ބާލީގެ ބޮންގޮއްވުމުގެ ހާސިދާގެ ފަހަތުގައި ހުރި ލީޑަރު މިނިވަންކުރަނީ

އިންޑޮނީޝިއާގެ ބާލީގައި 2002 ވަނަ އަހަރު ބޮން ގޮއްވާލުމުގެ ފަހަތުގައި ހުރި ލީޑަރުކަމުގައިވާ އަބޫ ބަކަރު ބާޝިރް މިނިވަންކުރަން ނިންމައިފި ކަމަށް އޭނާގެ ވަކީލަކު ވިދާޅުވެއްޖެ އެވެ.

އުމުރުން 80 އަހަރުގެ ބާޝިރް ވަނީ އޭނާއަށް އިއްވި 15 އަހަރުގެ ޖަލު ހުކުމުގެ 8 އަހަރު ތަންފީޒުކޮށްފައެވެ. އޭނާގެ ވަކީލު މުހައްމަދު މަހެންދްރަދައްތާ ބުނީ ބާޝިރު މިނިވަންކުރަން ނިންމީ އޭނާގެ ސިއްހީ ހާލަތަށް ރިއާޔަތްކޮށް އިންސާނިއްޔަތަށްޓަކައި ކަމަށެވެ.

ބާޝިރު މިނިވަންކުރާ ކަން އިއުލާން ކުރީ އެޕްރީލް މަހުގައި އޮތް އިންޑޮނޭޝިއާގެ ރިޔާސީ އިންތިހާބުގައި ވާދަކުރައްވާ މިހާރުގެ ރައީސް ޖޯކޯ ވިދޯދޯގެ ކެމްޕެއިން އިވެންޓެއްގައެވެ.

މި ބޮން ގޮއްވުމުގެ ހާދިސާގައި 202 މީހުން މަރުވެފައިވާ އިރު، ގިނައިން މަރުވީ ހުޅަނގުގެ ގައުމުތަކަށައި އޮސްޓްރޭލިއާއަށް ނިސްބަތްވާ ފަތުރުވެރިންނެވެ. އޮސްޓްރޭލިޔާއިން ވަނީ ބާޝިރުގެ ބަންދަށް އެއްވެސް ކަހަލަ ލުޔެއް ނުދިނުމަށް އިންޑޮނޭޝިއާގެ ސަރުކާރަށް އިލްތިމާސްކޮށްފައެވެ.

ބާޝިރުއަކީ މި ބޮންގޮއްވުމުގެ ހާދިސާތަކުގެ ޒިންމާ ނެގި ޖަމާހް އިސްލާމިއްޔާގެ ރޫހާނީ ލީޑަރެވެ. މި ހަމަލާއާއި ގުޅިގެން އޭނާ ހައްޔަރު ކުރެވުނު ނަމަވެސް އޭނާގެ މައްޗަށް ސާބިތުވީ އަސްކަރީ ތަމްރީނުދޭ މަރުކަޒެއް ގާއިމުކުރުމަށް އެހީތެރިވެދިން ކަމުގެ ކުށެވެ.