު އައިލީ އެހީތެރިކަން ލިބޭނެ ގޮތެއްގައި 'ސްޓްރެސް ފްރީ' މާހައުލެއްގައި ބެހެއްޓުމުގެ ޑޮކްޓަރު އިރުޝާދު ދެއްވާފައިވުމުން ގޭބަންދުގައި ބެހެއްޓުމަށްފަހު، މިމަހު 2 ގެ ކުރިން އެންގުމަކާނުލާ ޑޮކްޓަރުގެ އިރުޝާދާއި ހިލާފަށް އަބުރާ ޖަލަށް ގެންގޮސްފައިވަނިކޮށް އަދީބުގެ ސިއްހީ ހާލަތު ގޯސްވެ، އެމަރޖެންސީކޮށް އައިޖީއެމްއެޗް ހޮސްޕިޓަލުގައި އެޑްމިޓްކުރެވި ފަރުވާދެމުން ދަނިކޮށް ތަފާތު ނުފޫޒުތަކެއް ޑޮކްޓަރަށް މެދުވެރިވި ކަމަށެވެ.

މަޖުބޫރީ ހާލަތެއް ކުރިމަތިވި ކަމަށް ވިދާޅުވެ ފަރުވާ ފުރިހަމަވުމުގެ ކުރިން ހޮސްޕިޓަލުން ޑިސްޗަރޖުކުރެވި އަބުރާ ޖަލަށް ގެންދެވިފައިވާތީ މިމައްސަލާގައި ހުރި ކަންބޮޑުވުންތަކާއި އަދި އަދީބުގެ ބޭސްފަރުވާއަށް ހޯމް މިނިސްޓަރު އައްޝައިޚް އިމްރާން އަބްދުﷲ ހުރަސް އަޅަމުން ގެންދާތީ އެކަމާއި ގުޅިގެން މަޝްވަރާ ކުރުމަށް އާއިލާއިން ބޭނުންވާތީ އެ ބޭފުޅުންނާ ބައްދަލުކުރުމަށް ހުށަހެޅީ ކަމަށެވެ.

އާއިލާއިން ބުނީ އަދީބަކީ ބޭއިންސާފުން 33 އަހަރުގެ ޖަލު ހުކުމެއްގައިވާ ފަރާތެއް ނަމަވެސް ބޭސްފަރުވާގެ ހައްގަކީ އިންސާނީ ހައްގެއް ކަމަށާއި، އަދީބަށް ކުރެވިފައިވާ ސިޔާސީ ޖަލު ހުކުމަކީ އަދީބުގެ ބޭސްފަރުވާގެ ކަންކަމާއި އަޅުވާ ކިޔޭނެ ކަމެއް ނޫން ކަމަށެވެ.

އާއިލާގެ ފަރާތުން އެދިފައިވާ ގޮތަށް މިބޭފުޅުންނާއި ބައްދަލުކުރެވޭނެ ކަމަށް އުއްމީދު ކުރާ ކަމަށްވެސް އަދީބްގެ އާއިލާ އިން ވަނީ ބުނެފަ އެވެ.