ފަހުވަގުތާ ޖެހެންދެން މުބާރާތްތައް ކާމިޔާބުކުރަން މަސައްކަތް ކުރާނަން: ސޮލާރީ

އެންމެ ފަހުވަގުތާ ޖެހެންދެން ވާދަކުރަމުން އަންނަ ތިން މުބާރާތް ކާމިޔާބުކުރަން މަސައްކަތް ކުރާނެ ކަމަށް ރެއާލް މެޑްރިޑްގެ ކޯޗު ސެންޓިއާގޯ ސޮލާރީ ބުނެފިއެވެ.

ސެވިއްޔާ އަތުން 0-2 ގެ ނަތީޖާއިން މޮޅުވި މެޗަށްފަހު ނޫސްވެރިންނަށް މައުލޫމާތު ދެމުން ސޮލާރީ ބުނީ، މީގެކުރިންވެސް ރެއާލުން އެންމެ ފަހުވަގުތާ ޖެހެންދެން ހުރިހާ މުބާރާތްތައް ކާމިޔާބުކުރަން މަސައްކަތް ކުރާ ކަމަށާއި، އެފަދައިން މިފަހަރުވެސް މަސައްކަތް ކުރާނެ ކަމަށެވެ.

ސޮލާރީ ބުނީ، ރެއާލްއަށް އެއްވެސް އިރެއްގައި ކަންކަމަކީ ނުވާނެ ކަމެއްކަން ދެކިގެން ނޫޅޭ ކަމަށާއި، އަބަދުވެސް އެކަމެއް ނުވުމާ ހަމައަށް ވިސްނާނީ އެކަމެއް ވާނެ ކަމަށް ކަމަށެވެ.

ސޮލާރީ މިހެން ބުނެފައިވާއިރު، ރެއާލް އޮތީ ސްޕެނިޝް ލީގުގައި މިހާތަނަށް ކުޅުނު 29 މެޗުން ލިބުނު 36 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ. އެޓީމު މިހާތަނަށް ކުޅުނު މެޗުތަކުގެ ތެރެއިން 11 މެޗުން މޮޅުވިއިރު، ހަ މެޗުން ވަނީ ބަލިވެފައެވެ. ބާކީ ތިން މެޗު ނިމުނީ އެއްވަރުވެގެންނެވެ.

ރެއާލް ތިންވަނައިގައި އޮތްއިރު، ދެވަނައިގައި އޮތް އެޓްލެޓިކޯ މެޑްރިޑާ ދެމެދު ފަސް ޕޮއިންޓްގެ ލީޑެއް އެބައޮތެވެ. އަދި އެއްވަނައިގައި އޮތް ބާސެލޯނާއާ ދެމެދު ހަތް ޕޮއިންޓްގެ ލީޑެއް އެބައޮތެވެ.

ޔުއެފާ ޗެމްޕިއަންސް ލީގުގެ ގަދަ 16 އަށް ރެއާލް ދަތުރުކޮށްފައިވާއިރު، ކޮޕާޑެލްރޭގައި އެޓީމު ވަނީ ކުއާޓާއަށް ދަތުރުކޮށްފައެވެ. އެގޮތުން ލީގާއެކު ޖުމްލަ ތިން މުބާރާތް ކާމިޔާބުކުރުމުގެ ފުރުސަތު ރެއާލްއަށް އަދި އެބައޮތެވެ.